Reportajen Estajiada Agustinha Amaral
Prezidente Repúblika (PR), Dr.Jose Ramos Horta agradese ba Estadus Unidus Amérika (EUA) liu hosi ajénsia ba dezenvolvimentu internasionál (USAID), tanba kontinua apoiu Timor-Leste nia dezenvolvimentu iha tinan 20 nia laran, no oras ne’e sira iha apoiu iha setór seguransa alimentár.
Horta dehan ho programa seguransa alimentár ne’e bele ezekuta di’ak, nune’e bele iha impaktu liu-liu ba povu iha zona rural sira.
“Problema durante ne’e tanba durante tinan 20 nia laran la iha governu ida ne’ebé tau agrikultura konabá seguransa alimentar hanesan prioridade númeru ida, ita bele iha nasaun forte ida se ita laiha 100% ba seguransa alimentar, laiha nasaun forte ida totalmente 100% soberanu iha agrikultura, iha bee mos, iha nutrisaun,” dehan Prezidente Horta iha City 8 Manleuna, 31/01
Xefe Estadu ne’e, husu ba parseiru internasional sira hotu konsentra liu ba agrikultura, bee mos no saneamentu, lalika lakon tempo ho buat seluk, liu-liu konsentra ba ha agrikultura no dezenvolvimentu rural.
Nia dehan, ita tau osan boot liu ba perdiem, tau osan boot liu ba setsa bázika maibé sira la tau sufisiente ba agrikultura nomos ba Ministériu seluk mos no nia dehan la’os Ministériu Agrikultura sira mak responsabilidade fo osan ba Agrikultór sira, maibé ne’e setór seluk hanesan banku, mais banku labele karega funan todan demais 10 out 8%, funan ne’e sei la aguenta, agrikultor tenki iha subsídiu husi estadu, impresta husi banku. “Ha’u hatene de’it mak tinan 20 nia laran agrikultura, seguransa alimentar larezolve, ki’ak barak ba nafatin,” tenik Xefe Estadu.
Iha fatin hanesan, Diretór Jerál USAID, Gillian Caldwell esplika, “Estadus Unidus Amerika, sente orgullu atu fornese fundu foun tokon US $4 ba povu Timor-Leste liu husi USAID hodi ajuda hasoru situasaun krize boot ba seguransa ai-han iha ita nia tempu ida agora. Rekursu hirak ne’e sei proteje família Timoroan husi krize ai-han ne’ebé sei at liu tanba funu iha Ukránia no ajuda harii seguransa ai-han no nutrisaun ba tempu naruk,” Sublina Caldwell.
Entertantu, programa ne’e, apoia fundus husi USAID no servisu hamutuk ho FAO, (Organizasaun Nasoens Unidas ba Ai-Han no Agrikultura) hodi implementa liu husi Ministeriu Agrikultura no Péska to’o tinan 2024 ho projetu pilotu alvu ba munisípiu Aileu, Ainaro, Baukau, Bobonaro, Covalima, Ermera, Lautém, Manatuto, Manufahi, no Viqueque.