Reportajen Santina Lucia da Costa
Country Director Oxfam iha Timor-Leste, Fausto Belo Ximenes hateten Oxfam sempre fo oportunidade ba jornalista sira, hodi fó formasaun no serbisu hamutuk oinsá halo kobertura ba ema ho defisiénsia ho sensivel no organiza media tour.
Country Director Oxfam Timor-Leste, Fausto Belo Ximenes hateten asuntu ne’e hafoin lansamentu Oxfam nia estratéjia país foun ba Timor-Leste 2021-2025 no lansa mos ba sentru treinamentu iha Oxfam, Hudi-Laran, Tersa-Feira ne’e.
Fausto dehan oportunidade sempre nakloke ba jornalista sira, depois Oxfam sempre fo formasaun, serbisu hamutuk ho jornalista sira oinsa halo kobertura liuliu ba ema ho defisiénsia, linguajen saida mak ita própriu ba sira, palavra saida mak ita uza atu labele ofende sira ita nia maluk difisiensia sira.
“Ami sempre koko para envolve jornalista sira, agora daudaun ami mos halo media tour ida kompostu husi jornalista sira, hodi ba haree iha area ne’ebé mak ami serbisu, kona-ba serbisu saida mak ami halo, no rona feedback husi komunidade sira ne’ebe ami serbisu hamutuk, entaun sempre serbisu hamutuk ho jornalista sira, agora daudaun jornalista lubuk ida iha munisípiu halo kobertura ba ami nia programa.” Hateten Country Diretor Oxfam Timor-Leste, Fausto Belo Ximenes ba jornalista sira iha Oxfam, 31/5.
Durante ne’e Oxfam iha Timor-Leste halo on atividade ho jornalista sira liuhusi media briefing oinsa halo análize ba Orsamentu Jeral Estadu ne’ebe foka liu ba setór agrikultura no tourismu, importánsia fundu petrolíferu hodi investe iha setór produtivu sira, media tour liga ho diversifikasaun ekonomia, treinamentu konaba media Gender no Inkluzivu.
Oxfam mos kontinua halo enkontru ho asosiasaun jornalista no Konsellu Imprensa iha Timor-Leste hodi hare konaba asuntu liberdade imprensa no espresaun iha Timor-Leste
