Home Notisia OJE 2022 Governu Investe De’it 1.9% Ba Setór Agrikultura, Mariano: Ne’e La...

OJE 2022 Governu Investe De’it 1.9% Ba Setór Agrikultura, Mariano: Ne’e La Sufisiente

700
0
Membru Koligasaun Agrikultura no peskizador La'o Hamutuk. [Foto: Santy | 25.11.2021]

Reportajen Joselina dos Santos

Orsamentu Jeral Estadu 2022 ne’ebe Prezidente Republika, Dr. Francisco Guterres Lu Olo promulga ho motante Biliaun $1.949. Situasaun ne’e obriga governu tenke kontinua foti osan husi Fundu Petrolíferu Biliaun $1.311 boot liu RSE (Rendimentu Sustentável Estimadu), pratika ne’e kontinua fó ameasa boot tebes ba sustentabilidade Fundu Petrolíferu. Parte seluk, dezenvolvimentu setór produtivu sira nafatin la hetan prioridade husi governu iha OJE 2022 hodi  asegura sustentabilidade ekonomia povu kiik sira nian.

Ba asuntu ne’e liuhusi konferénsia imprensa Koligasaun Agrikultura, Peskizadór Asuntu Agrikultura La’o Hamutuk Mariano Ferreira hateten katak, tuir observasaun no analiza ba Ministériu Agrikultura nian kona-ba OJE ne’ebe investe deit 1.9%, no aloka boot liu iha bens e servisu,  no mos iha salariu, entaun funsionáriu sira kontinua simu salariu kada fulan, maibe dezenvolvimentu agrikultura la dun la’o, tanba ne’e husu ba Governu tenke jere osan ne’e ho di’ak, hodi responde ba povu nia moris.

Iha konferénsia imprensa Mariano dehan, liga ho Orsamentu Jerál do Estadu  (OJE) 2022 nian, hanesan ema hatene katak husi proposta inísiu Governu propoin ba Parlamentu Nasionál, osan ho Biliaun $1.675 no ikus mai debate durante fulan ida, Parlamentu sira propoin tan proposta lubuk ida no hetan aprovasaun kuase barak no implika orsamentu ne’e aumenta ba $1.949.

“Ida ne’e hatudu katak OJE ba 2022 ninian boot tebes, no ita hatene katak iha alokasaun ba setór sira ne’e hanesan agrikultura husi total OJE $1.949, ne’e ba setór agrikultura hetan de’it 1.9% no orsamentu ida ne’e mak sei hala’o dezenvolvimentu agrikultura iha rai laran,” Dehan peskizadór La’o Hamutuk hafoin ba jornalista sira iha HASATIL Farol, 28/01.

Nia dehan husi parte Koligasaun Agrikultura Timor-Leste no HASATIL hanoin katak Orsamentu ne’e la sufisiente atu bele dezenvolve setór agrikultura, tanba sira hatene iha dadus Sensu Audentula iha 2019 hatudu katak, populasaun iha Timor-Leste 66% maioria  ne’e moris hanesan Agrikultór, entaun orsamentu $1.949 ne’e labele ajuda sira hodi bele hasa’e produsaun iha rai laran.

“Tanba ne’e mak ita hatene katak Governu ka Parlamentu Nasionál tenki tau atensaun ba setór agrikultura, tanba seItór ne’e  tuir loloos sai hanesan baze ba ekonomia nasaun nian, i ita hatene anotasaun seluk ba bee no Saneamentu ita haree populasaun iha Díli rasik mos nafatin problema ho bee no alokasaun OJE ne’e 1. 8% de’it ne’e kiik tebes,” hateten Mariano

Nia hatutan tanba ne’e mak sira haree tinan ba tinan governu nunka resolve bee moos iha Dili, sa’e tan ba área rural no munisipiu sira problema ne’e boot liu tan, ba setór saúde maiz menus 5% no ba setór edukasaun mais menus 9%.

 “Tuir ami nia observasaun katak seidauk natoon atu bele dezenvolve seitór importante ne’ebe mak povu barak presiza tebes kona-ba edukasaun, Saúde, Agrikultura no Saneamentu ne’e importante tebes ba povu nia moris,” dehan Mariano

Alokasaun $1.949 ne’e boot iha tinan ida ne’e ita sei eleisaun Prezidensial, entaun ami fiar katak  Governu sira bele halo bu’at balun, hodi bele dezenvolve seitór agrikultura, edukasaun, bee moos, Saúde no saneamentu di’ak liu tan ba povu nia moris.

Print Friendly, PDF & Email

LEAVE A REPLY

Please enter your comment!
Please enter your name here