Reportajen Adroaldo ‘Saretukau’
25 Fevereiru, Iha Otel Timor, misaun observadór ba eleisaun Prezidensiál Timor-Leste tinan 2022 hosi nasaun 17 Uniaun Europeia (EU) nian na’in 26, aranka ona ba munisípiu 12 no Região Administrativo Especial Oecusse Ambeno (RAEOA), hodi halo preparasaun no observa direita períodu kampaña eleitoral hosi kandidatu Prezidente Repúblika (PR) na’in 16 nomos halo observasaun iha loron votasaun 19 Marsu to’o prosesu kontajen de votu remata.
Xefe Misaun Adjuntu obeservadór internasional EU, Alexandre Jan Gray hato’o, sira haruka obeservadór 26 ba ona kada munisípiu Timor-Leste nian hodi halo observasaun durante tempu kampaña to’o loron votasaun nian.
“EU halo ona prosesu observasaun eleitoral iha Timor-Leste durante períodu Indepedénsia nian. Ida ne’e observasaun eleitoral ba da-neen ne’ebé EU halo ona iha Timor-Leste. Dader ne’e ami haruka obeservadór longu prazu na’in 26 ba iha kampu, sira servisu nu’udar ekipa feto ida, mane ida nomos ho obeservadór nasional sira,” Xefe Misaun Alexandre hatete.
Xefe Misaun Alexander ne’e hatutan, entre obeservadór na’in 26 ne’e, sira iha obeservadór foun na’in 17 ne’ebé reprezenta. Nia hatete hosi obeservadór hirak ne’e balun servisu ona iha Timor-Leste antes ne’e no sira bele ko’alia lian Tetun no sira iha esperiénsia di’ak iha nasaun ne’e.
“Sira sei kobre 13 munisípiu no Oecusse, sira sei iha ne’ebá durante prosesu tomak, sei akompaña prosesu kampaña eleitoral, kontajen de votu, iha rezultadu tabulasaun nian nomos períodu pos-eleitora, hafoin ida ne’e mak sei fila fali mai Díli,” Xefe Misaun Obeservadór EU, Alexandre hato’o iha Otel Timor, Sesta, 25/02.
Nia akresenta, EU ho Timor-Leste iha relasaun ida forte tebes, tanba ne’e nia dejeza Timor-Leste nia eleisaun ida ne’e la’o ho di’ak no susesu, “ami nia esperansa ida di’ak ba Timor oan iha festa demokrásia ida ne’e,” Alexandre hakotu.
Iha fatin hanesan reprezentante observadór EU hosi nasaun Itália, Anna Lisa Picone, hatete sira na’in 26 sei aranka ba munisípiu ida-idak iha Timor-Leste hodi halo observasaun durante prosesu tomak, kampaña to’o votasaun, nia salienta tan katak observadór hirak ne’e iha esperiénsia di’ak tanba antes ne’e iha observadór balun mak iha ona Timor hodi observa situasaun rai laran hosi parte Jurídiku, polítiku no ekonómiku nian.
