Reportajen Silvino Freitas
Liuhusi semináriu nasionál ho tema “garantir a proteção das crianças e jovens em Timor Leste” ne’ebé organiza husi komisaun F iha parlamentu-nasionál, Prezidente Parlamentu Nasionál Maria Fernanda Lay hateten, kampu traballu halo joven sira enfrenta dezafiu oioin ne’e propria responsabilidade husi parlamentu no governu hodi toma atensaun no mós tenke esforsu makaas atu bele solusiona, presiza treinamentu ba joven sira atu bele ba servisu tanba sira iha diviza boot hodi kontribui sustentabilidade ekonomia iha Timor Leste.
Tuir PPN Maria Fernanda Lay katak, problema husi joven sira infrenta la’ós de’it iha Timor Leste maibé iha mundu tomak sai dezafiu iha momentu ida ne’e liga ho seguránsa hanesan arte marsial ne’ebé perturba seguránsa nasaun nian, edukasaun ba joven sira maka oinsá atu eskola nune’e ho dezafiu sira ne’e la’ós papél governu nian de’it maibé ho mós inan aman sira iha papél atu tau matan edukasaun oan sira nian.
“Liga ho kampu traballu hanesan ita hotu hatene katak ita nia traballadór barak mak sai ba railiur balun ba ofisialmente, maibé balun ba ilegal halo ita hetan problema maka oras ne’e dadaun iha railiur ita seidauk rezolve” dehan Fernanda Lay iha semináriu nasionál ne’ebé organiza husi parlamentu nasionál iha salaun Mahoka Dili, (28/09).
Nia dehan tan, problema hotu ne’ebé joven sira infrenta ne’e liga mós ba investimentu iha rai laran no estabilidade ekonomiku railaran nian, tanba ne’e dezafiu refere ita hotu nian atu oinsá bele fó kampu traballu atu bele iha sustentabilidade dezenvolvimento, laiha paz no seguransa mak sei laiha mós ema ida atu investe iha ita nia rai laran, tanba ne’e seitor refere sai preokupasaun ema hotu nian la’ós de’it joven sira, propria parlamentu ne’ebé tau matan ba asuntu refere, governu dadaun ne’e mós esforsu atu bele tau matan no trasa ona atividade importante atu bele solusiona.
“Ita nia joven sira ne’ebé ba railiur tenke iha treinamentu hodi ba atu servisu la’ós ba atu buka servisu ne’e mak importante, sira kontribui ho diviza boot tebes liuliu sira ne’ebé iha ona railiur, tanba iha ona sustentabilidade ekonomia família ne’ebé di’ak tebes” dehan Fernanda Lay.
Nia konklui, semináriu nasionál sira hanesan ne’e tenke hala’o mós husi komisaun sira seluk hanesan edukasaun, saúde oinsá atu bele solusiona problema saúde publika nian, seguránsa alimentar nian, saúde reprodutiva ne’e problema bo’ot maka nasaun infrenta, nutrisaun ba labarik atu bele iha memoria di’ak hodi simu edukasaun.
