{"id":1461,"date":"2019-11-24T14:34:51","date_gmt":"2019-11-24T14:34:51","guid":{"rendered":"https:\/\/neonmetin.info\/buletin\/?p=1461"},"modified":"2019-11-24T14:34:51","modified_gmt":"2019-11-24T14:34:51","slug":"estudante-prizoneiru-politiku-companheiro-la-sama-parte-1","status":"publish","type":"post","link":"https:\/\/neonmetin.info\/buletin\/2019\/11\/24\/estudante-prizoneiru-politiku-companheiro-la-sama-parte-1\/","title":{"rendered":"Estudante-Prizoneiru Politiku: Companheiro La Sama (Parte 1)"},"content":{"rendered":"

Husi: Carlos da Silva L.F.R. Saky<\/strong><\/em><\/p>\n

Ohin, loron 24 fulan Novembru 2019, kompleta tinan 28 militar Indonezia sira kaer Companheiro saudozu Fernando de Araujo \u201cLa Sama\u201d, iha Denpasar, Bali. Ami hatene, kleur ka lais, militar sira sei kaer nia. Ami simu informasaun husi Companheiro Adolfo Fontes, nebe iha tempu neba nudar Ketua IMPETTU Bali. Adolfo fo hatene ami, liuliu ami na\u2019in haat (La Sama, Agapito, Marciano no autor) nebe uluk husu azilu politiku iha embaixada Japaun no Vatikanu iha Juinu 1989, katak militar sira halo planu ona, no la\u2019o ho ami nia fotu atu kaer ami. Lalembra ona, sa loron mak hetan Informasaun ne\u2019e, lembra deit simu informasaun husi Adolfo depois de massacre Santa-Cruz 1991, militar sira deskonfia RENETIL iha manifestasaun 12 de Novembru nia kotuk.<\/p>\n

Hafoin manifestasaun 12 de Novembru, aumenta tan ho manifestasaun 19 Novembru 1991, aselera prizaun ba Companheiro La Sama nebe nudar Sekretariu-Jeral RENETIL nian. Ami simu nafatin informasaun husi Companheiro Adolfo Fontes katak, planu militar sira nian atu kaer ami sei akontese iha tempu badak. Tanba ne\u2019e, nia husu ami atu sees husi Denpasar. Bazeia ba informasaun sira ne\u2019e, iha loron 22 fulan Novembru 1991, Companheiro La Sama bolu autor ba iha Taman Sari, iha fatin nebe sira hela ba, nia husu autor, tenki sai husi Denpasar kedas, hodi militar sira labele kaer hotu ami hodi bele kontinua luta. Iha Taman Sari, saudozu La Sama dehan nune\u2019e ba autor:<\/p>\n

\u201cSaky, se o hakarak kontinua ita nia funu, diak liu o tenki sai husi ne\u2019e ohin kedas, se lae militar sira sei kaer hotu ita. O tenki sai, husik hau hela ho massa estudantes sira, se sira kaer karik, hau assume responsabilidade tomak hodi sira labele kaer estudantes sira seluk\u201d.<\/em><\/p>\n

\u00a0<\/em>Companheiro La Sama ema ida simples, kalmu, brani, konsistente, dedikadu, determinadu no entrega-an tomak ba luta. Buat hirak ne\u2019e hotu bele haree husi ninia hahalok sira. Hafoin autor sai tiha husi Denpasar, Companheiro Adolfo Fontes sei husu nafatin atu nia sees husi Denpasar, mezmu iha kalan molok kaer nia, maibe Companheiro La Sama lakohi sees, nia hakarak husik nia-an ema kaer hodi responsabiliza ba aktividades no asaun tomak nebe RENETIL halo hodi militar sira labele kaer kuadrus no militantes sira seluk.<\/p>\n

Autor husik hela Denpasar iha loron 22 fulan Novembru, liu loron rua, militar Indonezia sira kaer Companheiro La\u2019Sama hamutuk ho sira hotu nebe hela iha Taman Sari. Iha loron ida antes, autor sei konsege koalia ho nia husi telephone. Iha loron 24 dader, autor telefone hikas ba Denpasar, atu informa ba nia katak, ami labele liu ba Jakarta, tanba seguransa metin. Laiha ema ida mak simu telephone, afinal militar sira kaer tiha ona La Sama ho sira hotu nebe hela iha uma Taman Sari.<\/p>\n

Autor sai ba Java acompanha husi Companheiro Julio Abel, fundador RENETIL seluk. Ami liu ba Solo, tanba Companheiro Quintiliano Mok ho Afonso Leong, hein ami iha neba, atu ami ba Jakarta hamutuk. Ba Jakarta ho objetivu atu hamutuk ho Companheiro Soro hodi tama iha embaixada sira, hodi ijiji libertasaun ba estudantes sira nebe prezu ona tanba halo manifestasaun iha 19 Novembru 1991, nune\u2019e mos hodi ijiji libertasaun ba kuadrus klandestinas no jovens ativistas sira nebe prezu tanba manifestasaun 12 de Novembru 1991. Nunee mos ijiji ba Indonezia hodi entrega ba familia sira, mate isin hosi jovens sira nebe sira tiru mate ka oho iha manifestasaun ne\u2019e. Maibe to\u2019o iha Solo, ami labele liu ba Jakarta tanba simu informasaun hosi Jakarta, husu ami labele ba Jakarta tanba seguransa metin.<\/p>\n

