Reportajen Adroaldo “‘Saretukau’
Prezidente Conselho de Imprensa de Timor-Leste (CI), simu saudozu Max Stahl nia sinza ho poezia “Um de Minuto de Silêncio’ ne’ebe hakerek husi saudozu Francisco Borja da Costa, no enkoraja mos jornalista sira atu banati tuir Max Stahl nia asaun hodi luta kontra injustisa.
Prezidente CI, Virgílio da Silva Guterres ‘Lamukan’ iha lia ben-vindu hato’o katak maske Max Stahl la hamutuk ona ho ita, maibé espíritu nafatin hamutuk ho ita hodi haktuir orden públiku.
“Max, ben-vindu mai o nia uma hamutuk ho povu ne’ebé o hadomi. O fila mai iha ahu-kdesan, ahu-kdesan ne’ebé sei nakfilak ba anin, anin ne’ebé sei haforsa ami hotu nia iis, anin korajen ni-nian, ahu-kdesan ne’ebé sei haktuir orden anin ni-nian hanesan jornalista ne’ebé haktuir orden públiku ni-nian, orden ema injustisadu ni-nian, ema mukit ni-nian”, hato’o prezidente Lamukan hodi simu Sinza Max Stahl iha Benfica, 15/12.
Nia hatutan katak jornalista sira la iha buat di’ak ida atu fo ba saudozu Max Stahl maibé agradese ba espíritu ne’ebé husik hela hodi brani luta ba lia-loos.
“Ami jornalista Timor-Leste la iha buat murak ruma atu haktuir ba o, iha de’it maka korajen ne’ebé o husik hela iha rate Santa Kruz atu defende povu Timor ni-nia interese. Ida ne’e maka ami promote atu haktuir atu nune’e kontinua lori nafatin iha ami nia memoria nomos iha ami nia espíritu, espíritu aten brani ni-nian, aten brani atu hasoru dezafiu saída de’it bainhira ami hala’o ami nia serbisu”, Virgílio hakotu hodi simu ahu-kdesan Max Stahl nian.
Ikus prezidente Virgílio resita jornalista no poeta Francisco Borja da Costa ni-nia poezia hodi diriji minitu ida hakmate hodi fó ónra ba nia eroi sira hotu no Max Stahl, “O eroi boot povu Timor nian, O merese hetan respeitu ida ne’e. tanba ne’e, mai ita hotu hamutuk halo Um Minuto de Silencio”.
Momentu hanesan iha Centro Audivisual Max Stahl Timor-Leste (CAMSTL) sobrevivente 12 de Novembru, José Lemorai, hato’o atu hosi juventude to’o inan-aman sira hotu atu respeitu no hakru’uk ba jornalista Max Stahl ne’ebé fo nia aan tomak ba Timor-Leste nia luta ba ukun rasik aan, atu nafatin agradese no fo obrigadu.
