Home Notisia Viajen Problemátika ho Malindo Air, Problema nia hun no nia Solusaun

Viajen Problemátika ho Malindo Air, Problema nia hun no nia Solusaun

2438
0
Aviaun Malindo Airlines iha aeroporto Kuala Lumpur. [Foto: Copyright fcebook | 01.05.2021]

Reportazen Zevonia Vieira, David da Costa

Aviaun Malindo ho No. flight OD 8214 tula Pasajeiru na’in 90, maioria timoroan ne’ebé deskola (take off) hosi Aeroportu Internasionál Nicolau Lobato, Dili, iha loron 18 Abríl 2021, tuku 09:00 dadeer, ho destinu final Aeroportu Internasionál Kuala Lumpur, Selangor-Malázia. Pasajeiru timoroan sira iha aviaun ne’e, nia destinu final mak Aeroportu Internasionál Heathrow, Londres, Inglaterra. Hosi itineráriu ne’ebé hakerek iha billete, hosi Kuala Lumpur pasajeiru timoroan sira ne’e sei halo “connecting flight” ba Inglaterra ho kompañia aérea KLM ne’ebé sei transit iha Aeroportu Schiphol, Amsterdam, Olanda.

Karik bainhira sai hosi Dili, timoroan sira ne’e laran haksolok tanba dalan atu konkretiza mehi ne’ebé kuda iha sira ida-idak nia neon hahú luan, maibé aviaun Malindo nia tuun iha Aeroportu Internasionál Kuala Lumpur, tuku 12:10 meiudia, oras Malázia nian, hatún mós sira nia mehi. Sira nia mehi ne’ebé fofoun aas ho aviaun Malindo nia semo nakfilak sai mehi-aat. Mehi-aat liu mak pasajeiru timoroan na’in 35. Hafoin trankadu ho laran taridu iha Aeroportu Kuala Lumpur besik semana ida, kompañia aérea Malindo ho intermédiu Pedro Carrascalão deside tula fila sira mai Dili iha loron 24Abril 2021.

Situasaun ne’ebé pasajeiru timoroan sira ne’e hasoru iha Aeroportu Kuala Lumpur, aleinde sai notísia primeira pájina iha media nasionál balun, sai mos diskusaun publika iha media sosiál. Opiniaun sira iha notísia no media nasional atribui kulpa ba ajénsia viajen NARPOV. Hanoin balun, liuliu iha media social buka atribui kulpa ba governu, liuliu Ministériu Negósiu Estranjeiru no Kooperasaun. Seluk akuza Embaixada Timor-Leste iha Malázia “la halo buat ida.”

Bainhira ho intermédiu Pedro Carrascalão, kompañia aérea Malindo deside tula fila pasajeiru timoroan na’in 35 mai Dili, opiniaun sira iha media nasionál hahi’i no tane Pedro nu’udar “salvadór” ba situasaun ne’ebé mosu iha Aeroportu Kuala Lumpur hasoru timoroan sira ne’e. Pedro sai “salvadór” tanba tuir opiniaun iha media nasionál no media social, la’os de’it fó solusaun atu aluga aviaun Malindo tula fila timoroan na’in 35 ne’e fila mai Dili, maibé mós tanba Pedro mak sustenta timoroan sira ne’e nia akomodasaun, hahán no hotel, durante besik semana ida iha Malázia. Ajénsia viajem NARPOV ho governu Timor-Leste sai “pecador.”  “Pecado” ne’ebé governu Timor-Leste boot liután to’o hada’et entidade Estado nian ne’ebé responsabiliza ba teste swab ka Polymerase Chain Reaction (PCR) test COVID-19, hafoin Pedro Carrascalão nia deklarasaun ba media iha Aeroportu Nicolau Lobato katak, razaun pasajeiru sira ne’e labele kontinua sira nia viajen tanba kualidade teste PCR iha Timor-Leste “la di’ak.”

Timor oan sira ne’ebe infrenta problema iha aero portu Kuala Lumpur. [Foto: Copyright facebook | 01.05.2021]

Pasajeiru timoroan na’in 35 to’o fali Dili ho laran susar. Laran susar, tanba hanoin esforsu sira ne’ebé sira halo hodi prepara-an ba Inglaterra. Informasaun ne’ebé Neon Metin hetan hosi pasajeiru balun, katak sira preokupa oinsá atu selu tusan ba sira nia maluk iha Timor ne’ebé fó empresta osan ba sira hodi prepara sira nia viajen. Emprestimu ne’ebé sira promete atu selu fali bainhira hetan ona osan hosi servisu iha Inglaterra. Sira laran susar mós tanba hanoin sira nia família ne’ebé hein atu simu sira iha Inglaterra.

