Reportajen Silvino Freitas
Movimentu Feto neebe involve iha grupu traballu advokasia kompostu husi Sagrada Familia, FOKUPERS, Rede Feto Timor Leste (RFTL), JSMP, Mane Vizaun Foun hatoo solidaridade ba aktu diskriminasaun husi superior Polisia Nasional Timor Leste (PNTL) ba komadante Suprentidente Xefe Julia da Gama iha prosesu promosaun diviza neebe realiza iha sabadu semana kotuk iha polisia academia komoro, nunee aktu neebe halo ba kamadante Julia da Gama nee atetude diskrinativu nune’e movimentu feto sira kontra atetude refere.
Prezidente Board FOKUPERS Maria Domingas Alvez ‘Micato’ dehan, promosaun diviza ba ofisial superior PNTL nee iha feto rua nunee sira respeita konstituisaun no estatutu PNTL nian no lei sira neebe iha maibe sira kontra atetude diskriminasaun tanba husi situasaun neebe sira haree iha feto nain rua maibe iha ida deit maka hetan promosaun no ida deklara ba situasaun neebe nia hetan kleur ona hetan diskriminasaun iha instituisaun PNTL nia laran, instituisaun neebe povu fiar atu halo seguransa ba nasaun.
“ami hamutuk iha nee atu solidariza ami nia maluk feto nee maibe ami mos apresia instituisaun neebe dezenvolve ona maibe tenke kurizi buat neebe sala dehan sala buat neebe loos ita avansa ba oin, iha prosesu luta ba ukun rasik an hanesan feto sente ona ho violasaun oioin tanba deit hakarak ukun rasik an no iha sira nia feto maluk barak neebe mate tanba hahalok sira nee, tanba nee sira lakohi iha tan violasaun ruma hasoru tan feto” dehan Prezidente Board FOKUPERS Maria Domingas Alvez ‘Micato’ liuhusi konferensia-imprensa iha FOKUPERS Faról, (26/03).
Micato haforsa tan, hanesan movimentu feto sei la nonok kuandu sira nia feto maluk ida lamenta ninia situasaun neebe nia koalia ona iha publiku nunee sira solidariza atu hametin no fo forsa ba feto maluk refere no sira hatene ona situsaun neebe nia deklara neebe konsidera laos desgarasa, tanba nee movimentu feto sira hotu pronto apoiu nia feto maluk hodi hakat ba prosesu justisa hodi buka lialoos ba sira nia feto maluk tuir deklarasaun neebe deklara ona ba iha publiku.
“iha tempu Indonesia deit FOKUPERS ho GFFTL ami la tolera violasaun hasoru feto sa tan ita indepedente neebe ita iha direitu no iha liberdade atu koalia lia loos, tanba nee mak ohin ami sente la diak la no tenke hateten lia loos no ami hakarak duni ho laran atu hadia ita nia instituisaun ida seguransa ba povu” dehan Micato.
Fatin hanesan Prezidente RFTL Zelia Fernandes dehan, sira elojia fuan boot ho korajen mana Julia Gama hodi fahe ona provas no faktus sira relasiona ho difisiensia sira iha instituisaun PNTL nian momentu refere sei inspira feto sira iha instituisaun sira seluk atu hateten sai buat sira neebe la dun diak maka la fo vantajen ba instituisaun, tanba nee sira solidariza komadante Julia Gama ba situasaun neebe nia hasoru no prosesu neebe Julia Gama atravesa presiza apoiu duni husi movimentu feto nunee sira pronto atu apoiu duni feto hanesan komadante Julia Gama hodi promove lia loos iha instituisaun neebe harii ho dezafiu oinoin.
“ami apresia tebes ba ami nia feto maluk sira no ami hakarak solidariza ami nia feto maluk sira neebe ba situasaun neebe sira hasoru, orikalan TVE fo sai entrevista ida diak tebes ho ami nia feto maluk Julia Gama neebe fo sai ona ninia insatisfasaun ba situsaun neebe nia rasik hasoru” dehan Prezidente RFTL Zelia Fernandes liuhusi konferensia imprensa iha FOKUPERS-Farol, (26/03).