Reportazen David da Costa Gusmao
Ministeriu Saude (MS) liu husi Koordenador Forsa Tarefa ba Prevensaun no Mitigasaun Surtu COVID-19 iha Timor-Leste, detekta tan kazu foun nain 13 iha BTN II, Bebonuk no HNGV katak iha Tasi Tolu BTN II nain-9, Bebonuk nain-1 no iha Ospital Nasional Guido Valadares nain-3
Vise Koordenador Forsa-Tarefa ba Prevensaun no Mitigasaun Surtu COVID-19 iha Timor-Leste, Dr.Odete da Silva Viegas liu husi Konferensia imprensa informa ba jornalista sira katak progresu husi kazu ne’ebe detekta iha BTN II, Tasi Tolu suku Madoi, postu administrativu don Alexo, hafoin detekta kazu foun rua iha bairo BTN II, ekipa saude buka tuir ema ne’ebe kontaktu besik sira.
“Husi kazu rua ne’e ohin ita detekta tan kazu foun nain-9, husi kontaktu besik ho kazu husi funsionariu ida iha SEFOPE, ita mos detekta kazu foun 1, husi sample 28 ne’ebe mak foti iha Bebonuk”, dehan Odete ba jornalista sira iha CIJK, CCD 09/03.
Nia haktuir tan iha parte seluk ekipa konjunta Saude mos halo restreiu ba Ospital Nasional Guido Valadares detekta mos kazu foun nain-3, kazu nain-3 ne’e profesional Saude ida ho oan nain rua.
Nia hateten rezultadu Screening ba iha fatin sira ne’ebe detekta kazu pozitivu hanesan BTN II, SEFOPE, no mos Saniamentu. Total hamutuk 471 mak foti ona sample, iha SEFOPE foti amostra 28, detekta nain-9 mak pozitivu, husi kazu Bebonuk foti amostra 51, detekta ema nain-1 mak pozitivu.
Nia salienta iha HNGV iha ema nain-3 pozitivu ne’e, hodi kalan halo kedas Contact Tracing foti kedas hamutuk ema nain-32 maibe rezultadu negativu hotu.
“Ekipa konjunta saude iha terenu sei kontinua halo swab screening ba ema sira ne’ebe halo ona kontak ho sira sira ne’ebe pozitivu”, nia subliña.
Entretantu dadus actual ba zazu foun 13, rekopera laiha, no kazu ativu iha izolamentu hamutuk 48.