Reportajen David da Costa
Masakre Santa Cruz 12 Novembru 1991 mak akontesimentu importante tebes iha istória Timor-Leste, ne’ebé mos sai momentu mudansa ba luta povu Timoroan nia direitu no liberdade, tanba ne’e eis Prezidente Repúblika Taur konsidera juventude Loriku As’wain ho determinasaun tomak, hosi espíritu luta ba Ukun Rasik An nian, oferese an hakilar ba mundu Timor-Leste Mate ka Moris Ukun Rasik An.
Iha komunikadu Imprensa ne’ebe Neon Metin asesu ohin, Eis Prezidente Repúblika (PR) no eis Primeiru-Ministru (PM), Taur Matan Ruak hateten, loron ida ne’e importante tebes ba Timor-Leste nia istoria, tanba juventude Loriku As’wain sira oferese an no hakilar ba mundu katak Timor-Leste Mate ka moris untuk rasik an.
“Loron ohin mak loron importante tebes iha ita nia istória luta ba libertasaun nasionál. Iha tinan 34° liuba, ita nia juventude Loriku As’wain ho determinasaun tomak hosi espíritu luta ba Ukun Rasik An nian, oferese an hakilar ba mundu tomak, katak Timor-Leste Mate ka Moris Ukun Rasik An,” dehan Eis Prezidente Repúblika (PR) Taur Matan Ruak, Iha komunikadu Imprensa ne’ebe Neon Metin asesu husi Media Ofisiál Taur Matan Ruak, Kuarta 12/11.
Nia haktuir, iha okaziaun ida ne’e, Timor-Leste komemora mós hanesan Loron Nasionál Juventude nian, tanba ne’e konvida juventude sira hotu atu reflete heroismu ne’ebe juventude sira uluk husik hela mai Timor-Leste, juventude sira uluk hatudu domim no sakrifisiu responsabilidade no dame ba rai Timor-Leste.
“Hanesan Líder ida, ha’u hakarak konvida juventude hotu-hotu atu hamutuk reflete ho profundidade kona-ba ezemplu heroismu ne’ebé ita nia juventude sira uluk husik hela. Sira hatudu ba ita kona-ba domin, sakrifísiu, responsabilidade no dame ba rai doben Timor-Leste. Mártires sira hosi Santa Cruz no heroi sira seluk mate, atu ita bele hetan Ukun Rasik An. Sira sakrifíka moris, atu ita bele moris iha dame, atu ita bele hamutuk hadomi no hadi’ak ita-nia nasaun ne’ebé ita hotu hadomi,” esplika Taur Matan Ruak.
Nia salienta, tanba ne’e juventude ohin loron nian tenke komunga valor sira ne’ebé juventude sira uluk defende iha loron 12 Novembru 1991.
“Ha’u apela ba imi hotu, aproveita imi nia tempu jovem hodi esforsu an estuda, estuda no estuda, tanba Timor-Leste presija jovem matenek atu muda rai ida ne’e tanba futuru Timor-Leste iha imi nia liman,” nia subliña.
Nia afirma “Ha’u konvida imi atu ita reflete hamutuk liafuan famozu ida dehan: “Sa’ida mak ha’u bele halo, no sa’ida mak hau bele fó ba ha’u nia nasaun”.
Tanba ne’e Timor-Leste sei hasoru dezafius oioin maibé ne’e la’os obstaklu, “bainhira ita haree esperiensia husi nasaun sira ne’ebé independente ona iha tinan barak, hanesan timoroan ita hotu tenke orgullu, katak ita la’os Nasaun ida ne’ebé di’ak liu iha mundu maibé mós la’os Nasaun ida ne’ebé at liu”.
Nia mos apela ba Timoroan tomak, liu-liu ba juventude, kontinua kontribui ba dame no estabilidade, “atu ita-nia rai sagrada ne’ebé ita hotu hadomi ne’e loron ida bele sai nasaun ida modernu, próspero no iha fatin ba timoroan hotu”.
