Reportajen Adroaldo ‘Saretukau’
Organizasaun Internasionál The Pacific Asia Resource Center Inter Peoples Cooperation (PARCIC) apoiu material konstrusaun ba komunidade afetadu hosi Siklone Seroja ne’ebe akontese iha fulan Abríl, hamutuk uma kain 95 iha Postu Administrativu Laklubar, Munisípiu Manatutu, ne’ebé distribui simbólikamente ba vítima sira iha loron 16, Novembru iha edifísiu Administrasaun Postu Laklubar, hamutuk ho autoridade lokál Postu nian.
Ba apoiu material hirak ne’e, reprezentante PARCIC, Filipio Soares via mensajen WhatsApp ba Neon Metin katak, apoiu refere hosi ONG rasik, no dadus sira reprezentante PARCIC rasik mak rekolla ho akompañamentu hosi autoridade lokál Postu Laklubar.
“Total uma-Kain ne’ebé mak Parcic rekolla hodi ajuda iha Postu Administrativu Laclubar hamutuk 95, Sasan ne’ebé hodi fo ajuda mak Kalen, Semente, Ai, Pregu no Arame (ikat kawat). Konaba sasan ne’ebé distribui hare mos husi nível destruisaun, iha ne’e ami fahe ba parte sira hanesan aat total, aat naton, aat Kaman, uma nakfera no ameasadu. Sasan sira ne’e fahe la hanesan haree ba nível destruisaun ne’e”, hateten reprezentante PARCIC, Filipio via WhatsApp, tersa, 16/11.
Nia hateten sasán ne’ebé PARCIC distribui bazeia mós ba matadalan hosi Protesaun Sivíl Timor-Leste nian katak la apoiu atu harii uma tomak maibé bele tulun hakmaan vítima sira nia sortimentu, “ba inan-aman sira ka benefisiáriu sira, labele haree de’it ba sasán natoon ne’ebé imi simu maibé haree ba ajénsia nia kontribuisaun oi-tuan ka barak maibé bele simu”, hateten Fílipio
Nia hatutan tuir nia observasaun haree ba komunidade afetadu sira iha oras ne’e da-dauk, espesiálmente iha Postu Laklubar susar tebes, tanba agora iha ona tempu udan no família balu sei hela iha lona okos no balu mos sei hela iha família nia uma.
Iha parte sorin Xefe Suku Manelima, Jorge Soares, via telefone hosi Laklubar ba Neon Metin hato’o, agradese tebes ba PARCIC ne’ebé apoiu ona material konstrusaun ba nia komunidade sira, maibé nia mos preokupa ho komunidade afetadu seluk ne’ebé mak seidauk hetan apoiu ka la tama lista apoiu hosi ONG refere.
“Ha’u sente kontente tebes, benefisiáriu hosi komunidade sira ne’ebé hetan ajuda hosi PARCIC. Ha’u atu hateten de’it katak iha momentu ne’ebé hasoru dezastre, ha’u nia komunidade barak tebes mak afeita, ha’u so hanoin hanesan ne’e tanba sira barak, balu hetan ona hosi PARCIC, balu seidauk ne’e mak ha’u sei hanoin hela ida ne’e”, hateten Xefe Suku Manelima Jorge.
Lider lokál ne’e hato’o, nia komunidade ne’ebé afeta hosi hosi Siklone Seroja hamutuk uma-kain 42, maibé da-dauk ne’ebé simu apoiu hosi PARCIC mak uma-kain 20. Nia mos preokupa ba nia komunidade afetadu seluk ne’ebé seidauk hetan apoiu, tanba antes ne’e hosi nia parte hatama ona proposta ba iha administrasaun Postu Administrativu Lacluba ba apoiu hosi governu liu hosi Protesaun Sivil, maibé oras ne’e seidauk rona informasaun ruma konabá apoiu ne’e, iha parte seluk proposta ikus ne’ebé hatama liu hosi ajénsia PARCIC mak vítima afetadu uma-kain 20 hetan da-dauk ona iha loron 17, Novembru ne’e.
