Reportazen Zevonia Vieira
Relasiona ona Serka Sanitaria relasiona ho Rezolusaun Governu Nº12/2021, 8 de Marsu iha Munisipiu Dili, liu hoi zoom conference ho jornalista sira, Koordenador Forsa-Tarefa ba Prevensaun no Mitigasaun Surtu COVID-19 iha Timor Leste, Dr. Rui Maria de Araújo informa katak iha rezolusaun ne’e hateten proibi ema atu tama sai husi Dili. Hotu-hotu tu’ur hakmatek iha fatin.
Dr. Rui hatutan autoridade ne’ebé bele autoriza ema nia movimentu sai husi no tama mai Munisipiu Dili maka Brigadeiro General Aluk, Diretor Centro Integrado Gestão de Crises.
Resolução Governo ne’e mós obriga sidadaun hotu iha sidade Dili, atu halo konfinamentu domisiliáriu jeral. Ida ne’e signifika, hela iha uma, labele sai. Sai deit wainhira presiza tamba moras, hola hahán, ou sira ne’ebé halo servisu esensiál
Dr. Rui dehan katak hahú horiseik, loron 13 Marsu, hamosu ona korredor abastesimentu ba sasán atu sai husi Dili, no tama mai Dili. Pedidu autorizasaun hotu tenki diriji ba Brigadeiru Jeneral João Miranda ‘’Aluk’’, Diretor Centro Integrado de Gestão de Crises- Sala de Situação.
Nia afirma ba populasaun katak tuir númeru 5, Rezolusaun Governu Nº12/2021, loron 8 Marsu, kona-ba serka sanitaria iha Munispiu Dili, ema bele pratíka desportu ka ezersisu fiziku individual, maibé labele la’o iha grupu durante ezersiziu, labele halibur malu durante ezersiziu, no labele mós pratika desportu em grupu, tamba aglomerasaun ka halibur malu iha grupu bele hamosu risku-bo’ot ba transmisaun moras COVID-19.
Dr. Rui konklui ba populsaun tomak liu-liu iha Munisipiu Dili ho Baucau, atu nafatin hakmatek. Maski kazu konfirmadu aumenta ba beibeik, no naklekar mós ona ba Munisipiu Baucau, husu atu tu’ur nafatin hakmatek, atu nafatin matan-moris neon nain, lalika sé tilun ba lia-anin ka rumores, pratíka nafatin medida sira ne’ebé ita hotu hatene ona katak uza mascara, fase liman beibeik ho sabaun ka dezinfetante ruma, evita kose liman ba matan, inus ho ibun, wainhira kumprimenta malu, lapresiza ka’er liman, bensa-liman, rei-malu ka haku’ak malu, evita halibur malu barak, hamri’ik ka tur do’ok husi ema seluk, mínimu metru ida ho balun.
Iha realidade akontesementu ohin loron, Polisia Nasional Timor-Leste (PNTL) konsege kaputra ema lubuk ida ne’ebe halo ezersijiu ka desportu iha Dili laran, hodi lori hotu ba Kaikoli