Reportajen Zevonia Vieira
Relasiona ho prosesu julgamentu ba kazu Topu Honis ne’ebe tuir lolos realiza ohin loron iha tribunal Oe-cusse, maibé dala ida tan tribunal adia ba loron 9 Juñu, tanba arguido RD la marka prezensa iha tribunal.
Ba Neon Metin via telefone Prokuradór Titular ba kazu Topu Honis, Dr. Matias Soares hateten ohin Juiz halo aberta públiku ba julgamentu Kazu Topu Honis.
“Julgamentu halo duni maibe tanba arguido RD la marka prezensa entaun muda fali ba loron seluk, depois Juiz hein arguido marka prezensa iha Tribunal”, dehan Dr. Matias via telefone, 07/06.
Karik iha loron 9 Kuarta RD sei partisipa? Ba Neon Metin Dr. Matia dehan konaba ida ne’e sedauk hetan informasaun, maibé sekarik nia la mai, Ministériu Públiku sei husu ba tribunal atu muda medida kuasaun ka alterasaun medida kausaun hanesan prizaun preventiva no mós buka ekipamentu atu halo video conference.
“Tanba iha Lei Violénsia doméstika bele fasilita ida ne’e, sim sekarik iha loron 9 Kuarta bele uza teleconference hodi halo prosesu julgamentu ne’e”, dehan Dr. Matias ba Neon Metin.
Ba loron dahuluk hetan partisipasaun hosi Ministériu Públiku, Juiz no arguido nia defeza hosi defensor Publiku iha Oe-cusse arguido nian, no parte hosi vítima ne’e marka prezensa hosi Advogadu no defensor publiku.
Julgamentu aberta hahú iha oras 9:30 to’o 12:00 resin meudia. Julgamentu sei halo iha loron 9, maibe depende ba situasaun, bainrua dader sei hatene loloos uza teleconference ou RD mai direita. Prosesu ba kazu Topu Honis sei taka ba públiku, tanba vítima sira minoridade.
Hosi parte JU,S Maria Agnes Bere hateten prosesu julgamentu adia ona ba dala 3, tanba arguidu la marka prezensa.
“Arguidu hatudu ho klaru katak nia sei la iha interese atu marka prezensa iha ninia julgamentu. JU,S hanoin katak arguidu falta duni respeitu ho podér judisiál, haree katak parte sira hotu bele marka prezensa, no arguidu de’it mak la mai. Espera katak Tribunál sei foti medida rigorozu atu asegura Tribunál nia knaar nu’udar órgaun soberanu iha Timor-Leste”, Maria Agnes Bere.
Kazu Topu Honis mak nu’udar kazu pedofilia ne’ebé mosu dahuluk iha Timor-Leste, mak involve hosi Eis Padre Richard Dasbach hosi Kongresaun Society of the Divine Word (SDV) nian. Ho rezultadu investigasaun kongregasaun doutrina ba fé nian iha Vatikanu, Amo Papa Francisco hasai tiha Richard Dasbach nu’udar Padre iha tinan 2018, no eis Padre ne’e agora daudaun hetan konfirmasaun ho kazu pedófila, pornografia no Violénsia Doméstika.