Saudozu La Sama sente iha responsabilidade direktu ba manifestasaun 12 de Novembru 1991 iha Dili no manifestasaun 19 Novembru 1991 iha Jakarta, tanba nia rasik halo kontaktu mai Dili, koalia ho Companheiro Egas Alves, militante RENETIL ida, atu koalia ho estrutura CE\/FC nian, hodi halo asaun ruma, aproveita Piter Kooijmans, Enviado Especial ONU nian ba Direitos Humanos, nebe halo hela vizita iha Timor.\u00a0 Enkuantu manifestasaun 19 Novembru 1991 iha Jakarta, tanba desizaun ba manifestasaun ida ne\u2019e hola iha Denpasar, hola kedas iha loron nebe akontese masakre 12 de Novembru 1991. Ho desizaun ne\u2019e mak RENETIL haruka Companheiro Agapito Cardoso hodi sai kedas iha loron ne\u2019e hosi Denpasar, hodi ba hamutuk ho Companheiro Jo\u00e3o \u201cTravolta\u201d de Araujo, nebe ba uluk ona iha Semarang, atu hamutuk ho dirijentes no kuadrus RENETIL sira seluk iha Java, hodi mobiliza estudantes sira ba Jakarta. Alein de ida ne\u2019e, Companheiro La Sama mos kontaktu ho Companheiro Soro no Companheiro Jo\u00e3o Freitas da Camara hodi mobiliza mos estudantes sira ba asaun ne\u2019e.<\/p>\n

Iha biban ne\u2019e existe organizasaun rua iha Indonezia, RENETIL no FECLETIL. Tanba ne\u2019e, iha asaun ne\u2019e, em vez de uza organizasaun nia naran, deside uza naran Movimento Nacionalista Juventude Timorense. Tanba naran ida ne\u2019e kria hodi uza deit iha asaun ida ne\u2019e, mak asaun ne\u2019e hotu, naran ida ne\u2019e mos lakon.<\/p>\n

Biar planu inisial la konsege halo, tuir Companheiro La Sama nia hakarak, tanba ami labele liu ba Jakarta hanesan temi ona iha leten, maibe durante tinan 3 subar iha Java, autor hamutuk ho companheiros lubun ida iha Java, konsege halo reorganizasaun no reestruturasaun fila fali ba RENETIL nebe desmanteladu ho prizaun Companheiro La\u2019Sama ho kuadrus RENETIL sira seluk nian. Importante tebes reorganizasaun no restruturasaun ba RENETIL hodi kontinua luta. Reorganizasaun halo iha 1992.<\/p>\n

Liu tiha tinan 3 husi prizaun saudozu La Sama nian, iha loron 12 fulan Novembru 1994, autor hamutuk ho jovens no estudantes 28, konsege tama no okupa embaixada dos Estados Unidos da Amerika iha Jakarta, no 40 resin militar sira kaer iha Estasaun Komboiu Pasar Senen, Jakarta. Okupasaun embaixada Amerika nian halo iha vespera Simeira APEC nebe halo iha Bogor. Ho okupasaun embaixada Amerika nian iha 1994, foin autor hamutuk ho Companheiros sira seluk sai ba Portugal no harii Dire\u00e7\u00e3o Geral Autonoma da RENETIL no Exterior (DIGAREX) hodi kontinua luta, tuir Companheiro La\u2019Sama nia hakarak (kontinua ba parte 2).<\/strong><\/em><\/p>\n

 <\/p>\n","protected":false},"excerpt":{"rendered":"

Husi: Carlos da Silva L.F.R. Saky Ohin, loron 24 fulan Novembru 2019, kompleta tinan 28 militar Indonezia sira kaer Companheiro saudozu Fernando de Araujo \u201cLa Sama\u201d, iha Denpasar, Bali. Ami hatene, kleur ka lais, militar sira sei kaer nia. Ami simu informasaun husi Companheiro Adolfo Fontes, nebe iha tempu neba nudar Ketua IMPETTU Bali. Adolfo […]<\/p>\n","protected":false},"author":3,"featured_media":1462,"comment_status":"open","ping_status":"open","sticky":false,"template":"","format":"standard","meta":{"om_disable_all_campaigns":false,"_monsterinsights_skip_tracking":false,"_monsterinsights_sitenote_active":false,"_monsterinsights_sitenote_note":"","_monsterinsights_sitenote_category":0,"amp_status":"","footnotes":""},"categories":[30],"tags":[],"class_list":["post-1461","post","type-post","status-publish","format-standard","has-post-thumbnail","hentry","category-memoria"],"aioseo_notices":[],"aioseo_head":"\n\t\t\n\t\n\t\n\t\n\t\n\t\n\t\n\t\t\n\t\t\n\t\t\n\t\t\n\t\t\n\t\t\n\t\t\n\t\t\n\t\t\n\t\t\n\t\t\n\t\t\n\t\t\n\t\t\n\t\t\n\t\t\n\t\t