Home Notisia Entrevista ho Embaixadora TL iha Malásia Maria Olandina, Kanselamentu Viajem Pasajeiru na’in...

Entrevista ho Embaixadora TL iha Malásia Maria Olandina, Kanselamentu Viajem Pasajeiru na’in 50 resin iha KL

2333
0
Embaixadora Timor-Leste iha Malásia, Senhora Maria Olandina Isabel Caeiro Alves. [Foto: copyright google | 01.05.2021]

Reportazen redasaun Neon Metin

Neon Metin halo entrevista ho Embaixadora Timor-Leste iha Malásia, Senhora Maria Olandina Isabel Caeiro Alves konaba kazu kanselamentu viajem pasajeriu timoroan na’in 50 resin iha Aeroportu Internasional Kuala Lumpur (KL), Malásia, iha loron 18 abril 2021. Entrevista halo via surat eletronika (e-mail).  Objetivu entervista atu konfirma asistensia no intervensaun ne’ebe parte Embaixada fo atu tulun solusaun ba problema ne’ebe pasajeiru timoroan sira ne’e hasoru. Resposta hosi Senhora Embaixadora, Redasaun Neon Metin simu iha loron 26 Abril.

Embaixada hatene konaba kazu ne’e? Se hatene, bele deskreve problema nia hun sa ida los?

Klaru que Embaixada hatene kazu ne’e no akompanha to’o hetan solusaun. Iha  18 de Abril kalan Embaixada simu informasaun liu husi telefone katak pasajeiru na’in 53 ne’ebe to’o hosi Dili mai atu halo viagem ba Reino Unido, la bele kontinua sira nia viajem. Kalan ne’e kedas ha’u telefone parte Consular ne’ebe hala’o hela knar iha aeroporto, Senhor Leonildo, no fo instrusaun ba nia hodi konfirma asuntu refere. Senhor Leonildo buka tuir kedas no akompanha  Malindo Air, kompanhia aérea ne’ebe tula pasajeiru  sira mai hosi Dili, enkaminha sira ba iha hotel transit Sama Sama Express. Iha 19 de abril 2021 Embaixada simu informasaun ‘por escrito’ husi kompanhia aérea Malindo Air katak pasajeiru na’in 53 (18 ho passaporte Portugal no 35 ho passaporte Timor-Leste) ne’ebe mai hosi Dili atu halo viagem ba  Reino Unido labele kontinua  tanba: bainhira sira check-in iha kompanhia aérea KLM Royal Duch Airline, KLM lakohi tula sira ho razaun fundamento 2 hanesan tuir mai nee: ida,pasajeiru sira halo Check-in ‘em grupo’ boot iha ‘ultimos minutos’. Situasaun ne’e hamosu konfuzaun boot ba parte KLM, liliu kona ba sira nia ‘motivo de viagem’. Rua, Pasajeiru sira ho passaporte Timor-Leste ho rute (itinerariu) viajem ne’ebe la tuir prosedur (Dili – Kuala Lumpur – Reino Unido “fulan ida. (1)” – Lisboa). Rute refere la kumpri prosedur normal. Ida ne’e katak pasajeiru ho passaporte Timor-Leste, hafoin vizita tiha nasaun ida seluk, nia tenki fila hikas ba nia nasaun orijem. Iha kazu ne’e, pasajeiru na’in 35 ne’ebe uza passaporte Timor-Leste tenki fila fali ba Timor-Leste, maibe iha sira nia bilhete de viagem ne’ebe hasai husi ajensia viajem, ‘ultimo destination’ maka fali Lisboa, Portugal.

Bazeia ba kestaun fundamental rua iha leten maka kompanhia Malindo Air husu apoiu ba UK Immigration Enforcement International Border iha British High Commission Kuala Lumpur hodi halo profiling/entrevista pasajeiru sira hodi hatene motivu viajem no legalidade dokumentu tuir prosedur UK Brexit. Iha ne’e identifika katak dokumentu balun hatudu dúvidas no la preenxe rekezitu atu tama iha Reino Unido ka ho kategoria Not to Land/NTL ka Inadmissible passengers/INAD, no husu ba kompanhia Malindo Air para lori sira fila ba nasaun origim, Timor-Leste.

Iha esplikasaun Senhor Pedro Carrascalão nia iha imprensa Timor-Leste katak razaun tanba kualidade teste swab iha Timor-Leste. Bele konfirma ida ne’e?

