Reportajen Francisco JDA
Relasiona ho eleisaun prezidensiál ne’ebe besik ona no tuir diskusaun públiku ne’ebe dehan Xefe Estadu Major Jeneral FALINTIL –FDTL, Tenente General Lere Anan Timur mos sei kandidat an, ba jornalista sira Lere Anan Timur deklara katak sedauk pronunsia atu kandidata an ba Presidente da Repúblika ho rajaun katak sei iha pozisaun militar, maibé se karik mak kandidatu an duni ba Prezidente, sei konsulta ho Partidu FRETILIN no Maun Xanana, inklui maun alin sira ne’ebé hosi ai laran.
“Ha’u pelumenus ate agora, seidauk pronunsia ha’u atu kandidata ba Presidente, tanba ha’u sei militár, maibé ha’u ko’alia beibeik ona, ha’u iha ha’u nia maun, iha ha’u nia aman, ne’ebé ke ha’u mós rona sira, i ha’u nia maluk ne’ebé mai hamutuk hosi ailaran, ami sei konsulta malu depois mak kandidata ka la kandidata,” hateten Lere Anan Timur iha Edificiu F-FDTL Fatuhada, 28/06
Lere Anan Timur realsa liu tan katak, to’o daudaun seidauk kandidata-an tanba iha maun, no maun alin seluk mai hosi ai laran, sei konsulta malu liu-liu maun Xanana no bolu mós membru Comite Central FRETILIN no sei konsulta.
“Sobrevivente uniku, segundu jerasaun ha’u mak ne’e sei moris, no ha’u mós ba kandidata karik ha’u sei ba konsulta ho FRETILIN,” hateten Lere Anan Timur.
