Reportajen Estajiariu Isac Sarmento
Associação Académica Estudantil Faculdade de Educação e Humanidade(AAE FEH) no Associação Estudantil Departamentu(AED) Tetun hamutuk ho estudante ativu sira realiza konferensia imprensa hodi hato’o sira-nia insatisfasaun konaba manorin ho inisiál A.A.T ne’ebé deskonfia halo kobransa ilegál bá estudante sira, nune’e osan hirak ne’e utiliza fali bá manorin refere nia interese pribadu, tanba ne’e estudante sira ezije Faculdade no Universidade Nacional Timor Lorosa’e(UNTL) hodi foti medida lalais bá problema refere, karik laiha solusaun bá problema refere mak liu loron tolu estudante sira sei blokeia totál prosesu administrasaun no posibilidade bele to’o universidade.
Portavóz Auxiliadora de Santa Rosa hateten, aktus ilegál refere manorin ho inisiál A.A.T halo hasoru estudante sira hahú kedas iha tinan 2017, nune’e vítima sira sente insatisfasaun tanba osan husi kobransa ilegál refere manorin A.A.T utiliza fali bá nia interese pribadu, liuhusi situasaun ida ne’e halo trauma estudante sira no bá futuru bele estraga reputasaun UNTL nian tanba Campos ne’e fatin aprendizajen maibé nakfilak sai fali fatin korupsaun no prostetuta, tanba ne’e mak AAE FEH no AED Tetun hamutuk ho estudante ativu sira hola pozisaun hodi kontra injustisa refere.
Nia esplika, kazu refere nia kronolojia mak hanesan tuirmai, Dosente ho inisiál A.A.T haruka estudante sira atu kontribui osan bá atividade Bina-akrab entre estudante turnu 2022 ne’ebé organiza husi AED maibé manorin ne’e nafatin halo kontribuisaun atu organiza atividade refere bá etapa daruak nian no ikusmai estudante sira konsege kontribui osan, maibé osan hirak ne’e manorin inisiál A.A.T utiliza bá tiha rai li’ur no atividade Bina-akrab mós la realiza.
Dosente A.A.T halo mós kontribuisaun bá estudante nain lima(5) husi Departamentu Tetun turnu 2023 hodi cetak faru kamizola Amo Papa nia imajen wainhira Amo Papa atu mai vizita Timor iha 2024, maibé até a data estudante sira seidauk simu kamizola refere.
Iha 2017 dosente A.A.T mós halo kontribuisaun bá estudante sira atu sosa livru ho montante $17.50 maibé até agora estudante sira seidauk simu livru refere to’o estudante sira remata ona sira-nia estudu iha Departamentu tetun.
“Sorin seluk, hamutuk ho maklotak sira submete karta iha loron Sesta-Feira 29/05/2026, hafoin liu semana ida halo audiensia ho nia iha nia gabineti auditoria, iha loron Sesta-Feira 05/06/2026, nia promete atu devolve maklotak nia osan iha loron Segunda-Feira 08/06/2026, maibé to’o agora seidauk fo fila maklotak nia osan, tanba ne’e ami submete karta bá Magnífiku Reitór UNTL iha loron Segunda-Feira 15/06/2026 hodi hatuun despaisu bá konsellu disiplinár atu loke prosesu tuir dalan legál bá aktu prostetuta ka ilegál ne’ebé akontese iha Departamentu Tetun” Dehan Portavóz Auxiliadora de Santa Roza liuhusi konferénsia imprensa ne’ebé halo iha Campos Liceu UNTL (17/06/2026).
Nia haktuir, ho kazu refere estudante sira nota katak iha tendénsia boot atu kontinua akontese iha FEH no posibilidade sei akontese tan kobransa ilegál bá estudante sira no iha mós tendénsia bá manorin inisiál A.A.T halo manipulasaun bá osan $4.000 ne’ebé mak aloka bá semana kulturál, tanba tinan ida ne’e manorin A.A.T mak sai prezidente komisaun bá atividade refere.
Ho razaun hirak ne’e mak AAE FEH no AED Tetun ezije bá estrutura Departamentu, fakuldade no mós universidade hodi halo kontrolu másimu bá Departamentu hotu iha FEH, sira mós ezije Universidade liu-liu reitór atu hatun despaixu bá konsellu disiplinár hodi bele prosesa tuir Lei no norma sira ne’ebé estabelese iha UNTL, nune’e mós sira alerta bá sivita akadémiku no estudante ativu sira atu nafatin firme hodi kontra injustisa refere.
“Ho ezijénsia ne’ebé deskreve ona iha leten mak Faculdade no Universidade la lalais foti medida hodi resolve bá problema hirak ne’e, iha loron tolu tuimai Assiciação Académica Estudantil FEH ho AED Departamentu sanulu sei junta forsa hamutuk hodi blokeia totál prosesu administrasaun iha Faculdade no posibilidade bele to’o iha Universidade” Konklui portavóz Auxiliadora de Santa Rosa.
