Reportajen Silvino Freitas
Asosiasaun Jornalista Timor-Leste (AJTL) fo solidariu hodi husu justisa ba jornalista estranjeiru nain lima maka Greg Shackleton, Tony Stewart, Gary Cunningham, Brian Peters no Malcom Rennei ne’ebe militar Indonesia sira oho iha postu administrativu Balibó, nune’e governu Timor-Leste no Australia tenke hakbesik an ba governu Indonesia tanba trajedia husi omesidiu ne’ebe militar Indonesia halo ba jornalista estranjeiru nain 5 ne’e marka hela moras tanba omesidiu nee halo ona ba tinan 50 maibé laiha justisa katak governu Indonesia seidauk responsabiliza ba aktu neebe sira nia militar komete ka oho fali jornalista ne’ebe laos inimigu no amigu ba parte ida.
Reprezentante AJTL Acacio Pinto dehan, komemorasaun tinan 50 trajedia Balibó laos deit lembransa maibé marka mos jornalista nain lima nia aten-brani hodi deskobre lia loos husi reportajen kona-ba planu invazaun militar Indonesia mai Timor-Leste iha tinan 1975, jornalista estranjeiru nain 5 ne’e hakbesik an mai estadu Timor-Leste nune’e sira nain 5 mos kontribui ba ukun rasik an Timor-Leste nian.
“Husi ema timoroan sira ne’ebe deve sira nia servisu no obra jornalistika nian sira iha Balibó sidade kiik ida iha zona fronteira Timor-Leste no Indonesia nian” dehan reprezentante AJTL Acacio Pinto liuhusi konferensia imprensa iha sidade liberdade iha postu Balibó, (16/10).
Nia dehan tan, jornalista nain lima neebe mate iha Balibó marka importantasia ba direitu umanu ho umanidade la ho fronteira, husi sira nain lima nia mate hanorin ita povu Timor-Leste, jornalista, ativista, autoridade seguransa no politiku sira kona-ba hateten lia loos defende direitu umanu no umanidade, jornalista nain lima nia mate marka hela marka ho moras tanba laiha justisa ba sira iha tinan 50 liu ba tanba autor sira ne’ebe oho jornalista nain 5 ne’e la hetan dadur liuliu ofisila militar Indonesia ne’ebe involve iha asaun omesidiu refere.
“Komemorasaun tinan 50 ida nee mak oportunidade diak ba AJTL atu husu governu Australia no Timor-Leste atu uza sira nia meius diplomatiku hodi hakbesik an ba governu Indonesia hodi husu justisa ba jornalista nain 5 ne’ebe mate iha Balibó” konklui Acacio.