Kandidatu Prezidente Republika ho númeru sorteiu 2, Dr. Francisco Guterres Lú Olo, Agradese ba Partidu politiku , Organizasaun hotu rezisténsia, arte marsiais no rituais sira nia apoiu durante iha kampaña no eleisaun prezidensiál iha tinan ne’e.
Liuhusi deklarsaun ne’e, Kandidatu PR, Francisco Guterres Lú Olo hateten, Kampaña primeira ronde no segundu ronde ne’ebé simu apoiu tomak no inkondisional husi Partidu FRETILIN ho esforsu tomak no dedikasaun atu garante Lú Olo nia vitória ba mandate daruak nu’udar Prezidente Republika.
“Ba kampaña primeira ronda no segunda ronda ha’u simu apoiu tomak no inkondisionál husi Partidu FRETILIN. Ha’u aproveita loron ohin hodi hato’o agradesimentu públiku ba Sekretáriu-Jeral FRETILIN, Dr Mari Alkatiri, no estrutura tomak iha nível nasionál to’o baze, ne’ebé servisu ho esforsu no dedikasaun tomak, atu garante ha’u nia vitória ba mandatu daruak, nu’udar Prezidente Repúblika.” Hateten, Kandidatu PR, Francisco Guterres Lú Olo, iha sede kampaña Luz Clarita, 22/4.
Ba kampaña segunda ronda Lú Olo haksolok tebes ho partisipasaun direta husi Prezidente partidu PLP, Jeneral Taur Matan Ruak no Konselleiru partidu KHUNTO, Bou Naimori, líderes husi partidu rua ne’ebé halo parte Maioria Parlamentar ida ne’ebé sustenta ohin loron VIII Governu Konstitusionál. Ba líderes no quadrus hotuhotu husi partidu rua ne’e, ne’ebé partisipa iha kampaña daruak ka hahú kedas iha kampaña dahuluk, Lú Olo hato’o agradesimentu.
Lú Olo agradese mós apoiu husi partidu “Os Verdes”ne’ebé deklara apoiu ba nia kandidatura iha kedas primeira ronda. Agradese mós kuadrus partidu PUDD, Frente Mudansa. organizasoins hothotu Rezisténsia nian, Organizasoins Artes Marsiais no Rituais, no sidadã no sidadaun ida-idak ne’ebé apoia ha’u-nia kandidatura no hala’o kampanã iha fatin-fatin, iha rai-laran no rai-li’ur
Lú Olo, dehan, Biar akontese insidente balun ita bele sente orgullu nu’udar País tanba ita konsege hala’o votasaun dara rua iha ambiente hakmatek, livre, demokrátiku no ho órden públika.
Kandidatu Numeru sorteiu 2, Agradese mós Tribunal Rekursu, órgauns eleitorais, STAE no CNE, fiskais no observadores nasionais no internasionais ho ida-idak ninia servisu. No La haluhan agradese mós PNTL ne’ebé hanesan iha ronda uluk, hatene kumpre nia dever mantein ordem di’ak iha territóriu tomak iha kampaña daruak no eleisaun prezidensiál iha 19 abril 2022.
Nu’udar kandidatu no nu’udar mós Prezidente Repúblika, Lú Olo apela ba Povu tomak atu simu rezultadu husi eleisaun prezidensiál 19 Abril 2022 ho laran hakmatek no ksolok, atu ita hotu bele moris nafatin ho pás no establidade, dezenvolve ita-nia Rai doben ba hasa’e moris-di’ak ba ema hotu no hametin justisa sosiál.
Iha fatin hanesan, Sekretariu Jerál FRETILIN, Marí Alkatíri, Reafirma katak, admirarasaun boot b aba Lú Olo tanba nia korajen ho dignidade simu rezultadu eleisaun prezidensiál segundu volta.
“Hau rearfirma de’it hau nia admirasaun boot ba Kamarada Lú Olo, tanba nia korajen ho dignidade atu aseita rezultadu ida ne’e, hanesan Sekretariu Jerál FRETILIN hakarak dehan, FRETILIN hein hela ita boot.” Dehan, Marí Alkatíri.
Iha Sorin seluk, Prezidente Partidu PLP, Taur Matan Ruak, hato’o Parabens ba povu Timor ba konkista ida ne’e no parabens mós kandidatu mais votadu Ramos Horta, no Agradese ba Lú Olo.
“Tanba previlejiu ne’ebé fó ba ami ita hotu serbisu hamutuk no ami kontenti los, partilha momentu sira hanesan ne’e, hodi haburas ita nia demokrasia no hametin estabilidade no paz iha ita nia rai.” Dehan, Taur Matan Ruak.
Entretantu, Reprezentante partidu KHUNTO, Nicolau Lino Freitas Belo, hateten, Partidu Khunto nafatin fó parabens ba Lú Olo no nafatin suporta oinsa lori rai ne’e ba oin. Hanesan Demokrasia husi povu ba povu fila-fali ba povu. Laiha ema ida lakon no manan. Lakon ka manan rai ida ne’e ita hotu nian atu kontribui paz ho dame, estabalidade ba RDTL.
No tuir Sekretáriadu Tekniku Administrasaun Eleitóral (STAE) konklui ona apuramentu iha nivél nasional hafoin kontajen nivel munisipal no disapóra iha loron 20 Abril 2022 hatudu katak, kandidatu Prezidente Republika ho númeru sorteiu 1, Dr. José Ramos Horta ho votu 397,145 (62,09% ) no kandidatu Prezidente Republika ho númeru sorteiu 2, Dr. Francisco Guterres Lú Olo ho votu 242,440 (37,91%).
