Reportajen David da Costa Gusmao
Komunidade iha postu administrativu Alas, Munisípiu Manufahi iha 75% mak seidauk asesu ba iha liña eletrisidade, ho ida ne’e husu ba xefe estadu atu haree mós problema hirak ne’e
Administradór postu administrativu Alas, Leopoldo Barreto deklara Postu Alas iha suku lima nia preokupasaun ne’e primeiru ba infraestrutura liga ba estrada, bee moos ho eletrisidade.
“Postu Alas hau bele dehan deit 75% la asesu ba iha eletrisidade no 25% asesu ona. Estrada mós hanesan 75% komunidade la asesu no 25% komunidade asesu ona estrada. Bee mós ne’e ita bele dehan 75% asesu ona no 25% mak seidauk asesu,” dehan administradórór postu Alas, Leopoldo ba jornalista sira iha resintu salaun parókiaál Manufahi, kuarta 17/11.
Nia dehan durante ne’e autoridade ho postu administrativu halo ona esforsu hodi halo planu ba iha setor dezenvolvimentu estrada, eletrisidade no bee moos maibé susar atu hetan resposta.
“Durante ne’e ita esforsu makaas, kada tinan hanesan normalmente tau ba planu setór dezenvolvimentu estrada, eletrisidade no bee moos, maibe ita-nia planu munisípiuai nasionál mas susar atu hetan resposta pozitivu husi governu sentrál, ho razaun orsamentu la iha no ikus 2020 ne’e pandamia no dezastre impaktu hodi la bele aprova orsamentu ba iha ita-nia planu sira ne’ebé ita halo,” nia esplika
Ho ida ne’e nu’udar autoridade postu administrativu, postu Alas husu ba Prezidente Repúblika haree mos ba iha kestaun jerál ne’e.
“Ita rekomenda ba Prezidente Republika disponibilidade atu halo koordenasaun servisu di’ak ho ita-nia governu sentrál, hodi haree kona-ba kooperasaun serbisu sira ne’ebé governu sentrál delega ba munisípiu hodi haree preokupasaun sira komunidade nia,” tenik nia.
Iha postu administrativu Alas munisípiu Manufahi iha suku lima, totál uma kain rihun 2 resin no totál populasaun 9,083.