Hosi laran susar ne’e, mosu mós pergunta boot ida. Pergunta ne’ebé sira kontinua husu ba ajénsia viajen NARPOV ho Pedro Carrascalão: se razaun tanba kualidade teste swab COVID no validade billete viajen (not invalid after 16 April), tanba sá nia impaktu afeta ami na’in 35 de’it. Tanba sá pasajeiru sira seluk bele kontinua sira nia viajen?

Relasaun entre Ajénsia Viajen NARPOV ho Malindo Air

Neon Metin halo entrevista ho Responsavel Jerál ajénsia viajen NARPOV José Alexandre Guterres, hodi klarifika situasaun ne’e, liuliu relasaun kontratu entre NARPOV ho kompañia aérea Malindo Air, ne’ebé reprezenta hosi Pedro Carrascalão.

Ba Neon Metin, José Esplika katak iha fulan Janeiru 2021, NARPOV halo komunikasaun ho Pedro Carrascalão kona ba oinsá bele fasilita koneksaun viajen aérea ida hodi bele tula timoroan sira hosi Timor ba Reinu Unidu (UK). “Koneksaun ne’ebé bele fasilita mos timoroan sira Reinu Unidu fila mai Timor, tanba situasaun Serka Sanitaria tanba impaktu hosi COVID-19”, José haktuir ba Neon Metin iha loron 26 Abríl.  Hosi komunikasaun ne’e, Pedro hato’o ba NARPOV katak nia iha aviaun ne’ebé bele aluga atu halo koneksaun ida ne’e. Parte rua konkorda atu kompleta malu iha objetivu ida ne’e. Ajénsia viajen NARPOV fa’an (emite) billete, Pedro mak responsabiliza konaba prosesu aluga aviaun.

“Ami hahú komunika malu, iha kedas fulan Janeiru 2021, atu bele prosesa billete viajen ba timoroan sira ne’ebé hakarak halo viajen ba UK no fatin seluk iha tasi-balu. Iha ne’e, ami hahú kontaktu, halo rejistu no marka data (itineráriu). Hosi Inglaterra atu mai iha loron 14 Abríl. Buat hotu la’o di’ak. Aleinde hosi UK, ami kontaktu timoroan sira iha Korea, tanba sira barak iha ne’ebá mós ezije hakarak fila, ho razaun pasaporte mate, no labele serbisu tan tanba kontratu ho kompañia remata ona. Difikuldade sira ne’e halo Adidu (Ataxé) mós kontaktu ha’u beibeik husu tulun oinsá bele prosesa sira fila”, Responsavel Jerál ajénsia NARPOV ne’e esplika.

Pedro Carrascalão haktuir nia kompromisu. Pedro nia knaar nu’udar pontu koneksaun ho kompañia aérea Malindo Air, kompañia ne’ebé fó aluga (charter) aviaun. “Kustu ba aluga aviaun ajensia NARPOV mak responsabiliza. Pagamentu ba aluga aviaun halo liuhosi transferénsia bankária, Banku Mandiri. Pagamentu halo dala tolu iha dolar Amérika. Dala uluk halo ho montante USD 7,000.00 (dolar rihun hitu), daruak USD 45,000.00 (dolar rihun haatnulu resin lima) no pagamentu ikusliu USD 10,000.00 (dolar rihun sanulu). Kustu total aluga aviaun ba fulan tolu (3) hosi 18 Abríl to’o 30 Juñu 2021 hamutuk USD 62,000.00 (rihun neenulu resin rua)”, José klarifika.

Ho akordu ne’e no prosesu preparativu sira ne’ebé ami halo, ikusmai ami hetan kandidatu pasajeiru hamutuk na’in 104. Iha loron 18 Abríl, bainhira halo check-in, pasajeiru na’in 90 de’it mak konsege sa’e aviaun atu halo sira nia viajen. Sira na’in 14 kansela sira nia viajen iha Aeroportu Dili, tanba labele transit iha Barcelona, España, tuir itinerariu. Pasajeiru sira ne’e balun uza pasaporte Portuguesa no ida uza pasaporte Timor-Leste. Ida ho pasaporte Timor-Leste ne’e lori narrativu pasaporte nian, atu ba halo tratamentu médiku iha Lizboa.

