Reportajen Umbelina dos Reis
Ministru Negósiu Estranjeiru no Kooperasaun (MNEK), simu mensajen informál ida hosi omólogu iha Myanmar, ne’ebe sujere posibilidade vizita ida hosi Ministru Negósiu Estranjeiru sira ba Nay Pyi Taw ba kapital Myanmar nian. Nune’e jestu reflete ba abertura diálogu bilaterál indika katak, laiha objesaun formál ruma hosi Myanmar ne’ebe bele impede ita-nia adezaun.
Ministru Negósiu Estranjeiru no Kooperasaun (MNEK), Bendito Freitas, hateten, asinatura no implementasaun pakote apoiu aumentadu ba Timor-Leste nia prontidaun ba ASEAN, ne’ebé hetan apoiu jenerozu hosi Singapura, hamutuk ho asisténsia kapasitasaun sira seluk ne’ebé fornese hosi ami-nia parseiru ASEAN nian. Ida-ne’e hanesan inisiativa ida ne’ebé komprensivu no estratéjiku ba kapasitasaun ne’ebé sei hametin ita-nia instituisaun sira no prepara ita-nia forsa traballu atu funsiona ho efetivu iha mekanizmu sira iha ASEAN nian, nune’e husu ba Ministériu sira atu maximiza partisipasaun iha formasaun, lideransa, no programa asisténsia téknika ne’ebé sei mai tuir inisiativa.
” Ha’u hakarak informa iha forum ida ne’e Ministériu simu mensajen informál ida hosi ami nia omólogu iha Myanmar, ne’ebé sujere posibilidade vizita ida hosi ami nia Ministru Negósiu Estranjeiru sira ba Nay Pyi Taw, kapitál Myanmar nian, jestu ida-ne’e reflete abertura ida ba diálogu bilaterál no indika katak laiha objesaun formál ruma hosi Myanmar ne’ebé bele impede ita-nia adezaun. Haree katak prinsípiu konsensu nu’udar pilar ida husi ASEAN, ida-ne’e indikasaun promisór ida kona-ba koezaun ne’ebé kontinua.” Dehan Ministru Negósiu Estranjeiru no Kooperasaun (MNEK), Bendito Freitas liuhosi nia diskursu iha salaun Nobre MNEK, segunda-feira, 28/07.
Nia informa, hare ba dezenvolvimentu sira-ne’e, husu ba Ministériu hotu-hotu aselera revizaun legál interna no aliñamentu ho tratadu sira iha kuadru ASEAN nia laran nune’e koordena preparasaun setorál bazeia ba roteiru ne’ebé estabelese ona no apoiu ativamente Sekretariadu Nasionál ASEAN no Task Force iha koordenasaun entre ajénsia.
