Reportajen Adroaldo ‘Saretukau’
Timor-Leste Debating Group (TLDG) hamutuk ho United Nations Volunteers (UNV) organiza sesaun ida hodi fahe informasaun iha Sala Leitura Xanana Gusmão ba estudante no juventude sira konabá oinsá benefísiu sai nu’udar voluntáriu iha UN, dezafiu sira no oinsá aplika ba vaga sira mak sei publika UNV iha Timor-Leste, ne’ebé sei benefísiu ba dezenvolvimentu profisionalizmu pesoal.
Durante sesaun aprezentasaun, Kordenador voluntáriu UN Timor-Leste, Mario de Jesus Ximenes hatete, juventude sira presiza prepara aan di’ak, oinsá bele aplika atu sai Voluntáriu iha UN, tanba ida ne’e importante tebes ba joven sira, oinsá bele dezenvolve sira nia kapasidade, koñesimentu no abilidade hodi sai profisional ida di’ak iha futuru. Nia mos hatete katak dala barak ema hanoin, voluntáriu UN ne’e só ba de’it ema estranjeiru maibé lae, juventude Timor oan lubuk ida mak benefísia ona programa voluntáriu iha UN ba sira nia dezenvolvimentu pesoal iha
Alein de ne’e nia nia mos hato’o katak Timor oan sira prepara dezenvolve aan, “investe tempu hodi aprende,” nune’e bele sai mos voluntáriu iha estranjeiru hanesan ba Japaun, Korea no seluk tan. Nia enkoraja juventude sira atu labele haree de’it iha saída mak iha Timor, ita maibé matan tenki nakloke hodi haree liu hosi Timor, katak Timor ne’e illa ida, sai hosi ne’e sei iha Indonézia Austrália, Gambia no seluk tan, nia iha esperansa “loron ida Timor oan bele sai nu’udar vuntáriu internasional iha rai li’ur.”
Nia hatete objetivu primeiru hosi voluntáriu iha UN mak atu mobiliza voluntáriu Timor oan sai UNV iha rai laran i mobiliza mos kolega sira hosi rai li’ur atu sai UN volunteer iha rai laran.
“Durante ha’u kaer papel ida ne’e ha’u mehi loos atu servisu hamutuk ho ita nia governu, se governu bele kapasita ita nia Timor oan sira liu hosi kanal UNV, atu nune’e Timor oan sira labele hada’u malu de’it paun fuan ida iha rai laran, loloos ne’e bolus ba bou de’it iha rai li’ur ne’ebá, cuma ha’u nia alin sira lahatene oportumidade, tanba ne’e grasa Maromak nia hasoru ita boot hodi fahe ne’e ba ita boot sira,” hatete kordenador UNV Mario, 27/01.
Nia hatutan papel segundu mak atu halo advokasia ba voluntarizmu katak programa saída de’it tenki inklui voluntáriu nasoens unidas iha rai laran, terseiru mak atu integra voluntarizmu iha polítika ka lejizlasaun, nia relembra inundasaun iha dia 4 abril, iha grupu voluntáriu barak mak halo asaun hodi tulun komunidade vítima sira maibé ita la iha polítika ida hodi bele hamahan grupu sira ne’e, tanba ne’e sira aprosima ona ho Sekretáriu Estudu Juventude no Desportu hodi haree polítika ida ba juventude voluntáriu sira.
Hosi Janeiru 2021, Timor-Leste mobiliza 92 voluntáriu Nasoens Unidas, ne’ebé mak grasa Maromak maioria Timor oan. Hosi 92 ne’e ha’u bele dehan katak 50 i tal ne’e Timor oan.
Nia hatete katak voluntáriu sira ne’e mak servisu ho UNICEF, ILO, UN Women, USAID no ajesia seluk ne’ebé exists iha Timor ho sira nia área servisu oi-oin ne’ebé kuaze kobre munisípiu hotu iha Timor laran tomak.
Iha parte sorin fahe mos esperiénsia hosi voluntáriu internasional ida hosi nasaun Gambia, Áfrika ho naran Sulayman Marenah, fahe nia esperiénsia konabá benefísiu hosi voluntáriu internasional ida.
“Sai voluntáriu, ita prontu atu servisu iha ita nia komunidade ba ema sira mak besik ita. Ita mos iha misaun atu atinji project ba program ne’ebé ita servisu ba. Wainhira ita halo servisu internasional tanba ita iha skill ka abilidade no importante ita tenki fo impaktu pozitivu ba komunidade ne’ebé ita serve ba. Sai nu’udar vuluntariu tenki dedika aan ba komunidade refere, la’os sai hanesan tourista ida,” Sulayman hatete.
Nia hatete nu’udar voluntáriu ita ba la’os atu ajuda maibé fo impaktu ba ema nia moris. Tanba ajuda ita fo de’it, maibé tenki iha impaktu atu muda ema nia moris, nune’e mos aai voluntáriu internasional hanesan mos sai embaixador di’ak ba ita nia nasaun ho asaun ne’ebé ita hatudu.
Nia hato’o voluntáriu internasional la’os benefisia de’it ita nia aan hodi hetan abilidade maibé ba ema ne’ebé ita serve ba. Voluntáriu fo oportunidade ba ita atu espresa saída mak ita iha paixaun ba hanesan iha, jéneru, ambiente, saúde, no seluk.
“Sai volunttariu internasional ita mos iha oportunidade hasoru ema hosi nasaun oi-oin, aprende ema nia lian kultural no ita iha koneksasaun di’ak ho volunteer sira seluk hanesan Amerika, Korea, Japaun, tanba koneksasaun hanesan important ba dezenvolvimentu personal no iha iversidade parte importante ida oinsá ita servisu ho ema seluk,” nia salienta tan.
Kordenador voluntáriu UN iha Timor-Leste informa mos ba Timor oan sira ne’ebé iha interese atu sai voluntáriu iha UN bele komunika liu hosi haruka mensajen ba pájina ofisial Facebook UN Volunteer iha Timor-Leste hodi bele hetan informasaun klaru, tanba sei iha vaga barak ba Timor oan sira hodi aplika iha área oi-oin hanesan, agrikultura, saúde, komunikasaun no área seluk tuir ita nia esperiénsia no área estudu.
