Reportajen David da Costa Gusmao
Primeiru- Ministru (PM) Taur Matan Ruak, ohin dezloka ba Singapura ho aviaun Batik Airline, hodi hala’o tratamentu saúde iha Mount Elizabeth Novena Hospital, durante semana rua.
“PM Taur Matan Ruak, kuarta ohin dezloka ba Singapura hodi hala’o tratamentu saúde iha Mount Elizabeth Novena Hospital, tuir rekomendasaun hosi médiku Ospitál Nasionál Guido Valadares nian,” dehan iha komunikadu ne’ebé Neon Metin asesu liuhusi komunikadu imprensa iha Gabinete Primeiru Ministru, 15/06
Iha komunikadu Imprensa ne’e haktuir, durante pandemia COVID-19, Xefe Governu hala’o de’it check-up iha hospital Nasionál Guido Valadares (HNGV) Dili, tanba ne’e, médiku HNGV rekomenda atu Xefe Governu presiza ba tratamentu saúde iha Ospitál mais avansadu, atu médiku espesialista sira bele kontrola di’ak Xefe Governu nia kondisaun saúde.
Enkuantu Primeiru Ministru Taur Matan Ruak halo hela tratamentu saúde iha Singapura ne’e, Vise Primeira-Ministra, Armanda Berta dos Santos mak sei asume pasta interinamente.
Nune’e Xefe Governu ne’e sei fila fali mai rai laran iha loron 29 Juñu 2022.