Reportajen Estajiariu Isac Sarmento
Universidade Nacional Timor Lorosa’e(UNTL) liuhusi Asosiasaun Akadémika Estudantil Faculdade Educação e Humanidades(AAE-FEH) hamutuk ho Asosiasaun Estudantil Departamento Física(AEDF) realiza konferensia imprensa hodi hato’o sira-nia lamentasaun relasionadu ho Diretora Departamento Física ne’ebé mak impede estudante nain 25 hodi labele tuir prátika pedagojia 2, nune’e karik estrutura Faculdade no Departamento lá rezolve problema refere mak estudante sira sei halo asaun pasifika.
Portavoz Romario Mali Alves Leite hateten, UNTL hanesan instituisaun públika ne’ebé vinkula ho prinsipiu legaldade atu garante hodi kontribui bá Universidade ida sai sentru exelensia iha Timor-Leste, nune’e AAE-FEH hanesan reprezenta estudante hodi defende direitus no interese estudante sira-nian konsidera katak estudante nu’udar elementu importante ida iha UNTL hodi kumprimenta bá trés pillares akadémika hanesan, estudu, peskiza no kontrolu sosiál no buka atu sai sentru exelensia bá ensinu superior iha Timor-Leste hodi reflete bá nia moto “matenek no lia loos” signifika UNTL produz ema matenek ida la’os bosokdor no manipuladór.
“Faculdade Educação Departamento de Física ne’ebé kada tinan sempre hala’o prátika pedagojia 2 no programa estajiu hanesan mós komponente prinsipál ida husi kurikulu akadémiku, estajiu ne’e mós direitu ida estudante sira-nian ho objetivu atu prátika bá teoria sira ne’ebé durante ne’e estudante sira aprende ona hodi bele hasa’e konesementu estudante sira-nian atu bele garante kualidade edukasaun, maibé estudante barak hetan impedimentu husi Diretora Departamento Física iha Faculdade Educação” dehan portavoz Romario Mali Alves Leite liuhusi konferensia imprensa iha Kampus FEH Liceu UNTL (11/06).
Nia dehan tan, relasiona ho problema sira ne’e AAE-FEH hetan informasaun husi estudante Departamento Física sira katak estrutura Departamento liuhusi diretora Física tenta halo falsifikasaun notas estudante sira ne’ebé atu tun prátika pedagojia 2, tanba estudante barak liu ona materia maibé kuandu públika naran estudante sira kontinua kreditu materia refere no estudante hetan kreditu materia ida ou rua de’it maibé iha administrasaun to’o fali 4 no 5, estudante sira mós kumpri ona nia dever tuir aula no ezame maibé valór kontinua laiha administrasaun tanba ne’e prezudika bá estudante sira atu tun prátika pedagojia 2, nune’e mós AAE-FEH rona informasaun katak Diretora Departamento Física impede estudante nain 25 atu tun estajiu.
Liuhusi problema ida ne’e mós AAE-FEH hamutuk ho AED-EF durante ne’e ne’e buka detallu maneira hodi konsulta ho estrutura fakuldade no departamentu atu halo esklaresimentu bá estudante sira ne’ebé atu tun prátika pedagojia 2, maibé estrutura fakuldade no departamentu halo kontradisaun bá malu, signifika diretora departamentu física uza nia ignoransia no arogansia lakohi obdese bá desizaun fakuldade nian hanesan orgaun maximu iha fakuldade até lahetan solusaun bá problema estudante departamentu física nian.
Nia dehan tan iha dia 01 de junho de 2026 sira bá hasoru Vice Decano Asuntu akadémiku no Vice Decano hateten katak UNTL liuhusi nia regulamentu akadémiku la limita estudante sira hodi bá hala’o prátika pedagojia 2 no prátika pedagojia 2 ida ne’e ezijensia husi kurikulu ECTS ne’ebé mak ohin loron UNTL uza, signifika estudante hotu-hotu iha direitu tomak atu bá kompleta nia estudu refere, tanba ne’e sira konsidera diretora la konkorda ho regulamentu akadémika ne’ebé mak UNTL iha no viola sistema ECTS ne’ebé ohin loron UNTL adopta.
“Husi problema ne’ebé ami sita iha leten nia kauza loloos mak, 1. Diretora departamentu uza nia poder hodi influensia administrasaun halakon estudante nia valór no hasa’e ka hatuun estudante sira-nia valór tuir diretora nia vontade, 2. diretora uza nia ignoransia hodi la buka solusaun bá problema ne’ebé estudante sira infrenta, 3. diretora inkapasidade no diretora la komprende regulamentu no kurikulu ne’ebé universidade adopta até viola estudante nia direitu” dehan portavoz Romario Mali Alves Leite
Liuhusi problema refere estudante sira husu Dekanu FEH atu rezolve imediatente problema ne’e hodi estudante departamento física hamumuk nain 62 bele tun prátika pedagojia 2, no husu bá dekanu tau atensaun maximu bá diretór departamentu no administrasaun departamentu atu labele repete aktu inmoral no inkapasidade ne’e, nune’e mós sira husu bá Magnifiku reitór atu tun halo fiskalizasaun bebeik atu nune’e evita hahalok sira ne’ebé intensaun atu hamonu no estraga dignidade UNTL nian iha públiku karik estudante sira-nia ejizensia hirak ne’e mak estrutura departamentu no fakuldade tenta ignora durante loron 3 nia laran mak sira kompromitidu sei halo asaun pasifika hasoru estrutura fakuldade hodi blokeia espasu no posibilidade to’o estrutura universidade.
