Reportazen Francisco JDA
Tum-Tum hakat dadauk mai iha radio komunidade Tokodede Liquisa, ho musika moris ne’ebe toka, halo ekipa Neon Metin hakat hodi sae Tum-Tum ne’ebe Siku lori. Ekipa Neon Metin ho radio Tokodede hamutuk nain 5 hakat ba Maubara ho Tum-Tum ne’ebe siku lori ho koidadu.
Hamnasa ho kontente ida ne’e mak ekipa Neon Metin ho ekipa radio Tokodede sente, tanba sente oinseluk bainhira uza Tum-Tum. Muzika ne’ebe akompanha ami nia viazen mak When the Children Cry hosi White Lion.
Ho ritmu neneik Tum-Tum hakat ba Maubara, kuaze oras ida liu tenke to’o iha Maubara, bainhira muzika hosi Wihte Liona remata, ami kontinua rona muzika furak tuir mai hosi Indonesia nian konaba domin. Viajen ne’ebe furak tanba kontinua horong anin tasi ne’ebe fresku, dook hosi polusaun, dook hosi barullu no hamnasa ho komunidade sira ne’ebe lao tesik iha dalan ninin.
Iha viajen la haluha ami kontinua tesi lia ho Siku ne’ebe lori Tum-Tum, nia dehan lori Tum-Tum loron ida bele hetan to’o $10.00 to’o $15.00, depende sorte. Ema ida ho presu $0.25 cen, bele tula to’o ema nain 5.
Ami nia dadalia ho Siku sai furak liutan, bainhira komesa goja malu tanba musika sira ne’ebe mak Siku toka mesak konaba domin nian deit.
Neon Metin hakarak hatene klean liutan tanbasa Siku hakarak lori Tum-Tum hodi osan, ba Neon Metin Siku haktuir nia isotria.
“Ha’u lori Tum Tum hakarak ajuda apa ho ama sira, no osan ne’ebé ha’u hetan $1.00 ka $2.00, ha’u hola modo lori ba uma no osan balun fo ba alin sira ba eskola. Ha’u orgulho tebes lori Tum Tum tanba ha’u bele hetan osan, maske kole maibé ne’e la’ós dezafiu mai ha’u”, hateten Siku ho kalma.
Ba Neon Metin Siku hateten nia sai hosi uma oras tuku 8:00 dader to’o oras tuku 12:00, presiza fila ba uma tanba sei karega batria Tum Tum nian durante oras 4 nia laran.
Neon Metin ho ekipa radio Tokodede fila hikas hosi Maubara, hodi fila fali edifisiu radio Tokodede ho musika titlu Koalia Tok Mai ne’ebe agora viral los iha media sosial, ne’ebe composer hodi Abilio Salsinha, bainhira Siku hatun ekipa selu $15.00 ba nia, ho laran kontente Siku simu osan ne’e, no nia kontinua ba buka fali pasaseiro sira seluk karik loron ne’e, nia bele hetan $20.00
Siku serbisu ba ema, hodi lori Tum-Tum bainhira nia hetan $1.00 patraun sei selu nia $0.25 signifika, maske ho osan kiik maibe ida ne’e mak Siku bele halo iha nia moris.
Siku ho idade 24, uza sapeu kabuar ho koor silver sai nia identidade, Siku badinas buka pasaseiros hodi bele hetan netik osan. Siku nungka eskola iha nia mors, nia nungka asesu ba eskola, karik tanba inan aman presiza nia kbiit hodi kompleta nesesidade uma laran? Situasaun ne’e mak Siku hasoru no nia tenke lakon nia future hanesan joven sira seluk, ba Siku tulun nia inan aman importante liu, maske estadu fo importansia ema hotu hodi asesu edukasaun, maibe siku fo importansia liu ba nia familia nia moris, ida ne’e mak Siku kontribui.