Home Notisia EBC Ura-hou, Manorin Voluntariu Hamutuk 22: Ami Hanorin Tanba Hadomi Ami nia...

EBC Ura-hou, Manorin Voluntariu Hamutuk 22: Ami Hanorin Tanba Hadomi Ami nia Suku

507
0
EBC Dato-Soco Ura-hou Municipiu Ermera. [Foto: Francisco JDA | 19.01.2020]

Reportazen Francisco JDA

“Hau lakohi rai matenek ne’ebe hau aprende hosi fatin seluk, maibe hau hakarak fahe mos ba hau nia alin sira suku ida ne’e, tanba hau lakoi hau nia suku, alin sira nafatin izoladu katak sira mos iha oportunidade atu aprende no prepara sira nia an ba futuru”. Jacinto

Edukasaun mak baze fundamental, atu prepara ema ida, hodi kontribui ba rai ida ne’e, ho nia matenek. Prinsipiu hosi luta ba ukun rasik an mak atu hasai povu hosi mukit, bainhira povu ida asesu edukasaun diak, mukit mos sei lakon.

Suku Urahou, iha postu administrativo Hatulia, Municipio Ermera, kuaze 60km hosi Gleno, hodi to’o ba iha Urahou. Rai ne’ebe bele dehan rural tebes tanba komunidade sedauk asesu eletricidade no estrada.

Iha suku ida ne’e joven balun hili nia dalan sai manorin voluntariu iha eskola terseiru siklu ka pre sekundaria Urahou.

Jornalista Neon Metin dada lia ho Reprezentante Koordenador EBC Dato-Soco Ura-hou Municipiu Ermera, Gabriel Soares dos Santos, hodi fahe informasaun liga ho manorin sira ne’ebe hanorin voluntariu.

“Profesores voluntario sira hanorin kleur ona, maibe Ministerio Edukasaun seidauk koalia buat ruma konaba servisu voluntáriu no kontratadu. Importante liu mak ba mestre/a sira ne’ebe voluntário, liu-liu iha Pre-Eskolar nain rua, no voluntario ba 3 siculu nain 22, ne’e mak ami nia prekupasaun. Loke 3 siculu maibe professor voluntario deit mak hanorin, estadu seidauk rekoinese sira, fo sira nia vida ba eskola ida ne’e. Iha mos akordu balun hosi xefe Municipal, laos selu hosi eskola maibe ida ne’e hanesan kontribuisaun hosi inan-aman ba professor kontribuidor ne’ebe dadaun ne’e hanorin hela”, dehan Gabriel iha Sede Sucu Ura-hou, 18/01.

Gabriel mos hateten katak profesores sira tur hamutuk ho inan aman, nune’e fo kontribuisaun $3.00 – $5.00 dollar ba eskola, atu hare ba futuru oan sira nian, la significa selu eskola maibe nudar kontribuisaun ba manorins sira ne’ebe hanorin ho voluntariu

Iha fatin hanesan manorin voluntariu, Tereza Maria Carvalho Soares tenik ba Neon Metin katak maske la hetan salariu hodi hanorin eskola, maibe hanesan Timor oan no Ura-hou oan iha matenek oituan nune’e fahe ba alunus sira.

“Husu ba Governu sira bele mos tau matan netik mai ami, laos fo osan barak maibe osan oituan nune’e bele sustenta netik ba ami nia familia sira, maske ami osan la iha mos mai nafatin, husu ba governu tau prioridade ba edukasaun”, dehan Tereza

Joven seluk ne’ebe fo an nudar manorin voluntariu iha eskola refere mak Jacinto Marcal Soares, hanorin lingua Tetum. Ba Neon Metin ho haksolok Jacinto hateten, nudar joven ida lakohi rai matenek ne’ebe hetan ona iha fatin seluk, maibe hakarak fahe mos ba alin sira iha nia suku rasik.

“Hau lakohi rai matenek ne’ebe hau aprende hosi fatin seluk, maibe hau hakarak fahe mos ba hau nia alin sira suku ida ne’e, tanba hau lakoi hau nia suku, alin sira nafatin izoladu katak sira mos iha oportunidade atu aprende no prepara sira nia an ba futuru”, hateten Jacinto

Jacinto hatutan katak hanorin laos tanba osan, maibe tanba hakarak kontribui ba nia suku liu hosi edukasaun,“bainhira ita koalia konaba edukasaun, ita nia edukasaun mak importante liu, edukasaun tenke ho kualidade diak, atu hanorin sai ema, hahu ho edukasaun ne’ebe kualidade”.

Jacinto ne’ebe remata nia estudua iha Univerisidade UNITAL hahu hanorin iha eskola Urahou iha tinan ida ne’e. Inan-aman sira selu sira kada estudante $5.00, nudar kontribuisaun hosi inan-aman, atu nune’e oan sira la lakon sira nia esperansa atu sai estudante ne’ebe prontu serbi nasaun ida ne’e.

Tuir observasaun hosi jornalista Neon Metin, eskola EBC Dato-Soco Ura-hou sedauk iha biblioteca ba estudante sira atu bele buka referensia balun. Tinan naruk ona eskola sira iha teritoria tomak infrenta problema hanesan, sa tan ho orsamentu ne’ebe la aprova iha Parlamentu Nasional, karik mehi atu iha biblioteca iha eskola sira sei kontinu pendete.

LEAVE A REPLY

Please enter your comment!
Please enter your name here