‘Date of Departure’ la tuir Billete aviaun ne’ebé ajénsia viajen emite

Voo aviaun Malindo ho No. Vou OD 8214, tula pasajeiru na’in 90 deskola (take off)  hosi Aeroportu Internasionál Nicolau Lobato, Dili iha loron 18 Abríl oras 09:00 dadersán. Tun iha  Aeroportu Internasionál Kuala Lumpur tk 12:10 meiudia, oras Malázia nian.

bileti Malindo airlines Dili-Kuala Lumpur. [Foto: Dok. NM | 01.05.2021]

Hosi kopia billete ne’ebé Neon Metin hetan hatudu katak “date of departure” la tuir data ne’ebé hakerek iha billete laran. Tuir billete ne’ebé ajénsia viajen NARPOV emite ba pasajeiru sira, ho validade “not valid before 16 Abríl and not valid after 16 April”, aviaun loloos arranka hosi Aeroportu Nicolau Lobato, iha loron 16 Abríl 2021, tk 09:00 dadeer. Katak billete aviaun ne’e la válidu (not valid) molok no hafoin loron 16 Abríl 2021. Realidade hanesan públiku hatene, aviaun Malindo semo hosi Dili ho pasajeiru na’in 90 iha loron 18 Abríl ho destinu final Aeroportu Internasionál Kuala Lumpur, Malázia.

Billete aviaun ba vou loron 18 Abríl nian iha ne’ebé? Pasajeiru sira tenke hola foun fali?

José haktuir ba Neon Metin katak billete hosi Dili ba Kuala Lumpur Malindo Airlines mak emite (ho NARPOV fo ona osan). NARPOV mak emite billete viajen hosi Kuala Lumpur ba Londres (Inglaterra) no nasaun destinatáriu sira seluk. Kompañia aérea (aviaun) ne’ebé ajénsia NARPOV hili ba pasajeiru sira nu’udar “connecting flights” mak Singapore Airlines (SG), KLM no Qatar prepara mak ticket ba Singapore Airlines, KLM (KL) no Qatar Airways (QF).

“Agora ne’e hau konfuzaun ho billete hosi Dili ba Kuala Lumpur nian.  Señór Pedro charter aviaun ne’e to’o fulan tolu.  Signifika katak billete viajen aviaun ne’e hosi fulan Abríl to’o Juñu, maibé to’o agora billete viajen Dili-Kuala Lumpur ho ‘date of departure’ 18 Abríl nian ami la hetan. Nia haruka fali billete ho ‘date of departure’ loron 16 Abríl nian. Ami la hatene tanba sá? Nia dehan aviaun iha fallansu. Ami nia  kliente (pasajeiru) sira halo hotu ona PCR test no hola billete viajen ho ‘date of departure’ 16 Abríl nian, maibé teki-teki nia dehan aviaun la iha no labele mai. Entaun ida ne’e halo ami nu’udar  ajénsia viajen mós lakon osan barak, tanba ami tenke tanggung (responsabiliza) fali osan ba PCR test nian no hola fali tiket foun”, José kestiona ba Neon Metin.

Tanba sá Pasajeiru pasaporte Timor labele kontinua sira nia viajen no tenke fila mai Timor?

Iha viajen aérea baibain, ema ida sa’e aviaun ida hosi aeroportu orijen ba to’o iha aeroportu seluk (transit), hafoin kontinua fali nia viajen ho aviaun seluk ba aeroportu destinatáriu, pasajeiru ne’e nia destinu viajen) la’os ona responsabilidade aviaun ne’ebé tula sira hosi aeroportu orijen (port of departure). Iha kazu ne’ebé akontese ho pasajeiru timoroan na’in 35 ne’e, loloos ne’e aviaun KLM mak tenke responsabiliza ona. Situasaun ne’e sai polémika boot, tanba informasaun ne’ebá Neon Metin hetan hosi pasajeiru sira ne’ebé fila ne’e, katak sira labele ba halo check-in iha KLM tanba Malindo mak kansela. Polémika ne’e sai boot liután iha públiku bainhira opiniaun balun iha media nasionál balun hateten katak imigrasaun Malásia sei detein pasajeiru sira ne’e bainhira hela liu limite loron ne’ebé lei imigrasaun Malázia nian. Se pasajeiru sira ne’e kaer pasaporte Timor-Leste nian, ne’ebé hetan admisaun atu hela iha Malázia durante loron 30, tanba sá tenke detein? Iha situasaun ne’e pergunta ida mosu: Malindo Airlines ka Imigrasaun Malázia mak ‘deporta’ pasajeiru timoroan na’in 35 ne’e?

