Home Notisia Rede Koligasaun Agrikultura: Governu Tenke Uza OJE 2022 Ho Didi’ak no Hakbiit...

Rede Koligasaun Agrikultura: Governu Tenke Uza OJE 2022 Ho Didi’ak no Hakbiit Povu Duni

272
0
Koligasaun agrikultura iha konferensia imprensa.[Foto: Joselina | 28.01.2022]

Reportajen Joselina dos Santos

Koligasaun Agrikultura Timor-Leste ne’ebé envolve organizasaun sosiedade sivíl, grupu agrikultura, grupu ema ho difisiénsia, setór privadu, grupu feto iha agrikultura, organizasaun juventude, LGBTI, grupu kooperativa inklui movimentu sosiál no grupu sira seluk ne’ebe iha interese atu dezenvolve setór agrikultura, no promove setór ekonomia produtivu ne’ebe sustentávelél no inkluzivu iha Timor-Leste.

Iha Press Konferénsia ne’e, Porta voz Koligasaun Agrikultura, husi Grupu The Corner Store Network Baguia, Dionisia Guterres Ramos Gusmão hateten Koligasaun Agrikultura ho rede HASATIL iha momentu ne’e, nafatin louva ba agrikultór hotu, grupu prosesador kiik sira, grupu artezenatu sira no grupu hotu ne’ebe kontinua hala’o atividade ekonomia kriativu sira iha rai laran. Maski iha Timor-Leste grupu sira ne’e kontinua enfrenta dezafiu no problema oin-oin iha setór ekonomia produtiva sira, maibe koligasaun enkoraja ita boot sira atu labele lakon esperansa hodi kontinua hala’o servisu nafatin.

“Iha proposta inisiu OJE 2022 ne’ebe governu submete ba Parlamentu Nasionãl ho montante Biliaun $1.675. Hafoin debate iha plenária membru parlamentu konsege propoin tan proposta hamutuk 165. Proposta hirak ne’e tuir mai aprova husi deputadu sira ne’ebe fó implikasaun ba tetu OJE 2022 nian aumenta to’o biliaun $1.949,” dehan porta voz iha sede HASATIL, 28/01

Nia dehan situasaun ne’e obriga governu tenke kontinua foti osan liu husi fundu Petrolíferu Biliaun $1.311 boot liu RSE (Rendimentu Sustentavél Estimadu), Pratika ne’e kontinua fó amiasa boot ba sustentabilidade fundu Petrolífero. Parte seluk, dezenvolvimentu setór produtivu sira nafatin la hetan prioridade husi governu iha OJE 2022 hodi asegura sustentabilidade ekonomia povu kiik sira nian.

“Relasiona ho OJE 2022 ne’ebe Prezidente da Repúblika promulga iha loron 3, janeiru tuir ami nia observasaun no analiza nafatin seidauk fó prioridade ba setór agrikultura no setór produtivu sira seluk,” sira informa.

Koligasaun Agrikultura hato’o rekomendasaun liu husi deklarasaun konjunta, no kontinua bolu atensaun maka’as ba Governu, Parlamentu Nasional, Prezidente da Repúblika no públiku katak, Governu tenke uza osan povu nian iha OJE 2022 ho didi’ak no hakbiit duni povu nian, hadi’a problema malnutrisaun, inseguransa ai-han, hamenus kiak iha rai laran, liu husi promove no dezenvolvimentu setor agrikultura, indústria kiik transformadora sira, kooperativa agrikultura, peska no pekuária, tanba setór hirak ne’e mak fó oportunidade no fornese kampu servisu ba ema barak.

Investe no promove agrikultura familiar ne’ebe eziste nanis ona iha ita nia rain, Agrikultura familiar bazeia ba rekursu lokál sira, hanesan matenek lokál, fini lokál, no prátika agrikultura ne’ebe di’ak ba ekolojia no haforsa ekonomia familia. Governu tenke proteje familia agrikultór atu sira labele monu ba lasu kompaña boot sira, liu husi sistema sira ne’ebe halo agrukultór sira tenke depende ba fini íbrida, adubu kímiku no pestisida kímiku sira.

Dezenvolve no hadi’ak infra-estrutura iha nivél Suku to’o Aldeia hodi haforsa komunidade sira liu husi harii irrigasan eskalaun kiik ne’ebe fornese bee ba uma kain sira hodi halo toos, kuda modo, hakiak animal iha trmpu ne’ebe laiha udan. Apoiu no suporta konservasaun agrikultura, re-florestasaun no konaservasaun bee matan atu kontinua fornese bee ba komunidade iha tempu bailoron naruk. Hadi’a estrada no ponte sira to’o nivel aldeia atu komunidade iha asesu nafatin ba merkadu.

Membru koligasaun agrikultura sira mak HASATIL, La’o Hamutuk, PERMATIL, UNAER – Ermera, Oxfam iha Timor-Leste, Ra’es Hadomi Timor-Oan, Alumni Parlamentu Foin sa’e Timor-Leste (APFTL), Kdadalak Sulimutuk Institute (KSI), Mata Dalan Institute, Grupu Bee salin, Grupu Hatajo, Timor Leste Organic Fertilizer (TILOFE), FBN, Forum Juventude Defisiénsia Ermera, EAMO, Youth for Blue Action Development Initiative no Membru Koligasaun sira seluk.

Print Friendly, PDF & Email

LEAVE A REPLY

Please enter your comment!
Please enter your name here