Reportajen Silvino Freitas
Eiz Prezidente da Repúblika saudozu Francisco Guterres ‘Lu-Olo’ nia oan ikun Dalia Luliana Nobre Guterres, espresa sentimentu ho triste liuhusi poezia ba nian aman nia mate hodi hateten nia fuan sei nurak no nia maun sira ne’ebe otas mos sei nurak presiza nia aman nia domin, maibe destinu ne’ebe haketak ona nia aman eis Prezidente da Repúblika saudozu Francisco Guterres ‘Lu-Olo’.
Ultimo abraço husi oan Dalia ba Papá,
Papá o foti ain husi uma, Papá la katak buat ida mai hau, iha aeroportu Papá fo deit hakoak ida no hamnasa furak ida, hodi halo hau laran metin, teki teki rona lian ida too mai hau tilun, katak hau tenke ba haree papa ho fuan ksolok no saudades hakarak loos atu too lalais atu ba haree no hakuak Papá.
Wainhira hau too iha neeba hau hateke ba Mamá nia mata wen mak sai, mama nia resposta, iha Mamá nia hakoak hau hetan resposta katak Papá laiha tiha ona, iha fuan rahun nia laran hau halai ba hakoak Papá maibé hau tarde tiha ona, hakarak rona Papá nia lian maibé Papá nia lian laek tiha ona.
Na’i hau fuan sei nurak hau neon ladauk metin hau maun sira mos sei kiik tanba ita boot lori nia sedu liu, iha tempu neebe ami sei presiza nia mak ami ai-mahon fatin sadere ami helik an ba iha udan no anin boot, hau saudades buat hotu kona-ba Ó Papá.
Hakoak ne’ebe halo hau senti kariñu, estima neebe halo hau seguru, hamnasa midar ne’ebe lori ksolok, Papá ó ba ho hamnasa fila ho matan been, hodi falun ami ho susar ho mata ween.
Ohin Papá nia fatin mamuk, Papá nia lian deit mos lakon iha uma maibe ó nia domin nafatin moris, iha memoria neebe ó husik iha ami idak idak nia fuan.
Papá iha leten aas ne’eba, kontinua harohan no hananu ba ami ho Mamá no ami iha ne’e harohan ba papa iha ne’eba, adeus adeus adeus Papá!
Poezia ne’ebe halo husi saudozu nian oan ikun ba nia aman nia falesimentu ne’ebe hatudu emosaun triste ba familia no parente liuliu labarik kiik sira hotu ne’ebe asisti serimonia funeral saudozu ‘Lu-Olo’ iha jardin dos eirois Metinaro sesta-feria 26/06/2026 hohsi hamonu mata-been, bainhira rona poezia husi Dalia Luliana Nobre Guterres.