Hatán ba pergunta ne’e, Responsavel Jerál NARPOV, José Alexandre Guterres esklarese ba Neon Metin katak NARPOV husu duni ba Malindo razaun sa ida mak “imi tahan hotu pasaporte Portuguesa? Se imigrasaun mak tahan, hatudu to’ok buat ruma (prova) mai.”

Ho situasaun ne’e José konklui “tahan timoroan ho pasaporte Portugeza hamutuk ho timoroan ho pasaporte Timor-Leste, ha’u deskonfia ne’e Malindo mak tahan. Imigrasaun labele tahan ema Portuguesa nia pasaporte no kualkér sidadaun ida nian.  Se nia (imigrasaun) mak tahan pasaporte Timor-Leste, nia tenke halo justifikasaun”.

José mós argumenta katak, posibilidade atu tahan pasajeiru timoroan sira ne’e ho nia pasaporte bele mai hosi imigrasaun Inglaterra nian. Nia dehan “imigrasaun Inglaterra bele tahan timoroan sira ne’e, ho razaun tanba sira nia períodu (oras) transit iha aeroportu nasaun seluk kleur liu limite ne’ebé sira nia sistema imigrasaun prevee, oras 2 nia laran de’it. Bainhira kle’ur liu ida ne’e, bele hamosu deskonfiansa iha aspetu seguransa nian, hanesan envolvimentu iha atividade terrorizmu nian.”

Razaun seluk tan ne’ebé sai baze ba José nia argumentu mak pasajeiru timoroan inklui na’in 16, balun ba ho pasaporte Timor-Leste akompaña ho narrativu atu ba trata pasaporte portugeza hodi kontinua halo viajen ba nasaun Europa seluk. “Pasajeiru ho pasaporte Portugeza na’in rua mós sira tahan hotu no labele kontinua viajen. Ida ne’e sai problema boot baa mi, tanba sira ezije sira nia osan ba ami no pasaporte Portugal mós hahú hosi Timor-Leste kansela ona,” José hatutan.

pasajeiro sira atu boarding fila mai Timor iha loron 24 Abril. [Foto: Copyright facebook | 01.05.2021]

Ezijénsia atu reembolsa osan ticket mai mós hosi pasajeiru sira ne’ebé labele kontinua viajen no tenke fila mai Timor. Pasajeiru sira ne’e iha loron 26 Abríl hakat ba ajénsia ticket NARPOV ezije hodi fó fila sira nia osan. “Ami mai ezije atu devolve fali ami nia osan. Husi Dili ba Malaysia ne’e ami sa’e ona aviaun ne’e los ona, maibé ami husi Malaysia ba Inglaterra ami seidauk sa’e aviaun, entaun ami ezije ida ne’e, ajénsia NARPOV tenke fó fila ami nia osan. Isabel Fátima da Cruz haktuir ba Neon Metin iha edifísiu Ajénsia NARPOV, iha Fatuhada Dili.

Konaba kanselamentu viajen, Neon Metin husu mós informasaun hosi pasajeiru timoroan ne’ebe halo parte grupu 35 ne’e. António da Costa, pasajeiru Malindo portador pasaporte Timor-Leste afirma katak nia rasik mós la komprende konaba hun loloos hosi kanselamentu ne’e. “Ema tahan ami la’os hosi imigrasaun, maibé iha ground desk KLM nian, bainhira ami hakat ba atu boarding. Iha fatin ne’e sira hateten katak ami labele tama (boarding) tanba laiha autorizasaun hosi imigrasaun Amsterdam, Olanda. La kleur parte hosi Malindo mai lori ami ba hotel. Staff Malindo hateten ba ami labele boarding tanba ami la’o grupu no tanba ‘alert’ ne’ebé dehan katak ami PCR test ne’e falsu, ami la lori bagasse no la hatene ko’alia inglés. Konaba lian inglés ne’e ha’u hatán ba malae ne’e katak ha’u hatene ko’alia inglés. Maibé nia hatene katak se ami halo viajen ho kondisaun hanesan ne’e to’o iha Amsterdam, KLM Malázia mak sei hetan ‘penalty”, António haktuir.

