Reportajen Santina Lucia da Costa
Oxfam iha Timor-Leste hamutuk ho parseria sira hala’o lansamentu ba Estratéjia País foun hodi gia Oxfam nia serbisu iha Timor-Leste 2021-2025, no lansa mos sentru treinamentu no advokasia ba organizasaun sosiedade sivíl sira, atu hadi’a kualidade sira nia serbisu.
Hafoin lansamentu Prezidente Konsellu Ministru, Fidelis Leite Mangalhaes hateten Oxfam organizasaun Internasionál ida ne’ebe maka rekoñesidade nivel global, mundial, nia harii hafoin de segunda guerra mundial iha sidade Oxford, depois nia iha espiasaun serbisu iha nasaun 67.
“Ohin hau partisipa eventu importante tebes ne’ebe organiza husi Oxfam Timor-Leste. Kona-ba lansamentu estratejia nasional ba 2021-2025, iha dokumentu ne’ebe hatur modalidade sira ne’ebe enkaizamentu serbisu no atuasaun sira iha Timor-Leste.” Dehan, Prezidente Konsellu Ministru, Fidelis Leite Mangalhaes ba jornalista sira iha Oxfam, Hudi-Laran, 31/5.
Prezidente Konsellu Ministru hatutan lansa mos sentru treinamentu no advokasia iha ne’ebe maka OXFAM loke fatin, espasu ida, hodi bele halo treinamentu ba organizasaun sosiedade sivil nasional sira seluk, atu bele hadi’a liu tan sira nia kualidade serbisu, atu bele fo kontribuisaun diak liu tan ba ita nia dezenvolvimentu nasional.
Fidelis Mangalhaes dehan, pontu dévista Governu nia maka atu haburas liu tan parseria entre organizasaun La’os naun-Governamental Internasional no nasional iha parseria ne’ebe mak di’ak atu bele hadia kualidade organizasaun sosidade sivil nian.
Prezidente Konsellu Ministru Apresiasaun maka’as ba sentru treinamentu ne’e, tanba sosiedade sivil sira kontinua mellora parseria sira nia kualidade sira no mos mellora governu no estadu ninian resposta ba imi nia preokupasaun sira ne’e. Tanba organizasaun sosiedade sivil ne’e parseria importante estadu nian no mos hanesan parometru ida ba kualidade demokrasia ita nian rasik.
“Lori Governu nia naran hato’o parabéns ba Oxfam, ba esforsu hotu ne’ebé ita boot sira halo no esforsu hotu ne’ebe mak Oxfam halo.” Tenik Fidelis Mangalhaes.
Iha Fatin hanesan Country Director OXFAM iha Timor-Leste, Fausto Belo Ximenes hateten, Oxfam halo lansamentu ba iha estratéjia foun, ne’ebe sei kobre serbisu iha Timor-Leste husi agora to’o 2025. Serbisu ida ne’e hamutuk ho parseiru no aliadu sira, tanba estratéjia ne’e halo barak liu halo hamutuk ho parseriu sira, lao’s Oxfam mesak de’it.
“Ohin ita halo lansamentu ida ne’e, para atu bele hato’o ba ita nia ukun na’in sira no komunidade sira ne’ebe partisipa ita nia projetu no mos parseriu sira, serbisu saida mak halo husi agora to’o iha 2025.” Dehan Country Director OXFAM Timor-Leste, Fausto Belo Ximenes.
Fauto Belo Ximenes, esplika OXFAM Timor-Leste sei halo serbisu iha prinsipal area tolu husi agora ba 2025, area ida mak alterasaun Klimatika, oinsa maka serbisu hamutuk ho komunidade sira bele haforsa sira nia rezilensia sira ba alterasaun klimatika, nune’e mos oinsa serbisu para sira prepara di’ak liu tan bainhira dezastre ruma mosu.
Segundu mak Igualdade Jéneru ne’ebe barak liu inisiativa sira ne’ebe iha hamutuk ho parseriu no aliadu sira bele hakbiit feto sira iha vida ekonomia. No area tolu maka ekonomia ne’ebe justu, oinsa serbisu hamutuk ho governu no entidade estadu nian, atu garantia katak, politika no pratika ne’ebe ita iha no dezenvolve bele benefisiu ba ema hotu-hotu liuliu feto grupu vulneravel sira seluk no Ema ho Difisiensia.
Nia informa kada tinan Oxfam nia orsamentu ba programa iha Timor, laos Oxfam deit, maibe fundus sira ne’ebe fo ba parseiru sira mais menus $ 5 milloens to’o $ 7 milloens, ne’e mak suporta programa kada tinan, husi agora to’o 2025.
Nia realsatan katak kona-ba hakbiit feto, programa barak kuaze Oxfam hahú ona, maibe bazeia ba estratéjia agora ne’e foin hahu iha 2021, ho dezafiu ne’ebe ita iha, liuliu Covid-19 ne’ebe impata serbisu iha baze no serbisu hamutuk ho komunidade, entaun maioria estratejia foun ne’e agora mak hahu ba oin.
Ohin loron Oxfam serbisu hamutuk ho parseiru organizasaun sosiedade sivíl hamutuk 17, no durante tinan 10 kotuk, besik organizasaun sosiedade sivíl hamutuk 25.