Reportazen Zevonia Vieira
Relasiona ho virus Corona ne’ebe daet ona mai Timor-Leste no sai pandemia iha mundu tomak, ohin loron Prezidente da Republika, Dr Francisco Guterres Lu Olo dekreta estadu emerjensia, hodi prevene kalamidade públika ida akontese ba ita, husi COVID-19.
“Ha’u dekreta tanba Konstituisaun fó dalan ba estadu emerjénsia bainhira iha kalamidade públika. Ha’u dekreta ho autorizasaun husi Parlamentu Nasional. Ha’u halo ida ne’e ho responsabilidade tomak, nudar Prezidente Repúblika, atu proteje ita-nia ema, atu la husik moras koronavíris destrói ita ida-idak no ita-nia Povu no País”, deklara Prezidente da Republika iha palacio prezidensia, 27/03
Estadu ermejensia ne’e sei hahu hosi loron 28 Marsu, Sabadu hahu hosi 00 oras to’o 26 Abril 2020 meia-noite.
Prezidente da Republika hateten Timor-leste tama iha estadu emerjénsia atu fó dalan ba Governu foti no implementa medida espesífiku sira. Sei limita ka suspende ita-nia direitu balun, ita-nia liberdade balun, garantia balun ne’ebé Konstituisaun fó ba sidadaun ida-idak no ba hotu-hotu. La’ós atu halakon! Suspende ka limita atu defende interese boot liu – mak Povu nia vida, ita-nia vida no ita-nia família nia vida.
Prezidente husu ba povu tomak atu simu medida sira ne’e, ho dame no respeitu no fó apoiu ba ekipa ne’ebé servisu maka’as iha terrenu.
Prezidente hateten atividade balun sei para no balun seluk sei lao nafatin atu garante ita-nia moris loron-loron. Governu bele proíbe reuniaun no manifestasaun ka eventu sosiál, limita sirkulasaun ema nian no saída de’it ne’ebé envolve ema barak, tanba risku kontájiu, husi ema ba ema, boot tebes.
“Ohin, hanesan iha tempu luta libertasaun nasional, ita timoroan tenke hatene fó liman ba malu, hodi hasoru ita-nia inimigu ida ne’e mak moras COVID 19. Hamutuk ita tenke fó apoiu ba Governu, hodi implementa medidas ne’ebé efetivu atu antesipa vírus ida ne’e labele da’et babeibeik no nune’e, proteje ita-nia Povu! Ita tenke reforsa Governu oinsá de’it, iha tempu ne’ebé de’it”, hateten Lu Olo
Xefe Estadu mos hatoo ba partidu politikus, liders, kuadrus no militantes hotu-hotu atu tau sees lai diferensas polítikas, hodi fó liman ba malu, nu’udar kombatente ida de’it hasoru moras aat ida ne’e.
“Ita hotu-hotu tenke halo refleksaun klean saída mak bele akontese aban ba ita, nu’udar timoroan, iha situasaun difísil ida ne’e. Liuhusi Parlamentu Nasional nia autorizasaun, ha’u dekreta Estado de Emergéncia ne’e hatudu sinal pozitivu tebetebes ba ita-nia solidariedade institusional iha luta ida ne’e hodi defende ita-nia Povu. No husi sorin seluk, Timor-Leste, biar Nasaun kiik, ita fó mós solidariedade kombativa internasional hodi luta hamutuk hasoru moras aat COVID-19, nu’udar umanidade nia inimigu”, tenik Lu Olo
Medida espesífiku liu, durante períodu estadu emerjénsia, sei define husi Governu ho apoiu husi órgaun soberania hotu-hotu. Governu ninia susesu depende ba kolaborasaun husi sidadaun ida-idak no husi ema hotu.
Iha ikus liu Prezidente Lu Olo fo lia menon katak luta ne’e ita-nian hotu. Hamutuk ita sei manán koronavírus ho ita-nia matenek organizadu, nu’udar Povu ida de’ it, ho hakarak ida de’it. Moris saudável no ho liberdade tomak maibé nu’udar sidadaun responsável ne’ebé hatene valór domin no respeitu entre ita hotu, iha ita-nia Timor-Leste livre no independente.
