Reportajen David da Costa
Prezidente Republika José Ramos-Horta husu ba Xefe Estadu Maior Jenerál Falintil Forsa Defeza Timor-Leste (F-FDTL) Tanente Jenerál Domingos Raul Falur Rate laek, atu fó edukasaun ba militar sira. Tanba ne’e, nia mós husu ema hotu nia apoiu atu bele eduka Militar sira, sai militar ida ne’ebé hala’o sira nia misaun ho diak.
“Ohin Prezidente Repúblika mós alerta ba ha’u edukasaun ba militár sira. Ha’u mós husu ajuda atu Xefe Estadu ajuda ha’u, ministru, governu, jornalista apoiu ha’u atu ita hotu eduka militár sira sai militár ida ne’ebé ema hotu hadomi, ema hotu gosta hanesan ho valór sira uluk avo sira bainhira ba fatin ne’ebé de’it, ninia inan no maun alin mak iha ne’eba subar fó han nia, fó informasaun ba nia, atu nia bele halo ninia misaun di’ak liu ne’ebé imi hotu ita ajuda malu hanorin forsa sira ne’e,” hateten Xefe Estadu Maior Jenerál F-FDTL, Tanente Jenerál Domingos Raul Falur Rate laek, ba Jornnalista sira bainhira remata enkontru ho Prezidente Republika José Ramos-Horta iha Palasiu Prezidente Bairo-Pite, Segunda 4/09.
Alende ne’e, ohin mós Atualiza pontu situasaun militár nian, situasaun operasionál to’o ona iha ne’ebé, situasaun lójistika ne’e halo ona oinsá, situasaun atividade diária sira ne’e halo nusa, situasaun pessoal saúde halo nusa, ida ne’e maka informa ba Prezidente Republika José Ramos-Horta.
“Ne’e enkontru regulár hanesan bai-bain, mas uluk ne’e semana-semana depois Prezidente Repúblika haruka notífikasaun ida ba, ami mós propoin dehan bainhira fulan ida mak ami dala ida, mas depende ninia aplikasun ne’e ho fleksibilidade, kuandu iha nesésidade Prezidente bolu mak ami mai. Se la’e ami fó de’it informasaun ne’e liu husi ami nia Kaza Militár atu atualiza situasaun ba Xefe Estadu ne’ebé kazu ekstrema Xefe Estadu konvoka ami mai ida ne’e mak ami kumpri,” nia esplika.
