Asosiasaun Akademiku Estudantil-Fakuldade Edukasaun Humanidade (AAE-FEH UNTL) hamutuk ho estudante departamentu lian portugeza fakuldade edukasaun UNTL preokupa ho dosente iha departamentu neebe dadaun nee iha dosente ativu nain ida deit, tanba dosente seluk iha ona notifikasaun ba reforma tuir lei numeiru 09/2025 konaba reforma funsionariu neebe atinji idade 65, husi problema refere sira hatoo ona estrutura fakuldade too universidade maibe seidauk kontratu dosente ruma atu hanorin iha departamentu lian portugeza maskí prosesu aprendisajen hahu tiha ona iha fulan kotuk tuir orariu universidade nian.
Portavoz estudante Januario dos Espirito Santo dehan, tuir lei numeiru 09/2025 konaba reforma obrigatoriu ba funsionariu neebe atinji ona idade 65, afeta tebes ba funsionamentu departamentu nian tanba dosente sira neebe hanorin iha departamentu lingua portugeza hamutuk nain 14, husi nee nain ida dadaun nee halao hela ninia kursu doutoramentu iha brazil no nain sanulu resin ida maka notifikadu hanesan dosente reformadu nunee iha dosente nain ida deit maka dadaun nee halo hela nia funsaun hanesan visi-diretora iha departamentu, nunee ameasa tebes ba funsionamentu departamentu nian liuliu prosesu ensinu nian.
“ho situasuan ida nee asosiasaun estudantil departamentu hamutuk ho asosiasaun fakuldade nian submete ona karta ba iha dekanu fakuldade edukasaun iha loron 3 fulan fevereiru tinan 2026, nunee mos AAE-FEH hasoru direita halo audensia ho estrutura fakuldade iha loron 16 fulan fevereiru iha reuniaun nivel asosisasaun estudantil ho magnifiku reitor maibe seidauk iha klarifikasaun serteza nunee iha loron 19 tinan nee assosiasaun akademiku konfirma ho fakuldade maibe laiha resposta” dehan Portavoz estudante Januario dos Espirito Santo liuhusi konferensia imprensa neebe halo iha kampun liceu UNTL, (20/02).
Nia dehan tan, tanba nee AAE-FEH hatoo ba estrutura fakuldade no universidade atu urjentimente resolve problema problema neebe lao hela iha departamentu lingua portugeza, nunee husi problema refere halo estudante sira sai vitima tanba estudante sira seidauk bele tuir aula iha departamentu tanba menus dosente iha departamentu lingua portugeza maski tuir kalendariu akademiku nian aula hahu iha loron 16/02/2026, nunee too dadaun nee estudante sira seidauk bele halo planifikasuan ba sira nia fixa planifikasaun estudu, orariu ba estajiu no peskiza seidauk serteza ba estudante sira mezmu estudante sira livre ona teoria tanba laiha dosente sira atu akompana estudante sira.
“difikulta estudante sira neebe iha hela prosesu atu ba ezame monografia no iha posibilidade boot laiha graduasaun departamentu ensinu lingua portugeza iha primeira faze” dehan Portavoz estudante Januario dos Espirito Santo.
Estudante Fernão Andre da Costa dehan, lei ba reforma obrigatoriu nee hasai iha tinan kotuk maibe tanba saida maka parte universidade no fakuldade lakohi toma responsabilidade ba problema refere hodi afeta ba estudante sira nia prosesu aprendisajen tanba nee sira husu ba estrutura fakuldade no univerdade atu bele resolve lalais problema refere iha departamentu ensinu lingua portugeza.
“ami koko konfirma ho parte universidade no fakuldade maibe professor sira neebe atu mai hanorin atu halo kontratu nee seiduak klaru, signifika katak husi parte universidade no fakuldade laiha komunikasaun neebe hanesan entaun ida nee nia impaktu nee ba fali estudante sira” dehan Estudante Fernão Andre da Costa.
Nunee estudante Alfredo Carvalho dehan, sira halo ona audensia ho reitor maibe sira sente resposta husi reitor nee la klaru tanba seidauk iha despaxu ba rekrutamentu ba dosente sira atu hanorin iha departamentu lingua portugeza, tanba nee sira lamenta ho situasaun refere tanba tuir orariu akademiku nian prosesu aprendizajen lao hahu tiha ona, maibe iha sira nia departamentu rasik aula seidauk bele lao tanba laiha dosente atu hanorin.