António mós dehan katak durante iha aeroportu no iha hotel, sira nunka hasoru ema ruma ne’ebé identifika-an nu’udar pesoál imigrasaun Malázia nian. “Ami hasoru mak staff hosi Malindo Airlines no UK staff ne’ebé halo entrevista ba ami konaba ami nia profiling.” Ba Neon Metin, António temi mós prezensa pesoál hosi Embaixada Timor-Leste nian iha entrevista ne’e. “Staff Malindo Airlines ho ema hosi Embaixada Timor-Leste hateten ba ami atu labele temi kona imigrasaun Malázia. Tan asuntu ne’e la iha relasaun ho servisu imigrasaun Malázia nian. Ha’u haree staff Malindo Airlines mak ‘take over’ hotu no fó garantia  ami atu hela iha ne’ebá durante oras 72 nia laran”. 

Embaixada Timor iha Malaysia hasoru malu ho pasajeiro timoroan sira. [Foto: Copyright embaixada TL iha Malazia | 01.05.2021]

Neon Metin mós konfirma ho Embaixadora Timor-Leste iha Malázia Señora Olandina Caeiro hodi hetan esplikasaun ruma. Aleinde esplikasaun, Neon Metin mós hakarak buka hatene asisténsia no intervensaun sá ida mak Embaixada halo ba hodi tulun solusiona problema ne’ebé sidadaun timoroan sira hasoru. Tanba opiniaun kritika barak mosu iha media nasionál no media sosiál hateten Embaixada ‘la halo buat ida’ iha asuntu ne’e.

Ba Neon Metin, liuhosi surat eletrónika (e-mail), Señora Olandina esplika katak Embaixada hatene no akompaña kazu ne’e to’o hetan solusaun. “Hafoin simu informasaun konaba kazu ne’e liuhosi telefone iha 18 Abríl, kalan ne’e kedas ha’u orienta pesoál Konsulár Sr. Leonildo atu ba kedas buka tuir akompaña Malindo Airlines, kompañia aérea ne’ebé tula pasajeiru sira hosi Dili no akompaña sira ba hotel transit Sama Sama Express. Iha 19 Abríl, Embaixada simu informasaun ‘por escrita’ hosi Malindo Air katak pasajeiru na’in 53, portador pasaporte Portugal na’in 18, no pasaporte Timor-Leste na’in 35, labele kontinua sira nia viajen ba Reinu Unidu”, Embaixadora Olandina esplika.

Esplikasaun Embaixadora RDTL iha Malázia bele sani iha ne’e (link ba (link ba: Entrevista ho embaixadora TL iha Malasia Maria Olandina, kanselamentu viajem pasajeiro nain 50 resin.

Tuir Señora Olandina nia esplikasaun iha surat eletrónika ne’e, iha razaun fundamental rua (2) mak halo sira labele kontinua sira nia viajen. Ida, Pasajeiru sira ba halo check-in iha grupu no iha ‘ultimo minutu’. Situasaun ne’ebé hamosu konfuzaun boot ba kompañia aérea KLM, liuliu relasiona ho pasajeiru sira ne’e nia ‘motivu de viajen.’ Rua, Pasajeiru sira ho pasaporte Timor-Leste nia itineráriu la tuir prosedura (Dili – Kuala Lumpur – London, fulan ida (1) – Lizboa. Itineráriu ne’e la kumpre prosedura normal. Katak pasajeiru ho pasaporte Timor-Leste, hafoin vizita tiha nasaun ida, tenke fila hikas ba nasaun orijen. Iha kazu ne’e, pasajeiru na’in 35 ne’ebé uza pasaporte Timor-Leste tenke fila ba Timor, maibé sira nia billete ne’ebé ajénsia viajen emite nia destinu ikus ba fali Lizboa, Portugal

Kona ba desizaun kanselamentu Embaixadora Olandina esplika “ho razaun rua ne’e mak Malindo Air hosu tulun ba UK Immigration Enforcement International Border iha British High Commission Kuala Lumpur hodi halo profiling ka entrevista pasajeiru sira hodi hatene sira nia motivu viajen, liuliu atu haree legalidade dokumentu tuir prosedura UK Brexit nian. Iha prosesu ne’e mak identifika katak pasajeiru sira nia dokumentu balun la prenxe rekizitu atu tama Reinu Unidu ka nia kategoria Not to Land (NTT) ka Inadmissible passengers (INAD). Tan ne’e, husu ba Malindo Air atu tula fila sira ba nasaun orijen, Timor-Leste.”

