Reportazen David da Costa Gusmao*
Relasiona ho numeru konfirmadu positivu COVID-19 iha Fatumea – Covalima sae ba neen, liu hosi konferensia imprensa Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araujo apela ba populasaun iha Fatumea atu labele paniku, tuur hakmatek iha ida-idak nia fatin, lalika la’o ba mai.
“Fo tempu ba ita nia ekipa saede ho ekipa konjunta husi sala situasaun, buka tuir ema ne’ebe kontaktu no foti tan amostra hodi bele halo test”, dehan Dr. Rui ba jornaista sira iha Centro Integradu Jestaun Krize (CIJK) iha CCD, 24/02.
Nia haktuir tan ba populasaun iha munisipiu Covalima no Bobonaro, liu-liu sira ne’ebe hela besik kedas liña fronteira atu labele hakat ba mai iha fronteira.
“Ita nia viziñu akontese ona tramisaun lokal no ita mos akontese dadaun hela transmisaun komunitaria”, nia dehan
Nia husu ba komunidade ho lider komunitariu sira, wainhira hatene karik ema ruma ne’ebe halo viajen atravesa fronteira ba nasaun seluk, no fila mai la aprezenta-an atu tama kuarentena, favor informa autoridade polisia ho pessoal saude nian, atu bele lori ema ne’e ba kuarentena.
“Hau husu ba populasaun iha Timor-Leste laran tomak, husi evidensia ne’ebe ita iha, maski transmisaun lokal ne’e sei restritu iha Suku Belulik Leten – Fatumea, ita hotu tenki alerta ba bei-beik, hodi pratika ho disiplina utilizasaun maskara, medidas ijiene pessoal, distansiamentu fiziku no evita halibur malu barak”, nia konklui
*(David da Costa Gusmao nudar estudante UNTL ne’ebe estajiu iha Neon Metin)