{"id":8609,"date":"2021-05-27T21:43:45","date_gmt":"2021-05-27T12:43:45","guid":{"rendered":"https:\/\/neonmetin.info\/buletin\/?p=8609"},"modified":"2021-05-27T21:45:06","modified_gmt":"2021-05-27T12:45:06","slug":"inundasaun-fo-impaktu-ba-agrikultor-iha-laclubar-marcelina-besik-fulan-2-la-faan-iha-merkadu","status":"publish","type":"post","link":"https:\/\/neonmetin.info\/buletin\/2021\/05\/27\/inundasaun-fo-impaktu-ba-agrikultor-iha-laclubar-marcelina-besik-fulan-2-la-faan-iha-merkadu\/","title":{"rendered":"Inundasaun Fo Impaktu Ba Agrikult\u00f3r Iha Laclubar, Marcelina: Besik Fulan 2 La Faan Iha Merkadu"},"content":{"rendered":"\n

Reportajen Adroaldo \u2018Saretukau\u2019<\/em><\/strong><\/p>\n\n\n\n

Siklone Seroja ne\u2019eb\u00e9 akontese iha 4 Abril, fo impaktu boot ba komunidade nia moris iha Aldeia Lakenu, Suku Manelima, Postu Administrativu Laclubar, liu-liu ba sira nia plantasaun ne\u2019ebe sira kuda ai-horis no ai-fuan, no sira labele lori ba faan sira nia produsaun iha merkadu.<\/p>\n\n\n\n

Jornalista Neon Metin hare besik komunidade agrikult\u00f3r sira nia situasaun katak ai-han ne\u2019ebe sira kuda, hodi tulun sira sustenta sira nia uma laran, balun ba faan iha merkadu maibe realidade produtu agr\u00edkola sira sai aat hotu tanba inundasaun boot no rai monu.<\/p>\n\n\n\n

Ba situasaun ne\u2019e Neon Metin dadalia ho komunidade Marcelina de Jesus hosi Aldeia Lakenu, Suku Manelima konab\u00e1 dezastre ne\u2019eb\u00e9 afeita ba sira nia moris. Ba Neon Metin Marcelina hatete dezastre ne\u2019eb\u00e9 akontese kauza hosi Siklone Seroja, estraga hotu sira nia ai-horis ne\u2019eb\u00e9 sira kuda, nune\u2019e oras ne\u2019e sira labele ba ona merkadu.<\/p>\n\n\n\n

\u201cFulan ne\u2019eb\u00e9 mak liu ba ne\u2019e udan aat, ne\u2019eb\u00e9 ami nia kaf\u00e9 bee lori hotu, ai-fuan foho ida ne\u2019e ai-farina iha lara, lakeru, talas makerek, talas olandes, coby, tua, kami, has be lori hotu, hedan ne\u2019eb\u00e9 ami hodi human sasan mos bee lori hotu\u201d,<\/em> hateten Marcelina ba Neon Metin iha nia Knua Lakenu, 20\/05.<\/p>\n\n\n\n

Agrikult\u00f3r  ne\u2019e hateten hafoin akontesimentu iha momentu ne\u2019eb\u00e1, oras ne\u2019e sira la ba haknauk ona sasan iha merkadu tanba hetan moras, produtu atu fa\u2019an mos hetan estragus hotu. Akontesimentu ne\u2019e mos halo nia hetan dezastre monu-tun wainhira lori produtu ba fa\u2019an iha merkadu. \u201cAmi fa\u2019an lakeru sira ne\u2019e, hudi, ne\u2019e de\u2019it buat seluk la iha\u201d.<\/em><\/p>\n\n\n\n

Marcelina husu ba governu atu fo apoiu ruma ba sira, tanba oras ne\u2019e sira nia fontes hahan no rendimentu laiha, \u201cIta bele ajuda hela ami nia lia-fuan ba letene (na\u2019i ulun sira), tanba ami terus, merkadu ami la ba ona, fulan rua nia laran, tanba akontese ne\u2019e ami la la\u2019o sai ida\u201d.<\/em><\/p>\n\n\n

<\/p>\n

Iha parte sorin Xefe Suku Manelima Jorge Soares via telefone ba Neon Metin hateten katak, hafoin dezastre estraga komunidade sira nia uma no mos plantasaun, ho nune\u2019e problema tebes ba komunidade ni-nia moris.<\/p>\n

\u201cKomunidade sira hasoru problema iha inundasaun afeita ba uma, parte ida mos afeita ba to\u2019os no plantasaun sira. Ida afeta ba uma mais ou menus estadu hori-bain hirak ne\u2019e apoiu netik hanesan sasan emerj\u00e9nsia ba sira, mais liga fali ba to\u2019os no plantasaun sira la hetan buat ida, ne\u2019eb\u00e9 ita haree ba mai sira ne\u2019e hasoru hela problema boot ida,\u201d<\/em> hateten Xefe Suku Manelima Jorge.<\/p>\n

Lider komunit\u00e1riu ne\u2019e hateten tuir arrolamentu iha nia suku, komunidade sira ne\u2019eb\u00e9 hala\u2019o atividade neg\u00f3siu iha merkadu tantu iha Postu Laklubar to\u2019o iha D\u00edli, barak liu ho produtu tua Sabu, tuir fali mak kaf\u00e9 nomos ba ai-fuan sira hanesan fehuk, talas, ai-farina no ai-fuan sira seluk, maib\u00e9 oras ne\u2019e sira nia asesu ba merkadu la hanesan antes dezastre.<\/p>\n

\u201cSira ba nafatin merkadu maib\u00e9 lahanesan uluk ne\u2019eb\u00e9 sira seidauk hasoru dezastre ne\u2019e, tanba hanesan ba ai-fuan sira ne\u2019e, balu rai halai, rai taka, ne\u2019e sira lakon total tiha. Ida fali halai ba tua sabu, tua sabu ne\u2019e iha Laclubar maioria balu ko\u2019a, balu ba fa\u2019an, entaun ida tua hun ne\u2019e mak rai halai, rai taka tomak tiha sira nia tua, sira la halo ona (tu\u2019a na\u2019in la ko\u2019a ona)\u201d, <\/em>hateten Jorge.<\/p>\n

<\/p>\n

Iha parte seluk konab\u00e1 estrada Xefe Suku informa katak, oras ne\u2019e estrada iha kondisaun di\u2019ak tanba nia hamutuk ho komunidade sira hadi\u2019a tuir sira nia kbiit, hodi transporta apoiu emerj\u00e9nsia tama ba Suku Manelima. Maib\u00e9 tuir observasaun Neon Metin iha terenu notak katak, estrada hosi Manelima antiga (Manelima lama) ba Postu Laclubar grave tebes, susar ba ema no transporte tradisional Kuda atu liu, tanba ne\u2019e komunidade sira liu de\u2019it hosi dalan korta ki\u2019ik, nune\u2019e difikulta tebes sira asesu ba merkadu komunit\u00e1riu iha postu Laclubar.<\/p>\n

Enkuantu merkadu komunit\u00e1riu iha Postu Adminisrativu Laclubar kada semana dala rua mak Domingu ho Kinta. Hosi Suku Maneliman rasik komunidade sira atu to\u2019o ba merkadu refere kuaze oras ida no balu oras ida liu.<\/p>\n

<\/p>\n

<\/p>\n

<\/p>\n

<\/p>\n

<\/p>\n