Reportajen Silvino Freitas
Relasiona vizita Prezidente Repúblika, Dr. José Ramos Horta iha munisípiu Baucau, ne’ebé hato’o agradesimentu ba kuadru no estrutura sira husi CNRT, ne’ebé esforsu no apoiu ba kandidatura, nu’udar asaun agradesimentu, maibé deputadu bankada Partidu Demokrátiku (PD) lamenta ho hahalok ida ne’e no konsidera la di’ak.
Xefe Bankada CNRT, Patrocinio Fernandes hateten bainhira Prezidente hala’o asaun, nia iha ona opiniaun rasik hodi agradese ba estrutura CNRT, ne’ebé esforsu ba nia kandidatura ba Prezidente Republika nian, tanba ne’e la’ós katak halo konsolidasaun ba partidu.
“Derepente de’it Prezidente ba ne’ebá no estrutura sira hala’o konsolidasaun, nia tuun minutu 2 hodi fó de’it agradesimento ba estrutura ne’ebé servisu makaas ba nia kandidatura, hodi lori nia ba Ai-tarak laran” dehan Patrocinio iha PN, (10/04).
Nia dehan asaun Prezidente Horta nian hatudu katak, lideránsa ida ne’ebé hatene agradese ba ema seluk nia kontribuisaun, ne’e la hanesan ho sira seluk ne’ebé CNRT apoiu tiha, maibé fila trai no nega fali partidu ne’ebé ho mákina partidu servisu makaas ba nia kandidatura.
“Ema sira 300.000 resin ne’ebé fo votu ba nia hodi tuur iha ai-tarak laran ne’e la’ós prezidente nia oan, ne’ebé atu fó de’it liafuan agradesimentu simples ida ba de’it ema sira servisu mate an, hetan atake no insultu sira ne’e la’ós prezidente nia oan” nia dehan.
Entretantu fatin hanesan atuál sekretáriu jerál no Deputadu bankada Partidu Demokrátiku (PD) Antonio da Conceição “Kalohan” iha nia intervensaun, lamenta ho asaun ne’ebé Prezidente hala’o iha Baucau, maski nia rasik vota no halo kampaña ba nia kandidatura, maibé hahalok ida ne’e la dun di’ak no bele provoka reasaun oioin.
“Hau mós lamenta uitoan se karik ha’u haree de’it fotografia sira mós la dun di’ak, ha’u nia Prezidente ne’ebé ha’u vota no halo kampaña rasik, Prezidente halo hanesan ne’e la dun di’ak” Antonio lamenta.