Reportazen Zevonia Vieira
Relasiona ho pasiente COVID-19 ne’ebe ho situasaun grave nain 1 no moderadu nain 3 iha sala isolamentu Vera Cruz, liu hosi komunikadu imprensa hosi Centro Integradu Jestaun Krize (CIJK), informa katak kazu grave nain ida ho moderadu nain 3 iha fatin Izolamentu Vera Cruz, kontinua hetan atensaun husi ekipa medika no sira nia kondisaun estável.
Iha komunikadu imprensa mos CIJK apela katak maski atividade prevensaun no mitigasaun ba surtu COVID-19 iha Munisipiu Dili konsentra-liu iha Postu Administrativu Dom Aleixo, Vera Cruz, Nain Feto ho Crsito Rei, iha Postu Administrativu Metinaru no Ataúro, nafatin hala’o atividade vijilánsia sentinela ho rastreiru aleatóriu ba grupu risku.
Husi loron 1 Marsu to’o 31 Marsu 2021, Postu Administrativu Metinaro rekolle 78 amostras ba teste PCR, no Postu Administrativu Ataúro rekolle 306 amostras. Rezultadu husi Postu Administrativu rua ne’e negativu hotu kedas.
CIJK mos kontinua apela ba komunidade iha fatin ne’ebé maluk sira rekuperadu sira hela bá, atu labele tauk, labela halo diskriminsaun ba sira, tamba sira ne’ebé sai husi fatin izolamentu, ekipa saúde sira sertifika ona katak sira la iha ona risku atu hada’et-tutan virus ba ema seluk.
Apela ba populasaun Timor-Leste tomak, liu-liu iha Munisipiu Dili, Baucau ho Viqueque atu nafatin hakmatek, lalika sé tilun ba lia-anin ka rumores, pratíka nafatin medida sira hanesan uza maskara, fase liman beibeik ho sabaun ka dezinfetante ruma, evita kose liman ba matan, inus ho ibun, wainhira kumprimenta malu, lapresiza ka’er liman, bensa-liman, rei-malu ka haku’ak malu, evita halibur malu barak, hamri’ik ka tur do’ok husi ema seluk no mínimu metru ida ho balun.