Reportajen David da Costa
Governu, liuhusi Ministru Defeza Donaciano do Rosário Gomes, ohin loron Kuarta (01/07), aprezenta ba Konsellu Ministrus projetu konstrusaun Ospitál Militár Forsa Defeza Timor-Leste (F-FDTL), ne’ebe sei implementa liuhusi kooperasaun bilaterál ho Repúblika Populár Xina. Projetu ne’e ho objetivu atu reforsa sistema saúde militár, hadi’a kapasidade responde ba emerjénsia no krize umanitária,
Iha komunikadu ne’ebe Neon Metin sita husi websites Governu nian, Ministru Defeza, Donaciano do Rosário Gomes, halo aprezentasaun ida ba Konsellu Ministrus kona-ba projetu konstrusaun Ospitál Militár FALINTIL-Forsa Defeza Timor-Leste (F-FDTL), ne’ebe sei implementa iha kuadru kooperasaun bilaterál entre Timor-Leste no Repúblika Populár Xina.
Iha aprezentasaun ne’e, misaun téknika xineza ne’ebe responsavel ba serbisu preparasaun ba projetu ne’e aprezenta karakterístika prinsipál ba futuru Ospitál Amizade Timor-Leste-Xina, ne’ebe sei harii besik iha Ministériu Defeza no Kuartél-Jenerál F-FDTL, iha Dili.
Projetu ne’e inklui ospitál jerál ida ho kapasidade kama 100, área maizumenus metru kuadradu 10.500, edifísiu prinsipál ida ho andár ualu, no mós edifísiu apoiu sira, ne’ebe kompleta ho teknolojia médika moderna no preparadu atu fornese servisu konsulta esterna, kuidadu emerjénsia, internamentu, imajiolojia, análizes klínikas no kuidadu intensivu.
Nune’e mós halo mós aprezentasaun ida kona-ba kriasaun Komisaun Interministeriá ida hodi halo supervizaun no akompañamentu ba Konstrusaun Futuru Ospitál Militár nian.
Projetu estratéjiku ida ne’e ho objetivu atu reforsa kapasidade operasionál F-FDTL, komplementa servisu sira Servisu Nasionál Saúde nian, hadi’a resposta ba emerjénsia, katástrofe no krize umanitária.
Promove formasaun no dezenvolvimentu medisina militár, hamenus dependénsia ba tratamentu sira iha rai-li’ur, no mós fó benefísiu ba populasaun sivíl, hodi kontribui ba reforsu kapasidade nasionál iha área saúde no dezenvolvimentu ekonómiku nasaun nian.