Relasiona ho kualidade PCR test, Señora Olandina admite katak parte British High Commission Kuala Lumpur kestiona duni, maibé Embaixada no Malindo Air konsidera katak problema nia hun mak fallansu iha parte téknika administrativu. “La’os teste mak la iha kualidade. Ami haree ho atensaun tebes dokumentu PCR test ne’e,” Señora Olandina afirma.

Hatán ba kritika sira iha públiku Timor-Leste katak Embaixada la pro-ativu iha asuntu ne’e, Embaixadora afirma katak “ami pro-ativu.” Embaixada nia akompañamentu hahú kedas iha 18 Abríl bainhira sira to’o iha Kuala Lumpur. Embaixadora esplika katak “iha aeroportu ami fo hatene kedas sira konaba rigorozidade SOP (Standard of Procedures) COVID-19 iha Malázia. Se mak viola selu multa RM 1,000.00 (ringgit Malaysia rihun ida), mais ou menus USD 250.00 (dolar atus rua limanulu). Nonook la’os katak la halo servisu. Karik ami halo servisu mós la’os atu relata iha media social.”

Dokumentu rezultadu PCR test mós sai kestaun durante prosesu profiling ne’ebé entidade Immigration Enforcement International (IEI) halo. Pasajeiru Malindo nia PCR test ne’e nia validade to’o 20 Abríl 2021. Tanba ne’e mak iha rekizitu atu halo test foun.  

Iha entrevista jornalista sira ho Pedro Carrascalão iha loron 24 Abríl, bainhira prosesa pasajeiru Timoroan sira fila mai Timor, iha aeroportu Nicolau Lobato nia hateten British High Commission Kuala Lumpur investiga sira no deteta pasajeiru ida, portador pasaporte Portugés, pozitivu COVID-19 no halo hela izolamentu iha hotel SILKA Kuala Lumpur.

“Iha oportunidade ida ne’e mós deskonfia katak PCR test ne’ebé halo iha Timor-Leste la iha kualidade, entaun ha’u mós duvida karik ho razaun ida ne’e mak haruka sira fila, maibé ne’e hanesan deskonfia de’it tanba iha Timor-Leste Organizasaun Mundial Saúde no Australia mós tulun iha Laboratóriu Nasionál Timor-Leste atu halo PCR test. Konaba ida ne’e, ha’u hanoin entidade relevante Malázia ho Timor-Leste mak sei komunika ba malu”, dehan Pedro

Ba kestaun ida ne’e jornalista sira konfirma ho Ministra Saúde, Odete Maria Freitas Belo rejeita informasaun ne’e no sei buka solusaun. Ministra hateten Laboratóriu Nasionál (LABNAS) Timor-Leste se laiha kualidade, durante timoroan sira no ema estranjeiru sira bainhira atu sai ba rai li’ur lori rezultadu hosi ne’e la iha problema durante viajen.

Ministra Saude (MS), Odete Maria Freitas Belo. [Foto: David da Costa | 27.04.2021]

“Ha’u la hatene informasaun teste laboratóriu ba PCR laiha kualidade, atu deklara katak Laboratóriu Nasionál ne’e ida de’it no atualmente halo atividade teste ba ema ne’ebé presiza no mákina halo analiza ba amostra sira . Entaun ha’u nafatin hateten katak Laboratóriu Nasionál nia teste iha kualidade ,” informa Ministra Odete, 27/04.

