Reportazen Zevonia Vieira
Ho numeru konfirmadu COVID-19 ne’ebe kontinua sae lor-loron, liu zoom press conference, loron 20/03 Koordenador Forsa-Tarefa ba Prevensaun no Mitigasaun Surtu COVID-19 iha Timor Leste, Dr. Rui Maria de Araújo alert ba populasaun ne’ebé saí husi Dili entre loron 5 to’o dia 9 Marsu madrugada, ba munisipiu sira seluk, molok serka sanitaria hahú iha Dili, atu favor ida aprezenta-an ba autoridade saúde sira ne’ebé besik-liu, iha imi nia hela fatin, hodi bele hetan atendimentu.
CIJK mos apela ba komunidade iha munisipiu sira, wainhira hatene kona-ba ema ruma ne’ebé sai husi Dili molok serka sanitaria hahú iha Dili, halo favor informa hela autoridade sira, atu bele halo atendimentu ba sira.
Dr. Rui mos informa katak Laboratóriu Nasional sei la atende ema ne’ebé nain-rasik ba husu atu halo análize, hodi halo viajen sai husi serka sanitária iha Munisipiu Dili, apela ba sidadaun hotu katak laboratoriu nasional sei la atende ema nebe direita ba laboratoriu hodi husu halo analize.
Apela ba populasaun Timor-Leste tomak, liu-liu iha Munisipiu Dili, Baucau ho Viqueque atu nafatin hakmatek, lalika sé tilun ba lia-anin ka rumores, pratíka nafatin medida sira ne’ebé ita hotu hatene ona katak uza mascara, fase liman beibeik ho sabaun ka dezinfetante ruma, evita kose liman ba matan, inus ho ibun, wainhira kumprimenta malu, lapresiza ka’er liman, bensa-liman, rei-malu ka haku’ak malu, evita halibur malu barak, hamri’ik ka tur do’ok husi ema seluk, mínimu metru ida ho balun.
Dadus jeral ba loron 20 Marsu nian mak kazu foun total 19, kazu rekuperadu nain 3 no kazu ativu 154. Hosi kazu nain 19 ohin, iha mane nain 6, feto nain 13. ema ho idade tinan 13 nain ida, ema ho idade entre tinan 16-79 nain 18, ema sintomátiku nain 3, ema asintomátiku nain 16. Hosi horiseik mai ohin ne’ebe halo teste PCR hamutuk 628.