Reportajen David da Costa
Sarani Katolika iha Timor-Leste, liu-liu Sarani sira iha Paroquia Imaculada Coração De Maria Maubisse, iha esperansa boot ba Amo Papa Fransisco atu nune’e bele rekupera lalais fali nia saúde.
Lourenço Martins Sarmento, Sarani husi paroquia Imaculada Coração De Maria Maubisse, hateten, sira hadomi tebes Amo Papa Fransisco, maibé sira mos la espera katak Papa Fransisco bele hetan moras iha Roma ne’ebá.
“Ami hadomi tebe-tebes Amo Papa durante mai iha Timor-Leste. Ami nu’udar sarani liu-liu ami paroquia Maubisse ne’e ami kontente tebe-tebes, maibé ami la espera katak Amo Papa iha kondisaun ne’ebe grave iha ne’ebá” dehan Sarani Katolika Lourenço Martins Sarmento ba Neon Metin iha Paroquia Imaculada Coração De Maria iha Maubisse, Domingo 23/02.
Tanba ne’e, nu’udár sarani katolika iha Maubisse, nafatin reza ba Amo papa Fransisco ne’ebe mak moras iha Roma ne’ebá, atu nune’e bele rekupera lalais fali nia saúde.
“Ha’u nia esperansa maka tenke reza boot ba Amo papa, ne’ebe mak diak tebe-tebes durante mai iha Timor-Leste,” Nia esperansa.
Domingas Mendonça paição, mos hanesan Sarani katolika iha Maubisse, hateten, hakarak husu ba Maromak bele hakbesik nafatin ba Amo Papa Fransisco, fó isin diak nafatin ba nia, atu hele rekupera lalais husi nia moras ne’ebe agora nia hasoru hela ne’e.
“Mai ita sarani katolik ne’ebe iha Timor laran ne’e, bele reza makaas husu ajuda para Amo Papa bele sai lalais husi hospital,” Nia husu sarani katolika iha Timor-Leste.
“Hau nia esperansa boot ba Amo papa, mak nia bele diak lalais, Tanba ami husu nafatin reza, ami nu’udar sarani iha Timor reza makaas ba amo Papa nafatin,” Nia esperansa.
Nune’e mos Sarani katolika Manuela Salsina husi Paroquia Maubisse, hateten, Nia husu ba Maromak tulun nafatin Amo Papa Fransisco ne’ebe maka hanesan liman ain rohan ne’ebe tun mai iha rai Timor hodi vizita ba mundu tomak.
“Ami hanesan inan aman ne’ebe la matenek maibe hanesan ami nia fuan maka matenek, ami loron ho kalan halo orasaun husu ba Maromak atu tulun amo Papa para diak lalais,” Nia dehan.
Padre Arnaldo Federico Dedeus nu’udar Bigariu iha paroquia Imaculada Coração De Maria Maubisse hateten, Sarani sira nia prepurasaun hanesan santu padre vizita tiha ona Timor hanesan lori grasa Maromak nian ba rai Timor-Leste.
Sarani hotu-hotu haksolok ho Amo Papa nia prezensa iha Timor, sarani hotu-hotu iha esperiensia Defé, sarani hotu-hotu sente katak kristu nia prezensa iha Timor ne’e portifika sarani sira nia fé.
“Tanba iha momentu ne’e, ita nia Amo Papa hanesan lidera dahuluk iha ita nia uma kreda ne’ebe hetan moras iha ninia aan, fisiku , depois ita hotu-hotu iha esperansa katak nia tenke diak lalais. Tanba nia foin mai vizita deit ita, maibé nia idade entaun nia moras, ita rona nia sofre, ita nu’udar sarani ita iha obrigasaun reza ba nia,” Nia dehan.
Nia mos haktuir, bainhira Amo Papa Fransisco elitu ba Papa nia husu sarani katolika sira atu resa ba nia maka reza ami aman, Ave Maria no Gloria ba nia. Tnaba ne’e horseik no bainrua rona Papa Fransisco moras, avizu kedas ba sarani sira atu halo orasaun loron-loron ba Amo papa Fransisco.
“Ita rona informasaun ne’e iha horseik no hodi bainrua, ita rona tiha ona, buka nafatin reza no sarani sira nia orasaun loron-loron, tanba Amo Papa rasik momentu eleitu ba Papa nia husu ba ita maka reza ami aman ida, Ave Maria ida Gloria dala ida ba nia. ita hotu nia intensaun ba amo Papa ne’e sempre reza i Amo Papa husu ida ne’e ba ita bainhira nia sai Amo Papa,” Nia esplika.
Tanba ne’e nu’udar sarani iha obrigasaun reza nafatin ba Amo Papa Fransisco ho orasaun ne’ebe hanesan ho devosaun ba Amo papa ninia padroeira hanesan Saun Fransisco asis reza ba nia atu bele fó forsa ba amo Papa hodi bele simu ai-moruk sira ho domin ho karidade dotor sira nia no orasaun ema fiar nain sira nian, nia bele rekopera fali hodi hala’o nia knaar nu’udar bibi atan iha kristu nian, iha Igreja universal.
