Home Feature Joven Millennial Hili Dalan Halo Negósiu Ki’ik, Dircia nia Mehi Bele...

Joven Millennial Hili Dalan Halo Negósiu Ki’ik, Dircia nia Mehi Bele Kontinua Eskola

1806
0
Dircia Laura Virginia Monteiro Tapehen. [Foto: Santy | 17.11.2021]

Reportajen Santina Lucia da Costa

Hikis kosar rasik, halakon dependénsia ba ema seluk mak dalan úniku joven milenial naran Dircia Laura Virginia Monteiro Tapehen (23), nune’e nia bele sustenta moris uma laran liuhusi fila liman hodi fa’an juice.

Ho kriatividade ne’ebé nia iha, nia hetan solusaun ne’ebé bele fó oportunidade ba nia, hodi heten rendimentu ba nia moris.

Dircia eskola iha Universidade Dili Institute of Technology (DIT), fakuldade Business Management, Departamentu Marketing hala’o nia negósiu ki’ik iha dalan ninin Merkadu Comoro.

Feto maluk ne’ebé mai husi munisípiu Viqueque, posto administrativu Ossu, bainhira Neon Metin hakbesik an ba nia serbisu fatin, haktuir katak tenke halo buat ruma, hodi bele hetan osan selu eskola no haree mós  alin no ama, ne’e mak agora daudaun fa’an hela Boba, Es-Pisang, Sate no seluk tan.

Dircia akresenta buat ne’ebé maka aprende ona iha eskola, tenke pratika, maski eskola seidauk hotu, maibé ne’e la sai kestaun, tan de’it ekonomia la sufisiente tenke buka dalan seluk hodi hetan netik osan hodi selu netik eskola no haree família uma laran.

“Bainhira atu halo negósiu ki’ikoan ne’e, hahú ho fundus $250 dollar, ho osan ida ne’e, hodi halo tiha Gerobak oan ida, folin $ 100 dollar, depois $ 150 dollar ne’e hola sasán sira ne’ebé atu fa’an nian no alat sira.Hau halo boba ne’e, hetan referénsia husi YouTube, hau nonton dala ida de’it, depois hau koko pratika tuir,  no ikus mai nia rezultadu sai duni hanesan iha YouTube.” Konfesa Dircia.

Neon Metin observa iha baraka oan besik merkadu Comoro, joven sira seluk sempre visita hodi sosa nia produtu, ida ne’e sinál di’ak katak esforsu ne’ebé Dircia halo, hatudu rezultadu ne’e halo nia sente kamaan, maski la barak maibé neineik sei bele foho oan ida.

Nia afirma antes atu loke negósiu ki’ik oan, nia hetan dezafiu barak, osan laiha, husu tun sa’e ba família sira ema la fó, dehan osan laiha, nafatin pasiénsia, atu buka iha ne’ebé?, ama mós osan laiha, entaun iha kolega ne’ebé maka besik los, kolega di’ak, entaun nia fó osan $250.

Nia haktuir dahuluk fa’an iha gerobak ki’ik oan ida, maibé bainhira udan no anin boot dala ruma sobu tiha tenda no banner, udan boot ami bokon hotu, no ema la dun hola, no posting de’it iha media sosial, ema sosa rua ba leten mak bele antar, maibe la patah semangat, esforsu-an nafatin to’o agora ema barak mai hola.

“Fa’an Boba ida $1.00 dollar, Es pisang $1.00, pentolan kesak ida $0.25sen, no porsi ida $1.00, Covid-19 uluk númeru ema pozitivu sa’e, fa’an husi media sosial, loron ida hetan $15.00 – $30.00, depois gerobak ne’e iha tiha loron ida hetan $50,00 to’o $60.00 dollar, no agora daudaun Covid-19, nia numeru tun, loron ida hetan $100 to’o $150.” Informa Laura.

Fatin ne’ebé mak fa’an ba ne’e aluga, primeiru fó fulan ida $ 40, maibé sira haree ema komesa mai hola barak entaun fulan ida $80. Hahu husi modal $ 250 dollar ne’e, loke negosiu iha loron 12/11/2020, agora dadaun hetan ona lukru $ 4500. No fó ona serbisu ba ema na’in rua, sira nia salariu fulan ida $ 115.

Dircia faan Boba iha merkadu Comoro nia oin. [Foto: Santy | 17.11.2021]

No Laura garante  katak, tinan oin bele tama fali ona eskola hanesan baibain, tanba iha ona osan hodi selu rasik nia eskola.

Laura husu ba joven sira ne’ebé mak idade hanesan ne’e keta moe, saida mak ita hatene halo de’it, moris ne’e labele depende de’it ba inan-aman, ita tenki buka rasik (Mandiri), tanba ita aban bainrua la ho inan-aman los de’it, tanba inan-aman  la hamutuk ita to’o iha mundu ne’e, oportunidade sei la mai tan dala rua, aproveita oportunidade ne’ebé mak iha.

Inisitiava ne’ebe Dircia hatudu duni mesajen pozitivu, oinsá halakon dependensia ba ema seluk, maibe sei mos obstaklu ne’ebe bele difikulta nia kareira ba oin, nune’e nia husu ba governu hodi fasilita joven emprendedór, hodi prepara fatin ne’ebe seguru, nune’e sira bele kontinua halo negosio

Iha Fatin hanesan, Nivia Freitas Monteiro hateten, agradese tebes tanba Dircia joven feto ida, nia fó oportunidade mai loke ona dalan, hodi nune’e bele serbisu iha nia fatin

“Hau haree Dircia ne’e, nia ema di’ak, serbisu badinas no esforsu-an maka’as, nia nunka senti kolen, nia senti buat hotu-hotu di’ak.” Dehan Nivia Freitas Monteiro, ne’ebé mak serbisu hamutuk ho Dircia.

Nivia realsa tan katak, ema sira ne’ebé mai hola ne’e barak los, dalaruma ami mak senti kolen tiha fali, fulan ida simu $115.00.

Dircia nia inan Domingas Monteiro hateten nia uluk ema ne’ebé barukten, nia lakohi kaer serbisu, han toba hela de’it, maibé nia tama tiha Universidade, agora nia hanoin rasik halo negósiu ki’ikoan, hodi haree nia alin, no hola netik foos saka ida no nesesidade uma laran.

“Situasaun ne’ebé mak durante ne’e ami hasoru, hau sei iha foho tutur nasi kotak, halo gorengan, rame iha ne’ebé hau iha ne’e, maske udan, loron manas, ema hatete aat, hau kontinua esforsu-an nafatin la’o atu  eduka hau nia-oan ba eskola hanesan mós ema nia-oan sira seluk.” Espresa Domingas.

Domingas dehan, nu’udar inan haree ba oan nia negósiu ki’ikoan ne’e, suporta nafatin nian, pasiénsia mak barak, tenke hanoin orasaun nune’e bele susesu iha loron ida. Liuhusi negósiu ki’ikoan karik bele muda ita nia moris.

Print Friendly, PDF & Email

LEAVE A REPLY

Please enter your comment!
Please enter your name here