Reportajen David da Costa
Primeiru Ministru Timor-Leste, Kay Rala Xanana Gusmão, anunsia katak Timor-Leste sei sai nasaun tuirmai atu asume Prezidénsia Pro Tempore Komunidade Países de Língua Portuguesa (CPLP).
Iha komunikadu ne’ebe Neon Metin sita husi Gabanete Primeiru Ministru nian, PM Xanana hateten, períodu prezidénsia atuál korresponde ba tempu ne’ebe tuir loloos destinadu ba Guiné-Bissau.
“Períodu Pro Tempore ida ne’e mak períodu ne’ebe pertense ba Guiné Bissau. Depois Guiné-Bissau, mak ami. Tanba ne’e, tuirmai mak ami,” Xanana Gusmão ko’alia ba jornalista sira iha sede CPLP, Lisboa, segunda (22/06).
Kona-ba situasaun iha Guiné Bissau, ne’ebe hetan suspensaun hosi CPLP hafoin golpe militár iha Novembru 2025, Primeiru Ministru hateten katak CPLP kontinua halo esforsu atu ajuda nasaun ne’e, maibé respeita nafatin prinsípiu la-interferénsia.
“Iha prinsípiu la-interferénsia, maibé tenke iha mós prinsípiu atu tuir direitus umanus no demokrasia,” Xanana esplika.
Durante vizita, Xefe Governu partisipa iha sesaun solene ho Sekretária Ezekutiva CPLP, Maria de Fátima Jardim, no reprezentante permanente Estadu membru sira.
Iha intervensaun, Xanana reafirma kompromisu Timor-Leste atu hametin unidade iha diversidade no fortalese kooperasaun entre nasaun membru sira, liuliu iha área mobilidade, integrasaun ekonómika no kooperasaun ba oseanu sira.
Xanana mós destaka importánsia multilateralizmu, diálogu no kooperasaun internasionál iha momentu ne’ebe mundu enfrenta inserteza no instabilidade.
Vizita ne’e realiza bainhira CPLP prepara atu komemora aniversáriu tinan-30 nia fundasaun iha loron 17 Jullu 2026.
