Reportajen Adro “Saretukau”
Komunidade grupu rezisténsia juveníl, reprezentante governu no lider nasionál presta sira sentidu omenajen, liu hosi lia murak no domin hodi partisipa no akompaña simu eroi Nasionál Timor-Leste, Saudozu jornalista Max Stahl nia Ahu-desan, iha Aero Portu Internasionál Nicolau Lobatu iha loron 15 Dezembru 2021, hosi Austrália hodi mai to’o nia servisu fatin Centro audio visual Max Stahl Timor-Leste (CAMSTL), Benfica.
Partisipa hodi simu ahu-kdesan jornalista Britániku Max Stahl hosi Austrália iha aero portu Nicolau Lobato, ba Neon Metin membru hosi Kaixa Komandante Daitula Munisípiu Baukau, Damião Lemos hato’o nia sentimentu triste no ksolok ba saudozu Max Stahl, tanba hosi nia ita ukun aan, maibé ohin hela de’it nia naran hamutuk ho ita.
“Bainhira ami simu no rona Ahu-kdesan Max Stahl nian ne’e, ita kontente maibé ita triste, tanba nia mak lori ita nia funu ba mundu internasional, ita sai hanesan dalan importante ida ba mundu katak juventude mak lori duni Timor-Leste nia naran ba ukun rasik aan, Timor-Leste nia sasin ida ne’ebé loos no tebes mak MaX Stahl. Max Stahl mak sai figura boot ida ne’ebé nia lori duni ita nia independénsia ba mundu”, Damião espresa nia sentimentu iha aero portu hodi simu sinzas Max Stahl.
Momentu hanesan iha Centro audio visual Max Stalh Timor-Leste (CAMSTL) sobrevivente 12 de Novembru, José Lemorai, hato’o atu hosi juventude to’o inan-aman sira hotu atu respeitu no hakru’uk ba jornalista Max Stahl ne’ebé fo nia aan tomak ba Timor-Leste nia luta ba ukun rasik aan.
“La’os joven de’it, ami sira uluk terus na’in ho ami sira uluk nia hodi fo naran ba mundu (joven 12 Novembru) ne’e hotu-hotu tenki fo agradese ho koñesimentu ba nia, tenki hakru’uk ba nia, ita la fo buat ida. Sorti di’ak lori nia mai hakoi iha ne’e ita bele hatene, ita bele hasoru”, José hato’o nia sentimentu ba Neon Metin iha aero portu komoro, 15/12.
Nia hatutan, jornalista Max Stahl uluk hasai filmaze no foto sira ne’e lori brani, mate no moris mak ba, hodi it abele hetan ukun rasik aan, nia dehan se uluk mak jornalista ta’u ten se mak brani atu fo sai iha munudu.
“Max, ben-vindu mai o nia uma hamutuk ho o nia povu ne’ebé o hadomi”, lia ben-vindu Prezidente Konsellu Impresa, Virgílio Guterres ‘Lamukan’ hodi simu ahu-kdesan jornalista Max Stahl hamutuk ho nia espoza no oan mane ida ne’ebé akompaña, iha saudozu Max nia servisu fatin Benfica.
Entretantu iha antigu komarka Balide, Prezidente 12 de Novembru, Gregorio Saldanha ‘Mouris’ hato’o nia sentidu kondolénsia ba Max Stahl nia espoza no oan sira ba falesimentu saudozu nian, nia mos hato’o “obrigadu barak ba Max Stahl ba o nia luta, sakrifísu, nia brani, nia matenek, nia halo antes 12 Novembru no 12 Novembru, depois 12 Novembru, iha funu laran to’o ohin loron”.