Reportajen David da Costa
Ministru Interior (MI) apela ba membru Polísia Nasionál Timor-Leste (PNTL) hotu-hotu atu labele rai problema iha laran tenke ko’alia sai problema ba komdante sira atu nune’e labele foti desizaun ne’ebe bele lori ba konsekuénsia grave.
Ministru Interior (MI) Francisco da Costa Guterres, apela ba membru PNTL hotu-hotu atu kuidadu no labele rai problema pesoál iha laran to’o hamosu desizaun ne’ebe bele estraga an rasik ka ema seluk.
Tanba ne’e, bainhira membru ida hasoru problema, di’ak liu atu ko’alia ho nia komandante atu buka apoiu no solusaun. Dala barak ema rai de’it problema iha laran, ikusmai sente katak la iha dalan, no situasaun hanesan ne’e bele lori ba asaun ne’ebe la di’ak.
“Iha problema hakat mai atu resolve, brani ko’alia sai ba imi komadante para buka solusaun ba ida ne’e. Dala barak ita tau de’it iha ita nia laran, ita hanoin mundu ne’e hotu tiha ona ho ida ne’e maka ita buka fali meus hanesan ne’e,” dehan Ministeriu Interior (MI) Francisco da Costa Guterres ba Jornalsita sira iha Plásiu Governu, Kuarta 1/07.
Maski konsidera katak problema balu nu’udar asuntu privadu, Ministru husu ba komandu PNTL atu nakloke no prontu rona membru sira nia difikuldade, hodi ajuda sira buka dalan di’ak atu resolve problema ne’ebe membru sira hasoru.
“Ne’ebe husu ba membru polisia sira ha’u hanoin kestaun ida ne’e kestaun ne’ebe privadu sira nian, maibé husu nafatin ba sira katak kuandu iha problema rua karik iha komandu nakloke ba espoi sira nia problema ne’e, depois buka dalan para atu resolve,” nia hateten.
Kona-ba uza arma, Francisco da Costa Guterres klarifika katak membru polísia sira ne’ebe remata ona servisu tenke husik arma iha fatin ne’ebe determina tuir regulamentu, no labele lori fila ba uma. Enkuantu membru sira ne’ebe sei hala’o misaun ofisiál de’it maka kontinua lori arma durante exekuta knaar.
“Ba polisia sira ne’ebe maka oras servisu hotu ona, fila ba uma ne’e, sira husik hela arma fila iha uma. Mas sira ne’ebe iha misaun servisu hela, sira kontinua lori arama hela,” nia konklui.