Reportajen David Da Costa
Provedor Direitu Umanu no Justisa, (PDHJ), Virgilio Da Silva Guterres “Lamukan” rekoinese katak, iha tinan XXV nia laran ne’e, dala ruma PDHJ ninia servisu ne’e, seidauk sufisiente atu bele defende povu maubere ninian direitu umanu, ne’ebé mak haktuir iha konstituisaun RDTL, maibé PDHJ sei esforsu atu bele hakonu povu maubere nian direitu.
“Ami rekonese, maibé sei haka’as aan atu halo esforsu masimu oinsa atu depende no proteje direitu umanu ninia,” dehan Provedor Direitu Umanu no Justisa, Virgilio Da Silva Guterres “Lamukan” liuhusi Konferensia Imprensa iha edifísiu PDHJ Kaikoli, Kinta 29/08.
Provedor Direitu Umanu i Justisa, (PDHJ), Virgilio Da Silva Guterres, hateten, Aban 30 Agostu, Estadu, Governu no ema hotu-hotu komemora loron referendu ninian ba dala-XXV, tanba ne’e PDHJ hakarak hamutuk ho povu hakruk ba eroi no as’wain sira ne’ebé maka luta, sakrifika sira nia aan, haraun sira nia ruin no raan atu lori mai to’o iha 1999 hodi fó oprtunidade ba atu deside no loke dalan ba ukun rasik kaan.
“Hakarak hahi no hanain ba povu maubere ne’ebé-ke vota ho aten brani, iha tinan XXV liu ba, votus ne’ebé-ke halo ita hotu loke dalan atu ita ohin loron sai nasaun indepedente, RDTL.Tanba ne’e PDHJ hakarak fó votus kongratula, korajen, determinasaun ne’ebé maka povu maubere foti iha 30 agostu 1999 hodi deside Timor nian indepedensia,” haktuir Provedor Virgilio.
Alende ne’e mós, nia dehan, PDHJ ne’e estadu mak hari atu defende direitu umanu. Tanba ne’e, PDHJ hakarak hato’o apresiasaun simples ba Nasoen Unida, ne’ebé maka nia sekretariu Jeral ONU Antonio Guterres mai vizita Timor-Leste. Tanba ne’e liuhusi meiu ida ne’e, ba inpenho ne’ebé maka Nasoen Unida halo iha tinan XXV liu ba, atu bele faselita povu maubere hodi bele ba deside sira nia destinu.
Nune’e mós PDHJ hato’o nia apresiasaun no profunda ba solidariedade internasional ne’ebé hamutuk ho povu maubere luta durante tinan XXIV hodi hetan nian indepedensia, balun mate ona, balun sei moris, maibé PDHJ nia apresiasaun profunda ba sira hotu.