Ministra Saúde konsidera presiza identifika  buka hatene teste PCR ne’ebé mak scan de’it, tuir informasaun ne’ebé espalla iha media sosiál

“Normalmente kuandu ita atu ba rai  liur,  la’os na’in  haat ou na’in  lima de’it, maibé ema lubuk ida ona mak ba, no la’os timoroan de’it, maibé ema estranjeiru sira ne’ebé hakarak ba vizita sira  nia família no mós antes sai halo teste PCR, no Laboratóriu Nasionál mak halo teste no fó sai rezultadu analiza , ne’ebé durante ne’e laiha problema”, nia esplika.

Hosi Centro Integradu Jestaun Krize (CIJK) mós hatán ona ba problema ne’ebé pasajeiru 35 hasoru iha Kuala Lumpur, ne’ebé tuir informasaun sira labele ba tanba PCR test laiha kualidade. CIJK esplika katak husi pedidu klarifikasaun liu husi kanál diplomátiku ne’ebé Embaixada Timor-Leste iha Malaysia halo, Liasion Officer British High Commission Kuala Lumpur informa katak, relasiona no sira nian 35 ne’ebé tenke fila mai Timor-Leste hakerek iha English katak ‘’Each passenger was assessed, and a decision made to determine if they were admissible to the UK. Those deemed so were allowed to travel onwards once new COVID Tests had been conducted and negative results received.’’ (kada pasajeiru hetan ona avaliasaun, no desizaun halo tiha ona se sira bele tama ba UK. Sira ne’ebé bele sei husik sira viajen nafatin bainhira teste COVID foun hala’o tiha ona no hetan katak sira nia rezultadu negativu).

Maski nune’e data anúnsiu kona ba kondisaun sira ne’ebé ema ho pasaporte Timor-Leste tenke halo tuir ne’e publika iha loron 20 Abríl. Data pasajeiru sira tama iha Aeroportu Kuala Lumpur no atu kontinua viajen ba Reinu Unidu ne’e iha 18 Abríl. Oinsá mak kondisaun ne’ebé Immigration Enforcement International (IEI) emite ka publika ne’e efetivu kedas antes data publikasaun?

CIJK mós esplika katak pasajeiru na’in 35, la admite tama iha UK ka Reinu Unidu tanba razaun seluk, “se fosse sira prienxe kritériu sira seluk, sira hetan permisaun atu halo viajen, bainhira halo fali test COVID ho rezultadu negativu, hanesan mós ho timoroan sira seluk ne’ebé halo duni viajen, tanba prazu limite test nian 72 oras liu tiha ona”.

Tanba sá tenke halo tan PCR test hafoin loron 3 iha nasaun seluk?

Ema barak sei kontinua konfunde swab test ka PCR test ne’e halo dala ida de’it ou tenke halo beibeik? Situasaun ida ne’e mak pasajeiru sira hasoru iha Malázia, na’in 18 ne’ebé uza pasaporte Portugal kontinua halo viajen ba Inglaterra, maibé antes ne’e sira halo PCR test hodi deteta katak sira iha COVID-19 ka lae?

Hosi rezultadu teste PCR na’in ida konfirmandu pozitivu COVID-19, nune’e nia labele halo viajen ba London no halo izolamentu iha Kuala Lumpur no na’in 17 mak kontinua halo viajen ba Portugal no na’in 35 pasaporte Timor fila mai Timor no la halo PCR test.

Koordenador Forsa-Tarefa ba Prevensaun no Mitigasaun Surtu COVID-19 iha Timor Leste, Dr. Rui Maria de Araújo. [Foto: Francisco JDA | 11.03.2021]

Neon Metin halo entrevista via telefone ho Dr. Rui Araújo konaba PCR test presiza halo beibeik ka dala ida de’it? Ba Neon Metin Dr. Rui Araújo esplika “primeiru, ema nee bele hetan kontájiu, hahú momentu liu tiha nia foti swab ba PCR test iha Laboratóriu Nasionál, no mós durante halo viajen. Segundo, se kualidade swab TL nian la di’ak, tan sá pasajeiru sira seluk, ne’ebé lori pasaporte Portuguesa bele liu?”

Dr. Rui hatutan, kazu hanesan ne’e mosu mós ba pasajeiru ne’ebé mai husi liur. Sira lori PCR test negative, maibé durante kuarentena ita test pozitivu. Balun fali durante kuarentena mosu sintoma, ita halo test nia pozitivu, maski ninia PCR initial mai husi ninia nasaun negativu.

