Reportajen David da Costa Gusmao
Governu liuhosi reuniaun Konsellu-Ministru, aprova ona halo renovasaun daruak ba medida exesionál no temporária ba vijilánsia sanitária, hodi hatán ba pandemia moras COVID-19 nian, iha projetu Proposta-Lei ne’e aprezenta husi Primeiru-Ministru (PM) Taur Matan Ruak.
Porta voz governu, Ministru Prezidénsia Konsellu Ministru, Fidelis Manuel Leite Magalhães hateten renovasaun daruak ba medida exesionál no temporária ba vijilánsia sanitária hodi hatán ba pandemia moras COVID-19 nian, ne’ebé prorroga vijénsia husi artigu 3 Lei n. 24/2021 nian, loron 19 Novembru. Ho alterasaun ida-ne’e, medida exesionál sira ne’e prorroga ba períodu loron 120.
“Tanba ne’e maka ohin dekretu lei ne’e ita hatuur, ho tenke fó nota esplikativu ida liliu iha preámbulu proposta ne’ebe governu husu ba parlamentu tenke hatuur mós dadus sira, ikus liu situasaun pandemia nian,”dehan Ministru Prezidénsia Konsellu Ministru, Fidelis Manuel Leite Magalhães, iha palasiu Governu 15/06.
Iha artigu 3, loron 120 ne’e primite ba governu hola medida sira bainhira virus pandemia covid-19 ne’e sei iha. Para governu iha rasik iha kompeténsia atu foti medida sira karik numeru kazu covid-19 ne’e aumenta.
“Tanba ne’e governu husu ba Parlamentu Nasional, autoriza 120 dias para governu iha kompetensia ne’e hodi hein hela, karik sei iha moras iha aumenta ruma karik, ita iha medida legal sira maka fó kbiit mai governu atu halo atuasaun sira,” tenik nia.
Maibe ida ne’e mós la presiza atu halai fali ba iha estadu emerjénsia, karik iha situasaun ne’ebe maka moras aumenta.
“Ita nia mos hatudu katak haree kondisaun diak, ita hotu moris kuaze normal espera ida ne’e kontinua nafatin. Maibe instrumentu legal sira ne’e ita presiza tau nafatin, karik iha situasaun ladiak ruma, moras aumenta karik, ita iha medida ruma governu bele uza hodi halo atuasaun sira,” nia esplika.
