Reportajen Filomena da Conceição
Konsellu Imprensa (KI) servisu hamutuk ho ABC International Development (ABCID) organiza treinamentu ba jornalista sira, hodi hasa’e profesionalidade jornalista sira nian, hodi bele fó informasaun ne’ebé balansu no justu ba públiku sira, durante iha kampaña eleitorál, tuir kódigu étika jornalista nian.
Diretór ABC International Development, Aaron Kearney kontente tebes hodi parseira ho KI, atu fó apoiu ba jornalista sira durante kampaña eleitorál, nune’e bele dezenvolve abilidade no koñesimentu jornalista sira nian bainhira hakerek notísia ka istória.
Nia dehan maibé dalaruma susar atu sai jornalista, tanba ho osan ne’ebé natoon, no hasoru dezafiu barak maibé ida ne’e servisu ne’ebé importante ba jornalista, hodi halo pergunta no hakerek istória barak liu tan.
“Objetivu husi formasaun ne’e atu ajuda jornalista sira hodi hala’o servisu Jornalista nian , no ami hakarak tebes imi sente konvense bainhira imi hakerek istória no ami hakarak dezenvolve abilidade no koñesimentu jornalista sira, hodi serbi povu Timor-Leste, tanba ne’e ABC International Development sei servisu hamutuk nafatin ho KI, ajuda jornalista sira hodi halo kobertura no prodúz notisia” dehan Aaron ba jornalista sira iha salaun city8 Canossa Has Laran, 13 /04.
Iha fatin hanesan Prezidente Konsellu Imprensa, Otelio Ote, haktuir formasaun ne’e importante tebes atu fasilita jornalista sira ba kobertura iha eleisaun, tanba eleisaun besik ona no hahú ona kampaña. Tanba ne’e, KI koopera direita kedas ho ABC Austrália. Tanba antes ne’e KI ho ABC Austrália halo kedas iha tinan kotuk. Ne’e oportunidade di’ak ba jornalista sira, tanba formasaun ne’e situational ho pertinente duni ba jornalista sira, atu hatene kona-ba oinsá jere prosesu mekanizmu atu ba kobertura, no prodúz notísia ba públiku.
“Formasaun ne’e importante tebes ba jornalista sira, no matéria hirak ne’e prepara husi ABC Austrália mak sei prepara, no sira iha esperiénsia ba prosesu kobertura nian no prodúz notísia ba eleisaun. Tanba ne’e KI e prinsípiu haksolok atu koopera ho instituisaun sé deit para bele dezenvolve meius komunikasaun sosiál iha Timor, espesiál liu ba kapasidade abilidade tékniku profisionál no intelektuál ba jornalista sira”, dehan Otelio.
Entretantu formasaun ne’e realiza hetan partisipasaun husi Presidente Konsellu Imprensa, Diretór Ezekutivu KI, Diretór ABC Internationál Development , Xefe Gabinete STAE , membru Konsellu Imprensa, Jornalista Rádiu Komunidade, média nasionál no online.
