Reportajen David Costa
Iha komunidade Imprensa ne’ebe Neon Metin asesu ohin husi Gabinete Primeiru-Ministru, Komunidade iha Bairu Bi-Eli, Suku Bene-Ufe, Sub Rejiaun Nitibe, Rejiaun Administrativa Espesiál Oecusse Ambeno (RAEOA), rekomenda bá IX Governu Konstitusionál ne’ebé lidera hosi Primeiru-Ministru (PM), Kay Rala Xanana Gusmão atu loke estrada bá bairru ne’e hodi fasilita movimentu komunidade nian.
Komunidade husu ne’e bainhira Primeiru-Ministru (PM), Kay Rala Xanana Gusmão hala’o observasaun bá projetu emerjénsia reabilitasaun estrada ligasaun hosi Suku Taiboko, Sub Rejiaun Pante Makasar, kobre husi Suku Usitaku, Sub Rejiaun Nitibe, to’o suku Lela-Ufe, Sub Rejiaun Nitibe, Rejiaun Administrativa Espesiál Oecusse Ambeno (RAEOA) iha Kuarta 19/02.
Iha oportunidade ne’e, Primeiru-Ministru konsege hakat to’o iha aldeia Lamási, Suku Bene-Ufe no hala‘o mós diálogu ho komunidade ne’ebé marka mós prezensa hosi populasaun okupante bairu Bi-Eli.
Komunidade hosi bairu Bi-Eli ho naran Lamberto Falo aproveita prezensa Primeiru-Ministru iha aldeia ne’e rekomenda atu Governu tau-matan hodi loke estrada bá to’o Bi-Eli, atu nune’e komunidade bele uza tanba durante ne’e uza dalan korta no ai-laran de’it.
“Ha’u la husu buat seluk, ha’u husu de’it mak loke estrada bá ami-nia bairu. Tanba ami komunidade durante ne’e movimentu liu-hosi dalan korta, liu-hosi ai-laran tuan,” Lamberto Falo rekomenda ba governu.
Populasaun iha bairu ne’e to‘o agora labele halo uma mutin tanba estrada laiha atu tula materiál inklui rai-henek.
Rekomenda mós atu loke eskola filiál ruma, postu atendimentu saúde no mós postu Seguransa tanba bairu ne’e besik liu ho fronteira Indonézia ne’ebé dook tebes hosi Oecusse Vila.
Primeiru-Ministru, Kay Rala Xanana Gusmão kontente ho rekomendasaun ne’e tanba ne’e hanesan asuntu importante tebes la’ós de’it bá bairu Bi-Eli maibé mós fatin barak tán iha territóriu tomak no sei tau iha planu atu bele hato’o bá autoridade RAEOA hodi konsidera iha planu dezenvolvimentu futuru.
Bairu Bi-Eli oras-ne’e daudaun iha komunidade uma-ka’in 20-resin ne’ebé hela iha area ne’ebe izoladu liu besik área inur fronteira ho parte Amfoang Timur, Kupang, Nusa Tenggara Timur (NTT), Indonézia.
Vizita ne’e akompaña hosi Diretór Ajénsia Dezenvolvimentu Nasionál (ADN), Rui Lourenço da Costa, Diretór Kompañia Rynaldós Unip Lda, Rofino da Costa Rao, parte Obras Públika Rejionál, Autoridade Protesaun Sivíl Rejionál, Komandante PNTL RAEOA no seguransa.