Dr. Rui mos konta tuir fali loron hirak liu ba akontese mos iha Lospalos. Sira ba husi Dili ho test negativu, maibé sa’e mikrolete iha fronteira Lospalos ho ema ne’ebé la test PCR, liu tiha loron balun pesoál saúde Lospalos halo test, rezultadu pozitivu.

Iha mós posibilidade iha momentu nia foti swab iha Laboratóriu Nasionál, nia foin hetan kontájiu seidauk to’o loron 4 ba leten. Né’e iha relasaun ho períodu inkubasaun. PCR test la bele deteta bainhira virus seidauk multiplika-an/habarak-an iha ita ema nia inus ho kakorok”, esplika Dr. Rui Araújo, via telefone (26/04).

Ticket One-way sai problema?

Iha situasaun ne’ebé pasajeiru sira hasoru problema seluk mak tiket one way, katak pasajeiru sira la iha tiket fila nian, liu-liu ba pasajeiru ne’ebé uza pasaporte Timor-Leste. Iha entrevista ho Responsavel Jerál NARPOV, José Alexandre Guterres esplika katak sira ne’ebé hola ticket one-way tanba atu ba hela ona iha UK, ho razaun sira uza Joint Family Visa.

“Depois ita apar (kombina) fali ticket Kuala Lumpur mai Dili, Pedro dehan aviaun aluga to’o fulan 3, entaun billete válidu hosi 18 April until 30 June. Maibé ticket 18 April nian ne’e to’o agora ami la hetan no uza fali 16 Abríl nian, tanba bazeia ba UK ne’e sira sei husu ticket return nian, maibé ida ne’e Pedro la fó, no nia dehan aviaun ne’e aluga fulan 3. Hosi Dili ba Malaysia ne’e one-way tanba billete ne’e Pedro mak hasai, hosi kompañia aérea Malindo Air. Pasajeiru balun billete kompletu, maibé sira mós labele sai hosi Malaysia, balun billete hola ba Lizboa ne’e mós la ba, balun pasaporte Portuguesa mós la ba hotu, katak labele kontinua halo viajen hosi Kuala Lumpur”, dehan José.

Konaba billete viajen 18 Abríl nian ne’ebé NARPOV seidauk simu, bele sani deklarasaun Pedro Carrascalão nian, iha entrevista Neon Metin ho Pedro (via WhatsApp) iha loron 30 Abríl 2021 iha link: Viajem problematika ho malindo, Pedro Carracalao: Malindo kumpri ona nia servisu

Nia hatutan prosesu ne’e iha 3 katak one way mós iha, ba mai nian mós iha, maibé sira ne’e falla hotu kedas, “berarti ida ne’e laiha prosesu checking karik, hanesan mós iha Dili, sira seidauk checking haruka sira fila tiha. timoroan na’in rua ne’ebé nia viajen kansela iha Dili ne’e uza pasaporte Portugal no nia labele semo tanba nia ticket transit iha Barcelona. Ne’e akontese mós ba sira ne’ebé uza pasaporte Timor-Leste

Afirmasaun hosi fonte oioin ne’ebé Neon Metin hetan konaba kazu pasajeiru timoroan sira iha Aeroportu Kuala Lumpur, Malázia, hatudu katak parte sira ne’ebé involve diretamente iha prosesu viajen, ajénsia viajen no kompañia aérea, la iha koordenasaun sufisiente hodi garante sira nia kliente nia seguransa iha durante viajen hosi nasaun orijen to’o nasaun destinatáriu. Liuliu iha períodu pandemia COVID-19, iha ne’ebé nasaun hotu-hotu aplika Standard Operational Procedures (SOP) tuir ida-idak nia rekizitu legal. Atensaun seluk ne’ebé tenke haree mak polítika Brexit ne’ebé halo Reinu Unidu hamosu nia padraun imigrasaun rasik. Padraun ne’ebé diferente hosi nasaun Uniaun Europeia seluk, hanesan Portugal ka Olanda.

Maski intensaun di’ak hosi ajénsia viajen no kompañia aérea atu fasilita timoroan sira bele ba rai seluk no fila hosi rai seluk mai Timor-Leste, tenke hetan apresiasaun, maibé nu’udar entidade negósiu destinu no bem-estar kliente (pasajeiru) tenke sai prioridade aas liu.

Print Friendly, PDF & Email

LEAVE A REPLY

Please enter your comment!
Please enter your name here