Reportajen Santina Lucia da Costa
Kandidatu Prezidente Repúblika ho númeru sorteiu 2, Dr. Francisco Guterres Lú Olo ho laran hakmatek no haksolok, simu rezultadu eleisaun segunda ronda tanba povu mak hili nia Prezidente Republika ba tinan lima mai, no Lú Olo mós hato’o parabens ba Dr. Ramos Horta Prezidente eleitu ba mandatu 2022-2027.
Liuhusi deklarasaun ne’e, Kandidatu PR, Francisco Guterres Lú Olo, hateten, Rezultadu provizóriu husi eleisaun prezidensiál, segunda ronda, hatudu ona katak kandidatu Dr José Ramos Horta mak sei sai Prezidente Repúlika ba períodu 2022-2027. Ne’e mak vontade Povu nian, espresa liuhusi boletin-de-votu, direitu polítiku no demokrátiku ida ne’ebé garante husi Konstituisaun Repúblika.
“Ha’u simu rezultadu eleisaun segunda ronda ho laran hakmatek no ksolok tanba Povu rasik mak hili ninia Prezidente Repúblika ba tinan lima tuir mai.” Dehan, Kandidatu PR, Francisco Guterres Lú Olo, iha Sede Kampaña Lú Olo, Luz Clarita, Sesta-Feira, 22/4.
Dr José Ramos Horta, Prezidente eleitu ba mandatu 2022-2027 Lú Olo fiar katak Horta sei koopera ho Parlamentu Nasional, VIII Governu Konstitusionál no Tribunal Rekursu atu hatutan konkista sira ne’ebé ita hetan ona iha tinan lima liubá.
Kandidatu PR númeru sorteiu 2 hato’o Parabéns mós ba Povu Timor-Leste, kompatriota sira, feto no mane, hatudu maturidade polítika tanba hatene hametin ambiente pás, trankilidade no estabilidade iha tempu kampaña no eleisaun.
Entertantu, tuir Sekretáriadu Tekniku Administrasaun Eleitóral (STAE) konklui ona apuramentu iha nivél nasional hafoin kontajen nivel munisipal no disapóra iha loron 20 Abril 2022 hatudu katak, kandidatu Prezidente Republika ho númeru sorteiu 1, Dr. José Ramos Horta ho votu 397,145 (62,09% ) no kandidatu Prezidente Republika ho númeru sorteiu 2, Dr. Francisco Guterres Lú Olo ho votu 242,440 (37,91%).