Home Notisia Siklone Seroja, Uma Kain 345 Iha Laclubar Simu Ona Apoiu Emerjensia

Siklone Seroja, Uma Kain 345 Iha Laclubar Simu Ona Apoiu Emerjensia

441
0
komunidade afetadu iha Laclubar simu apoiu emerjensia. [Foto: Adroaldo | 30.04.2021]

Reportazen Adroaldo ‘Saretukau’

Siklone Seroja ne’ebe akontese iha loron 4 Abril, fo impaktu ba populasaun sira, balun lakon uma, sasan, animal no mos sira nia vida.

Komunidade iha Postu Administrativu Laclubar, Municipio Manatuto uma kain hamutuk 345 ne’ebe afeta hosi dezastre natural siklone Seroja hetan ona apoiu emerjénsia hosi entidades no grupu silidaderiedade iha Suku neen, Postu Administrativu Laclubar.

Neon Metin halo entrevista ho Administrador Postu Administrativu Laclubar, Natalino Martins de Carvalho konaba apoiu hosi grupu solidariedade sira ba komunidada afetadu sira.

“Apoiu primeiru mai hosi Caritas Baucau, Caritas Díli, governu liu hosi Ministeriu Turismu Comersio,  no Industria (MTCI), no grupu voluntario Loriku Adventure (Load)

sira no ikus provizóriu iha ami nia office hosi Ministériu Solidariedade Sosial liu hosi Sekretária Estadu Protesaun Sivil, maibé seidauk halo distribuisaun tanba sasan balu seidauk tama,” hateten Natalino iha Laclubar 29/04.

Nia hateten akontesimentu ne’e estraga komunidade barak nia uma no plantasuan sira. Uma kain hamutuk 345 mak afeta, estraga mos plantasaun kafe, abokate no plantasaun sira seluk.

Nia hatutan, uma kain afetadu sira hetan ona apoiu hosi parte balu, maibé ba sira ne’ebé to’os estragus seidauk hetan apoiu no oras ne’e relata ona informasaun ba ministerium relevante maibe sedauk hetan apoiu no konaba uma sira ne’ebe hetan estraga mos hato’o on aba governu

“Provizoriu ami seidauk halo proposta maibé relatóriu jeral ami hato’o ona, no iha ami nia postu oras ne’e ekipa dezastre munisípiu ho Postu nian halo hela asesmentu, liu-liu ba uma sira ne’ebé hetan estragus”, Administrador hatutan.

Entretantu Administrador Natalino Martins de Carvalho hato’o agradesimentu ba grupu no NGO sira ne’ebé iha vontade di’ak, ho laran luak ajuda ona komunidade Laclubar, liu-liu sira ne’ebé afeta ba dezastre ida ne’e.

“Hanesan administrador do Postu agradese wa’in tebes ba entidade hotu-hotu tantu hosi Governu, grupu solidariedade nian no igreja, ne’ebé iha vontade bele hatutan ona material balun, liu-liu hahan ba ami nia komunidade sira ne’ebé afeta ba dezastre ne’ebé akontese iha loron 4 Abril liu ba”, dehan Natalino

Iha parte sorin Xefe Suku Manelima husu atu apoiu ruma ne’ebé mai, hodi tulun mos ba komunidade sira ne’ebé hetan estragus ba sira nia plantasaun no to’os.

“Konabá uma, ha’u hanoin apoiu ruma mai sira bele para lai, karik iha oferese fali ba sira ne’ebé to’os hetan estragus. Tanba situasaun ida dezastre, mosu tan COVID-19, komunidade sira hasoru problema boot hotu”, Xefe Suku Manelima sujere.

Nia dehan komunidade iha suku Manelima rasik ne’ebe hetan ona apoiu hamutuk uma kain 23. Ho ajuda ne’ebe komunidade sira hetan, bele ajuda sira iha situasuan emerjensia ne’e.

Apoiu hirak ne’e mai hosi Grupu Movimentu Solidariedade fo Liman ba Malu, Lafaek of Road Challenge Adventure (LOCA) no Loriku Adventure (LOAD) no governu.

Print Friendly, PDF & Email

LEAVE A REPLY

Please enter your comment!
Please enter your name here