Reportajen Umbelina dos Reis & Esajiariu Isac Sarmento
Durante ne’e Pasiente barak presiza tipu ran oin-oin, atu tulun sira rekopera hosi sira-nia moras, nune’e familia barak mos dezaraska buka ran iha fatin barak, maibé susar, inklui iha Banku de Sangue, tanba ne’e Cruz Vermelha Timor-Leste husu komunidade sira labele ta’uk no ho voluntariamente atu halo doasaun ran iha Banku de Sangue, nune’e ran turuk ida bele salva ema nia vida.
Vise Prezidente Cruz Vermelha Timor-Leste (CVTL), Marçal Freitas Magno hateten, Agradese tebes bá voluntariu sira ne’ebé mak durante ne’e haknaar aan ona hodi servi bá komunidade sira ne’ebé mak infrenta situasaun difisil iha baze, nune’e husu nafatin ba voluntariu sira nafatin kaer prinsipiu servisu ho fuan hodi servi komunidade sira ne’ebé iha area remotas.
“Ohin 08 de Maio ita komemora loro internasionál Cruz Vermelha iha mundu, 08 de maio 1828 fundadór Cruz Vermelha Sr. Zean Henri Dunant ne’ebé que iha momentu ne’ebá funu iha loron ida nia bele ajuda ema nain 4.000 resin, ohin iha mundu tomak nasaun 195 inklui Timor-Leste selebra loron ida ne’e hanesan loron Cruz Vermelha internasionál hodi relembra fila fali ita bá atende ema iha sosiedade nia leet konaba sofrimentu saida mak iha baze ne’ebé mak presiza Crus Vermelha nia tulun. ” dehan Vise Prezidente CVTL Marçal Freitas Magno, ba Jornalista sira iha Edifísiu CVTL, Formosa, sexta-feira, 08/05.
Nia dehan tan, CVTL halo ona kooperasaun ho banku de sange nune’e liuhusi komemorasaun loron Cruz Vermelha ida ne’e aproveita tempu fo oportunidade bá públiku voluntariamente mai halo doasaun ran hodi apoiu ba pasiente sira ne’ebé mak presiza ran iha Hospital Nacionál Guido Valadares(HNGV), tanba ne’e CVTL ho banku de sange nafatin halo kooperasaun hodi halo sosializasaun bá sosiedade sira atu bele halo doasaun ran hodi ajuda pasiente sira ne’ebé mak presija ran.
“CVTL nia voluntariu rihun hitu iha Timor-laran tomak servisu hamutuk ho banku de sangue ho Ministeriu saude , sosiedade sivil, F-FDTL, PNTL oinsá para buka ran maibé ema fó ran ne’e tauk entaun ohin ami hamutuk kooperasaun ho di’ak para la’o iha komunidade nia leet sosializasaun nafatin para komunidade labele tauk fó ran , ita tenke brani fó ran ba banco de Sange hodi sira fasilita bá familia sira ne’eb’e iha HNGV.” nia informa.
Entretantu tinan ida ne’e nia laran ema ne’ebé halo doasaun ran barak liu mak parte F-FDTL ho PNTL tanba ne’e rekomenda bá públiku iha teritoriu nasionál tomak atu labele tauk halo doasaun ran hodi tulun familia ne’ebé moras tanba ran turuk ida bele salva ema nia vida, nune’e nia dehan karik komunidade ne’ebé mak hakarak halo doasaun ran bele bá iha Banco de sange husi segunda feira to’o sexta-feira hodi halo doasaun ran voluntariamente.
Iha fatin hanesan Xefe Departamentu Banku de Sangue iha Hospitál Nasionál Guido Valadares (HNGV), Alexandrino Mendonca informa, objetivu husi doasaun raan ida ne’e hodi komemora loron mundiál Cruz Vermello internasionál nian, hanesan sira nia tema hatete, salva vida.
“Doasaun raan ne’e mak hola parte iha salva vida ida ne’e importante tebes imajina de’it bainhira ema ida raan fakar mak, raan la iha para salva nia entaun nia bele hakotu nia vida, ne’ebé vizaun ida ne’ebé ke CVTL tau iha ne’ebá aserta ho atividade doasaun raan ne’ebé mak sira halo iha ne’e.” dehan Xefe Departamentu Banku de Sangue HNGV, Alexandrino Mendonca.
Nia dehan, sctok raan ne’ebé dadaun iha Banku de Sangue, konserva ba hodi hala’o atendimentu minutu ba minutu no oras ba oras no loron ba loron, maibe raan sai tenke tama fali. Nune’e ekipa ohin dadersan atu halo doasaun ran hamutuk ema nain (81), ho tipu ran A ema nain( 22), tipu ran B (20) tipu ran AB (15), no tipu ran 0 (24).
“Totál raan ne’ebé mak ohin dadersaan ekipa sira relatá mai ami registu ne’e mak hamutuk 81%, tiru raan A 22, tipu raan B 20, tipu raan AB 15, no tipu raan O 24, ida ne’e mak dadaun ne’e ita konserva iha ne’ebá para hodi halo atendimentu ba pasiente sira ne’ebé mak presiza.” Nia dehan.
Nia akresenta, raan ne’e la permanente ho montante sira hanesan ne’e tanba komforme ba nesesidade husi doutór sira ne’ebé indika ba iha Banku de Sangue.
“Sé pasiente ne’ebé mak presiza raan barak entaun sai mós tenke barak, mais tenke kontinua nafatin família no voluntáriu sira mai nafatin halo doasaun raan para hodi garante katak sctok raan iha banku de sangue ne’e nafatin iha para atu atende no salva pasiente sira ne’ebé mak baixa iha Hospitál Nasionál Guido Valadares,”nia esplika.
Nia informa tuir dadus ne’ebé Banku de Sangue iha kada loron Banku de sangue sempre oferese raan plastiku hamutuk 40 ba sala sira ne’ebé mak iha Hospitál Nasionál Guido Valadares
Enkuantu iha timor ran ne’ebé barak liu mak ran tipu 0, A no AB ne’e mak presiza barak iha Timor-Leste no defisil liu mak tipu ran ne’ebé ligasaun ho negativu.
“No raan ne’ebé mak ita Timor presiza barak liu mak raan ho tipu O, tuir mak A, no B no ikus liu mak AB, no tipu raan ida ne’ebé mak difisil ita atu hetan mak tipu raan ligasaun ho negativu, maioria ema estranjeiru tolu raan insure negativu ne’e maioria ita Timor la iha, ita Timor maioria insure ne’e positivu hotu, maibé ita bele iha tipu raan A,B, AB no O ita hotu-hotu nia tipu raan mak ida ne’e mais tama ba resure ona, ne’e ita diferente ho parte seluk,” nia Konklui.
Entretantu tuir dadus ne’ebé iha voluntáriu husi Cruz Vermello Timor-Leste (CVTL) hamutuk na’in 30 mak halo doasaun raan hodi komemora loron mudiál Cruz Vermello Internasionál ba dala 198 iha mundu.