Hosi British High Commission Kuala Lumpur kestiona kona ba rezultadu Polymerase Chain Reaction (PCR) Test, maibe hosi kompanhia Malindo Air nune’e mos hosi Embaixada konsidera katak, iha falhansu iha kestaun tekniku-administrativu. La’os PCR test ne’e mak la iha kualidade. Ami haree ho atensaun tebes dokumentu PCR Test ne’e.

Iha imprensa Timor-Leste mosu impresaun katak Embaixada Timor-Leste la proativu atu fo asistensia ba timoroan sira durante iha aeropotru. Bele klarifika? Se iha asistensia ruma, bele identifika.

Embaixada proativo. Hahu kedas husi kalan 18 abril, ami halo akompanhamentu loron loron  ba sira iha aeroportu. Ami fo hatene ba sira kona ba SOP Covid-19 nebe rigorozu, tanba bainhira la kumpri selu multa RM 1,000 (besik USD 250). Iha 19 abril de’it mak ami labele akompanha sira tanba sira hasoru hela prosesu profiling/entrevista hosi British High Commission Kuala Lumpur. Iha 24 abril (tk 03:30 dader) de’it ami iha fali ona aeroportu hodi fanun sira ba halo check-out husi hotel hodi ba check in iha counter Malindo Air, tanba aviaun sai husi Malásia ba Dili tk 07:10. Liu husi koordenasaun intensivu entre Embaixada ho parte British High Commission Kuala Lumpur, kompanhia Malindo Air no Sr. Pedro Carrascalão, ikus mai iha konkordansia katak sira ne’ebe ho passaporte Portugal, na’in 18 bele kontinua sira nia viajem ba Reino Unido  ho KLM. Ne’e akontese hafoin sira rasik ho koordenasaun ho sira nia kolega seluk iha UK trata no preenxe requezitu hodi bele tama ba Reino Unido, inklui PCR Test ne’ebe sira halo iha dia 23 de Abril 2021 iha Klinika Kuala Lumpur International Airport. Rezultadu PCR test hatudu pasajeiru na’in 17 negativu no na’in ida pozitivu. Sira ne’ebe negativu bele halo viagem no na’in ida (1) ne’ebe pozitivu tenki hela iha izolamento, iha Silka Hotel Cheras Kuala Lumpur, Malásia. Pasaeiru na’in 35 ne’ebe ho passaporte Timor-Leste fila ba Timor iha 24 de Abril 2021 fila ba Dili. Embaixada hakarak informa mos katak to’o loron nebe pasajeiru sira ne husik KLIA airport (24-04-2021) parte Governo Malásia nia imigrasaun seidauk intervein iha asuntu ne’e. Ida ne’e hatudu koordenasaun ne’ebe di’ak. Iha problema pasajeiru na’in 53 ne’e LA’OS Autoridade Imigrasaun Malásia mak deskonfia pasajeiru sira nia dokumentu viajem, maibe parte kompanhia aérea KLM mak iha dúvida ba sira nia dokumentu hanesan ha’u esplika iha leten. Hatan ba sa ida mak media nasional balun hakerek, ha’u hakarak hateten katak, ami hili servisu ho nonok no hare rezultadu. Koordenasaun ho MNEC la’o desde inisiu kedas bainhira problema mosu. Embaixada kontinua update ba MNEC kona ba evolusaun iha terrenu. Nonok la’os la hala’o servisu no sa ida mak hala’o mos la’os atu relata iha FB (Facebook). Iha ona kanal propriu hodi hato’o relatoriu.

Oinsa ho pasajeiru timoroan ne’ebe sei iha izolamentu? Ami hetan informasaun katak nia sente stress los

Kona ba situasaun timoroan ne’ebe dadaun ne’e iha hela izolamento, tuir protokolu COVID-19 ne’ebe vigora, labele hetan vizita. Ha’u fiar katak ema hotu ne’ebe iha izolamento sente stress duni tanba sira mesak no dook husi ema hotu. Bainhira nia periudu izolamento remata, katak nia rezultadu PCR test negativu ona, nia bele kontinua nia viajem ba Lisboa, Portugal, tanba nia uza passaporte portugues.

Print Friendly, PDF & Email

LEAVE A REPLY

Please enter your comment!
Please enter your name here